Mga Prinsipyo sa Ministering, Abril 2019

Paghimo sang Ministering nga Makalilipay

Ang mag-alagad nga may pagpalangga nagadala sang kalipay alangay sa nagahatag kag sa nagabaton.

Kon kaisa ang aton pagpangita sang kalipayan sa sini nga kabuhi mahimo nga daw katulad sang pagdalagan sa treadmill. Nagasige kita dalagan pero pamatyag naton daw wala kita nagahalin. Para sa pila, ang panumduman nga mag-minister sa iban daw pareho nga nagdugang lang ang hilimuon.

Apang luyag sang aton Amay nga Langitnon nga maeksperiyensyahan naton ang kalipay kag nagsiling sa aton nga “ang tawo nagakabuhi, agud sila makaangkon sing kalipay” (2 Nefi 2:25). Kag ang Manluluwas nagtudlo nga ang pag-minister sa iban isa ka importante nga bahin kon paano kita magdala sang kalipay sa aton mga kabuhi kag sa mga kabuhi sang iban.

Ano ang Kalipay?

Ang kalipay ginlaragway nga “isa ka pamatyagan sang dako nga kasadya kag kalipayan.”¹ Ang mga propeta sa ulihing-mga-adlaw naghatag sang paathag kon sa diin nagahalin ang kalipay kag kon paano ini masalapuan. “Ang kalipay nga aton mabatyagan wala sing kaangtanan sa mga sirkumstansya sang aton kabuhi kag may dako nga kaangtanan sa aton ginatutukan sa kabuhi,” siling ni Pangulong Russell M. Nelson. “… Ang kalipay nagaabot gikan kag tungod kay [Jesucristo]. Sia amo ang ginhalinan sang tanan nga kalipay.”²

Ang Ministering Nagadala sang Kalipay

Sang kaunon ni Lehi ang bunga sang puno sang kabuhi, ang iya kalag napuno sang “tuman kadako nga kalipay” (1 Nefi 8:12). Ang iya una nga handum amo nga ipaambit ining bunga sa iya mga pinalangga.

Ang aton kaluyag nga mag-minister sa iban sarang magdala sang subong sini nga kalipay sa aton kag sa ila. Ang Manluluwas nagtudlo sa Iya mga disipulo nga ang bunga nga nagahalin sa aton kon kita naangot sa Iya makabulig hatag sa aton sang kabug-osan sang kalipay (tan-awa sa Juan 15:1–11). Ang paghimo sang Iya buluhaton paagi sa pag-alagad kag pagtinguha nga dalhon ang iban sa Iya sarang nga mangin makalilipay nga eksperiyensya (tan-awa sa Lucas 15:7; Alma 29:9; Doctrine and Covenants 18:16; 50:22). Maeskperiyensyahan naton ining kalipay bisan sa atubang sang oposisyon kag pag-antos (tan-awa sa 2 Mga Taga-Corinto 7:4; Mga Taga-Colosas 1:11).

Ang Manluluwas nagpakita sa aton sang perpekto nga ehemplo nga isa sa pinakadako nga ginhalinan sang matuod-tuod nga kalipay sa mortal nga kabuhi masalapuan sa pag-alagad. Kon kita naga-minister sa aton kauturan kasubong sang Manluluwas, nga may pagpalangga sa isigkatawo kag paghigugma sa aton mga tagipusuon, aton maeksperiyensyahan ang kalipay nga labaw pa sa simple nga kalipayan.

“Kon himuon naton ang [ministering] nga hugot sa buot, kita mas nagahilapit … sa pagmangin mga katawhan sang Sion kag makabatyag sang nagalumapaw nga kalipay upod sadtong mga ginbuligan naton sa banas sang pagkasumulunod,” panudlo ni Sister Jean B. Bingham, Pangkabilugan nga Pangulo sang Relief Society.³

Paano Naton Himuon ang Ministering nga Mas Makalilipay?

May madamo nga paagi sa pagdala sang mas dako nga kalipay sa aton ministering. Yari ang pila ka mga ideya:

Intiendiha ang inyo katuyuan sa pag-minister. May madamo nga rason sa pag-minister. Sa kabug-osan, ang aton mga pagpaninguha dapat magsanto sa katuyuan sang Dios “sa pagpahanabo sang imortalidad kag wala’y katapusan nga kabuhi sang tawo” (Moses 1:39). Sa aton pagbaton sang pangagda ni Pangulong Russell M. Nelson nga buligan ang iban sa banas sang kasugtanan, masalapuan naton ang kalipay sa pagpasakop sa buluhaton sang Dios.⁴ (Para sa dugang nga ihibalo sa katuyuan sang ministering, tan-awa sa “Mga Prinsipyo sang Ministering: Ang Katuyuan nga Magabag-o sang Aton Pag-Minister,” sa Enero 2018 Liahona.)
Himoa ang ministering nga nahanungod sa tawo indi sa mga buluhaton. Si Pangulong Thomas S. Monson masami nga nagapahanumdom sa aton: “Indi pagtugoti ang problema nga dapat solbaron nga mangin mas importante pa sangsa tawo nga dapat palanggaon.”⁵ Ang ministering nahanungod sa pagpalangga sang tawo, indi sa mga buluhaton nga dapat himuon. Samtang kita nagatubo sa pagpalangga kasubong sang ginhimo sang Manluluwas, mas mangin bukas kita sa kalipay nga naggikan sa pag-alagad sa iban.
Himoa ang ministering nga simple. Si Pangulong M. Russell Ballard, Akting nga Pangulo sang Korum sang Dose ka mga Apostoles, naghambal sa aton: “Ang dalagko nga mga butang nagakahanabo paagi sa simple kag magagmay nga mga butang. … Ang aton magagmay kag simple nga mga buhat sang kaayo kag pag-alagad magasupot sa isa ka kabuhi nga puno sang pagpalangga sa Amay nga Langitnon, debosyon sa buluhaton sang Ginuong Jesucristo, kag sa isa ka balatyagon sang paghidaet kag kalipay sa tagsa ka tion nga maglab-ot kita sa isa kag isa.”⁶
Dulaa ang kabug-at sa ministering. Indi ninyo responsibilidad nga hikuton ang kaluwasan sang isa ka tawo. Yara ina sa tunga sang indibidwal kag sang Ginuo. Ang aton responsibilidad amo nga palanggaon sila kag buligan sila nga magliso kay Jesucristo, nga amo ang ila Manluluwas.

Indi Pagpabuyan-buyani ang Kalipay sang Pagserbisyo

Kon kaisa ang mga tawo nagapang-alang-alang nga magpangayo sang bulig, gani ang pagtanyag sang aton serbisyo ayhan amo ang ila ginakinahanglan. Pero indi man sabat ang ipamilit ang aton kaugalingon sa iban nga tawo. Maayo nga ideya ang maglisensya antes mag-ministering.

Si Elder Dieter F. Uchtdorf sang Korum sang Dose ka mga Apostoles nagsaysay parte sa solo-nga-iloy nga ginsulalob—kag dayon nagminasakit man ang iya mga kabataan. Ang masami matinlo nga balay nagalinapta na kag indi na mahipid. Ang mga hulugasan kag lalabhan nagtambak.

Sa tion nga daw nagakaramaal sia, ang mga utod sa Relief Society nagpanuktok sa iya puwertahan. Wala sila naghambal nga, “Hambala lang kami kon may mabulig kami.” Sang nakita nila ang sitwasyon, naggiho sila gilayon.

“Ginhimos nila ang lapta, nagdala sang kasanag kag kahimusan sa balay, kag gintawgan ang isa ka abyan nga magdala sang kinahanglanon gid nga mga grocery. Sang ila matapos ang ila ulobrahon kag nagpaalam na, nagahilibion ang bataon nga iloy—luha sang pagpasalamat kag pagpalangga.”⁷

Ang mga naghatag kag ang nagbaton alangay nga nakabatyag sang kainit sang kalipay.

Patuboa ang Kalipay sa Inyo Kabuhi

Kon mas dako nga kalipay, paghidaet, kag pagkakontento ang aton patubuon sa aton mga kabuhi, mas dako ang aton mangin ikasarang sa pagpaambit sa iban sa aton pag-minister. Ang kalipay nagaabot paagi sa Balaan nga Espiritu (tan-awa sa Mga Taga-Galacia 5:22 kag Doctrine and Covenants 11:13). Isa ini ka butang nga sarang naton ipangamuyo (tan-awa sa Doctrine and Covenants 136:29) kag agdahon nga magsulod sa aton mga kabuhi. Yari ang pila ka mga ideya agud magpatubo sang kalipay sa aton kaugalingon nga mga kabuhi:

Isipa ang inyo mga bugay. Samtang inyo ginaeksamin ang inyo kabuhi, isulat sa inyo journal ang mga butang nga ginbugay sa inyo sang Dios.⁸ Talupangda ang maayo nga nagapalibot sa inyo.⁹ Tutoki ang kon ano nga mahimo nagapugong sa inyo sa pagbatyag sang kalipay kag isulat ang mga pamaagi agud solbaron ukon mas maintiendihan ang mga ini. Sa sining tion sang Paskua sang Pagkabanhaw, hatagi sang tion ang pagpangita sang mas dako nga kaangtanan sa Manluluwas (tan-awa sa Doctrine and Covenants 101:36).
Himoa ang pagkamainulikdon. Ang kalipay mas madali magsulod sa inyo sa tion sang malinong nga pagpamalandong.¹⁰ Pamatii sing maayo kon ano ang nagahatag sa inyo sing kalipay (tan-awa sa 1 Mga Cronica 16:15). Ang tion nga malayo sa media kon kaisa kinahanglanon gid agud magmangin mainulikdon.¹¹
Likawi ang pagkumparar sa inyo kaugalingon. Ginasiling nga ang pagkumparar amo ang makawat sang kalipay. Si Pablo nagpaandam nga yadtong “nagatakos sang ila kaugalingon sing silahanon, kag nagapaangay sang ila kaugalingon sing silahanon, mga wala’y paghangop sila” (2 Mga Taga-Corinto 10:12).
Magtinguha nga makaangkon sang personal nga rebelasyon. Ang Manluluwas nagtudlo: “Kon magpangayo kamo, makabaton kamo sang rebelasyon dugang sa rebelasyon, ihibalo dugang sa ihibalo, agud nga mahibaloan ninyo ang mga misteryo kag mahidaeton nga mga butang—nga nagadala sang kalipay, nga nagadala sang kabuhi nga wala’y katapusan” (Doctrine and Covenants 42:61).

Pangagda sa Pag-akto

Paano ninyo mapadako ang kalipay nga inyo masalapuan sa inyo kabuhi paagi sa ministering?

© 2019 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, April 2019. Hiligaynon. 15765 861