Panangaramid a NARAG-O ITI Ministering

Ti panagserbi nga addaan iti ayat ket mangisangbay nga agpada iti rag-o iti mangmangted ken ti umaw-awat.

No dadduma ti panagsapsapultayo iti ragsak iti daytoy a biag ket kasla maipada iti panagtaray iti maysa a treadmill. Agtultuloytayo iti panagtaray ngem mariknatayo a saantayo pay a nakadanon iti sadino man. Para iti dadduma, ti kapanunotan maipapan iti panagserbi iti dadduma ket panangrikna laeng a kasla panangnayon iti ad-adu pay nga aramiden.

Ngem tarigagayan ti Nailangitan nga Amatayo a padasentayo ti rag-o ket imbagana kadatayo “ti panggep dagiti tao, ket tapno maaddaanda iti ragsak” (2 Nephi 2:25). Ket insuro ti Mangisalakan a ti panagserbi kadagiti dadduma ket napateg a paset iti no kasano a maisangbaytayo iti rag-o iti biagtayo ken iti biag dagiti dadduma.

Ania ti Rag-o?

Ti rag-o ket kaipapananna ti “maysa a panagrikna iti dakkel a ragsak.”¹ Nangted dagiti propeta iti ud-udina nga aldaw iti pannakailawlawag ti no sadino ti nagtaudan ti rag-o ken no kasano a masarakan daytoy. “Ti rag-o a mariknatayo ket saan nga agpannuray kadagiti pasamak iti biagtayo no di ketdi agpannuray iti panangipamaysatayo iti biagtayo,” kinuna ni Presidente Russell M. Nelson. “… Aggapu ti rag-o manipud ken gapu ken ni [Jesucristo]. Isu ti pagtaudan ti amin a rag-o.”²

Mangisangbay iti Rag-o ti Ministering

Idi nakiranud ni Lehi iti bunga ti kayo ti biag, napno ti kararuana “iti nalaus a ragsak” (1 Nephi 8:12). Ti umuna a tarigagayna ket mangibinglay iti daytoy a bunga kadagiti ipatpategna.

Ti kinatallugodtayo nga agserbi kadagiti dadduma ket makaisangbay iti daytoy a kita ti rag-o kadatayo ken kadakuada. Insuro ti Mangisalakan kadagiti disipulona a ti bunga nga isangbaytayo no naisilpotayo Kenkuana ket makatulong a mangyeg kadatayo iti pakabuklan ti rag-o (kitaen iti Juan 15:1–11). Ti panangitrabaho iti aramidna babaen ti panagserbi ken panangikarigatan a mangyasideg kadagiti dadduma Kenkuana ket mabalin a naragsak a padas (kitaen iti Lucas 15:7; Alma 29:9; Doktrina ken Katulagan 18:16; 50:22). Mapadasantayo daytoy a rag-o uray no maipasangotayo iti panagsusupiat ken panagsagaba (kitaen iti 2 Taga Corinto 7:4; Taga Colosas 1:11).

Impakita ti Mangisalakan kadatayo ti naan-anay a pagwadan a maysa kadagiti kaindaklanan a pagtaudan ti pudno a rag-o iti mortal a biag ket masarakan babaen iti serbisio. No agministertayo kadagiti kakabsattayo a lallaki ken babbai kas iti Mangisalakan, nga addaan iti asi ken ayat iti puspusotayo, mapadasantayo ti rag-o a nangnangruna pay ngem iti simple a ragsak.

“No awatentayo ti [ministering] nga addaan iti natallugod a puso, as-asidegtayonto … iti panangbalin a tattao iti Zion ken mariknatayonto ti aglaplapusanan a rag-o kadagiti tao a tinulongantayo iti dana ti kinadisipulo,” insuro ni Sister Jean B. Bingham, Relief Society General President.³

Kasano a Maaramidtayo a Naragrag-o ti Ministering?

Adu dagiti wagas a pakaisangbayan ti dakdakkel a rag-o iti ministering. Adtoy ti sumagmamano a kapanunotan:

Maawatam ti panggepmo iti ministering. Adu dagiti gapu iti panag-minister. Kangrunaanna, nasken a maibatog dagiti panagkagumaantayo kadagiti panggep ti Dios “ti mangipatungpal iti saan nga ipapatay ken agnanayon a biag ti tao” (Moises 1:39). No awatentayo ti awis ni Presidente Russell M. Nelson a mangtulong kadagiti dadduma iti dana ti katulagan, makasaraktayo iti rag-o iti pannakiraman iti aramid ti Dios.⁴ (Para iti ad-adu pay maipapan iti panggep ti ministering, kitaen iti “Dagiti Pagbatayan iti Ministering: Ti Paggep a Mangbalbaliwto iti Ministeringtayo,” iti Enero 2018 Liahona.)
Aramidenyo ti ministering maipapan kadagiti tao saan a dagiti aramiden. Masansan nga impalagip ni Presidente Thomas S. Monson kadatayo: “Saanyo nga ipalubos ti maysa a problema a masolbar nga agbalin a napatpateg ngem iti maysa a tao a maayat.”⁵ Ti ministering ket maipapan iti panagayat kadagiti tao, saan a maipapan kadagiti banag nga aramiden. No dumakkel ti panagayattayo a kas iti inaramid ti Mangisalakan, ad-adda a nakasaganatayo iti rag-o a sumangbay manipud iti panagserbi kadagiti dadduma.
Aramidenyo a simple ti ministering. Ibaga kadatayo ni Presidente M. Russell Ballard, Agak-akem a Presidente ti Korum dagiti Sangapulo-ket-dua nga Apostol: “Maipatungpal dagiti naindaklan a banag babaen dagiti gagangay ken babassit a banag. … Dagiti babassit ken gagangay nga aramid ti kinaimbag ken serbisio ket agkakappengto iti maysa a biag a napnuan iti ayat para iti Nailangitan nga Ama, kinapasnek iti aramid ni Apo Jesucristo, ken maysa a kaipapanan ti kappia ken rag-o iti tunggal kanito a tulongantayo ti tunggal maysa.”⁶
Ikkatenyo ti stress manipud iti ministering. Saanyo a pagrebbengan ti mangitrabaho iti pannakaisalakan ti maysa a tao. Dayta ket nagbaetan ti tao ken ti Apo. Ti pagrebbengantayo ket ayaten ida ken tulongan ida nga agsubli ken ni Jesucristo, nga Isu ti Mangisalakanda.

Saanyo nga Itantan ti Rag-o ti Panagserbi

No dadduma agkedked dagiti tao nga agkiddaw iti kasapulan a tulong, isu a ti panangidiaya iti serbisiotayo ket mabalin a dayta laeng ti kasapulanda. Ngem ti panangipapilit iti bagitayo kadagiti tao ket saan met a sungbat. Ti panangdawat iti permiso sakbay ti ministering ket nasayaat nga ideya.

Imbaga ni Elder Dieter F. Uchtdorf ti Korum dagiti Sangapulo-ket-dua nga Apostol maipapan iti awan asawana nga ina a nagsakit iti tuko [chicken pox]—ket kalpasanna nagtuko met dagiti annakna. Ti gagangay a nadalimanek ken nadalus a balay ket nagbalin a nawara ken narugit. Sangabunton dagiti maugasan a panganan ken malabaan.

Iti apagkanito idi mariknana ti nalaus a pannakaupay, nagtuktok iti ridawna dagiti kakabsat iti Relief Society. Saanda nga imbaga ti, “Ipakaammoyo laeng kadakami no adda maitulongmi.” Idi makitada ti kasasaad, dagus a nagtignayda.

“Nagdalusda, nangisangbayda iti lawag ken silnag iti pagtaengan, ket tinawaganda ti maysa a gayyem tapno mangyeg kadagiti sumagmamano a kasapulan unay a grocery. Idi iti kamaudiananna naileppasda ti aramidda ken nagpakadada, pinanawanda dayta ubing nga ina nga aglulua—dagiti lua ti panagyaman ken ayat.”⁷

Agpada a nakarikna iti bara ti rag-o dagiti mangted ken ti umawat.

Mangpadur-as iti Rag-o iti Biagyo

Ti ad-adda a rag-o, talna, ken pannakapnek a mapadur-astayo iti biagtayo, ad-adda met a kabaelantayonto ti mangibinglay kadagiti dadduma kabayatan ti panag-ministertayo. Umay ti rag-o babaen ti Espiritu Santo (kitaen iti Taga Galacia 5:22 ken Doktrina ken Katulagan 11:13). Maysa daytoy a banag a maikararagantayo (kitaen iti Doktrina ken Katulagan 136:29) ken mayawistayo iti biagtayo. Adtoy ti sumagmamano nga ideya para iti panangpadur-as iti rag-o iti bukodtayo a biag.

Bilangenyo dagiti paraburyo. Bayat ti panangamirisyo iti biagyo, isuratyo iti journalyo dagiti banag a nangparaburan ti Dios kadakayo.⁸ Imutektekam ti nasayaat iti amin nga aglawlawyo.⁹ Mangikasokayo iti no ania ti makalapped iti panangriknayo iti rag-o ket isuratyo dagiti wagas a mangresolba wenno mangawat a nasaysayaat kadagitoy. Iti panawen ti Paskua ti Panagungar, maaddaan iti oras a mangsukisok iti dakdakkel a pakainaigan iti Mangisalakan (kitaen iti Doktrina ken Katulagan 101:36).
Sanayenyo ti kinamananglaglagip. Nalaklaka a masarakanyo ti rag-o kadagiti kanito ti naulimek a panagutob.¹⁰ Denggenyo a nasayaat ti no ania ti isangbay kadakayo ti rag-o (kitaen iti 1 Cronicas 16:15). Ti panangisardeng a panangbubos iti oras manipud iti media ket mabalin a kasapulan no dadduma iti panangsanay iti kinamananglaglagip.¹¹
Liklikanyo ti panangikumpara iti bagiyo. Nakuna a ti panangikumpara ket mannanakaw ti rag-o. Imbalaag ni Pablo nga isuda “no agririnnukodda ket agpipinnadisda nga is-isuda, dida maawatan” (2 Taga Corinto 10:12).
Agkagumaankayo a manggun-od iti bukod a paltiing. Insuro ti Mangisalakan: “No agdawatkayo, umawatkayo iti paltiing iti kada paltiing, pagsiriban iti kada pagsiriban, tapno maammuanyo dagiti datdatlag ken makapatalingenngen a banag—a mangyeg iti ragsak, a mangyeg iti agnanayon a biag” (Doktrina ken Katulagan 42:61).

Awis nga Agtignay

Kasano a mapadakkelyo ti rag-o a masarakanyo iti biagyo babaen ti ministering?

© 2019 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, April 2019. Ilokano. 15765 864