« Haere mai, ’a pe’e mai iā’u »
Tē ani manihini mai nei Iesu Mesia ia tātou ’ia rave i te ’ē’a nō te fafaura’a nō te ho’i i pīha’i iho i tō tātou nā Metua i te ao ra ’e ’ia pārahi i pīha’i iho i te feiā tā tātou i here.
E au mau taea’e ’e e au mau tuahine here, tē ’oa’oa nei au ’e tā’u vahine o Wendy i te taera’a mai i rotopū ia ’outou i teie sābati po’ipo’i. E rave rahi mau ’ohipa i tupu mai te taime o tā tātou ’āmuira’a rahi i ma’iri a’e nei. ’Ua ha’amo’ahia te mau hiero ’āpī i Concepción, Chili ; Barranquilla, Colombia ’e i Roma, Italia. ’Ua fāri’i tātou i te nini’ira’a rahi o te Vārua i roto i te reira mau ’ohipa mo’a.
Tē ha’apoupou nei au i te mau vahine e rave rahi (’e te mau tāne) tei tai’o i te Buka a Moromona ’aita i maoro a’e nei ’e tei ’ite i te ’oa’oa ’e i te mau tao’a hunahia. ’Ua fa’auruhia vau nā roto i te mau parau fa’a’ite nō ni’a i te mau temeio i fāri’ihia.
Tē fa’ahiahia nei au i te feiā ’āpī tamāroa 11 matahiti, e diakono i teienei, ’o tē ’ōpere nei ma te ti’amā i te ’ōro’a mo’a i te mau sābati ato’a. Tē haere nei rātou i te hiero ’e te feiā ’āpī tamāhine 11 matahiti, ’o tē ha’api’i nei ’e ’o tē tāvini nei ma te rū i teienei. Tē ha’api’i nei te feiā ’āpī tamāroa ’e te feiā ’āpī tamāhine i te mau parau mau o te ’evanelia ma te māramarama ’e te ti’aturi pāpū.
Tē ’oa’oa nei au i te mau tamari’i ’e i te feiā ’āpī e tauturu nei i te ha’api’ira’a i te ’evanelia i roto i tō rātou ’utuāfare nā roto i te ’ohipara’a ’e tō rātou mau metua nō te pe’e i te fa’anahora’a ha’api’ira’a fa’atumuhia i ni’a i te ’utuāfare, pāturuhia e te ’Ēkālesia.
’Ua fāri’i māua i teie hōho’a nō Blake, e maha tōna matahiti, i te mahana mā’a i te po’ipo’i roa, ’ua rave mai ’oia i te hō’ē buka nā te ’Ēkālesia ’e ’ua tuo a’era, « hina’aro vau e fa’a’amu i tō’u vārua ! »
Blake, tē ’oa’oa nei mātou ia ’oe ’e ia vetahi ’ē ’o tē mā’iti nei ’ia fa’a’amu i tō rātou vārua nā roto i te poupoura’a i te mau parau mau o te ’evanelia a Iesu Mesia i fa’aho’i-fa’ahou-hia mai. ’E tē ’oa’oa nei tātou ’ia ’ite ē, e rave rahi ’o tē fāri’i nei i te mana o te Atua i roto i tō rātou orara’a ’a ha’amori ai rātou ’e ’a tāvini ai i roto i te hiero.
E rave rahi ’outou tei ’ite ē, ’ua tupu te hō’ē fa’ata’a-’ē-ra’a marū i roto i tō māua ’utuāfare a toru ’āva’e i ma’iri a’e nei nā roto i te fa’aru’era’a mai tā māua tamāhine o Wendy i teie orara’a tāhuti nei. I te mahana hope’a o tāna arora’a i te ma’i māriri ’aita’ata, ’ua fana’o vau i te hō’ē ’āparaura’a hope’a i rotopū i te metua tāne ’e te tamāhine.
’Ua tāpe’a vau i tōna nā rima ’e ’ua parau atu vau iāna i tō’u here rahi iāna ’e tō’u māuruuru rahi i te rirora’a ’ei metua tāne nōna. ’Ua parau atu vau : « ’Ua fa’aipoipo ’oe i roto i te hiero ’e ’ua fa’atura maita’i ’oe i tā ’oe mau fafaura’a. ’Ua fāri’i ’oe ’e tā ’oe tāne fa’aipoipo e hitu tamari’i i roto i tō ’ōrua fare ’e ’ua fa’a’amu ia rātou ’ia riro ’ei mau pipi nā Iesu Mesia, ’ei mau melo ha’apa’o nō te ’Ēkālesia, ’e ’ei mau tino huira’atira tauturu. ’E ’ua mā’iti rātou i te mau hoa fa’aipoipo mai te reira ato’a te huru. Tē ha’apeu rahi nei tō ’oe pāpā ia ’oe. ’Ua hōro’a mai ’oe i te ’oa’oa rahi i roto iā’u ! »
’Ua pāhono marū noa mai ’oia, « māuruuru e pāpā ».
E taime marū ’e te ’oto nō mātou. I roto i terā roara’a e 67 matahiti tōna, ’ua ha’a ’āmui mātou, ’ua hīmene ’āmui, ’e ’ua fa’ahe’e ’āmui pinepine nā ni’a i te hiona. Terā rā i taua ahiahi ra, ’ua paraparau mātou i te mau mea faufa’a atu, mai te mau fafaura’a, te mau ’ōro’a, te ha’apa’o, te fa’aro’o, te ha’apa’o-maita’i-ra’a i te tahi, te ’utuāfare, te here ’e te ora mure ’ore.
Tē mihi rahi nei māua i tā māua tamāhine. Terā rā, aua’e te ’evanelia a Iesu Mesia i fa’aho’i-fa’ahou-hia mai, ’aita māua e ha’ape’ape’a nei nōna. Mai te mea ē, e fa’atura tāmau noa māua i tā māua mau fafaura’a i te Atua, e ora noa māua ma te tīa’i māite i te taime e pārahi fa’ahou ai māua i pīha’i iho iāna. I teie rā taime, tē tāvini nei māua i te Fatu i’ō nei, ’e tē tāvini ra ’oia iāna i reira—i roto i te pārasaido.1
’Ua māta’ita’i iho nei māua tō’u hoa here ia Pāradaiso i te ’ōmuara’a o teie matahiti—te ’oire o Paradise, i Karifonia ïa. ’Ua tupu teie tere tō māua i raro mai i te 40 hora i muri a’e i te fa’aru’era’a mai tā māua tamāhine i teie ao. ’Ua pāturu te feiā mo’a nō Chico California Stake ia māua nei, e tae noa atu ia Elder Kevin W. Pearson ’e tāna vahine, ’o June. ’Ua ’ite mātou i tō rātou fa’aro’o rahi, tā rātou aupurura’a, ’e te mau temeio tei tupu i roto tō rātou pau rahi nā roto i te hō’ē ’ati auahi ’aita i ’itehia a’e nei i roto i te ’ā’amu nō Karifonia.
I reira, ’ua paraparau maoro mātou i te hō’ē muto’i, ’o John, ’oia te hō’ē o te mau ta’ata itoito mātāmua e rave rahi tei pāhono. ’Ua ha’amana’o ’oia i te pōiri ta’ota’o tei pou mai i ni’a ia Paradise i te 8 nō Novema 2018, ’a tere ai te auahi nā roto i te ’oire, ma te ha’amou i te mau mea ato’a mai te hō’ē ’ati rahi, ma te vaiiho noa mai i te rehu ’e te mau pou ha’apūpūra’a auahi.
15 hora te maoro tō John terera’a nā roto i te hō’ē pōiri ta’ota’o rahi ma te ’ape i te mau ohe auahi fifi, ’a tauturu ai ’oia i terā ta’ata ’e terā ta’ata, terā ’utuāfare ’e terā ’utuāfare ’ia ora rātou—noa atu e ro’ohia ’oia i te pohe. Terā rā i roto i taua ’ohipa fifi ra, te mea i mata’u-rahi-hia e John ’o tāna ïa uira’a fifi roa : « Tei hea tō’u ’utuāfare ? » I muri a’e i te rahira’a hora ri’ari’a o te mana’o pe’ape’a, i te pae hope’a ’ua fa’a’itehia mai iāna ē, ’ua fa’arevahia rātou ma te fifi ’ore.
’Ua tūra’i teie ’ā’amu o te mana’o pe’ape’a o John nō tōna ’utuāfare iā’u ’ia paraparau i teie mahana ia ’outou ’o te riro i te ui ato’a ’ia fātata mai te hope’a o tō ’outou orara’a tāhuti nei, « Tei hea tō’u ’utuāfare ? » I taua mahana ra, ’ia fa’aoti ana’e ’outou i tō ’outou tāmatara’a tāhuti nei ’e ’a tomo atu ai i roto i te ao vārua, e fa’aruru atu ’outou i taua uira’a teimaha ra : « Tei hea tō’u ’utuāfare ? »
Tē ha’api’i nei Iesu Mesia i te ’ē’a nō te ho’i atu i tō tātou fare mure ’ore. ’Ua māramarama maita’i a’e ’oia i te fa’anahora’a a tō tātou Metua nō te tupura’a mure ’ore, hau atu i te tahi atu o tātou. Inaha ho’i, o ’oia te ’ōfa’i tua nō te reira. ’O ’oia tō tātou Tāra’ehara, tō tātou Ta’ata fa’aora, ’e tō tātou Fa’aora.
Mai te taime ’a ti’avaruhia ai o Adamu ’e o Eva i rāpae i te ō i Edene, ’ua pūpū o Iesu Mesia i tōna rima pūai nō te tauturu i te feiā ato’a e mā’iti i te pe’e iāna. Tē fa’a’ite tāmau noa nei te mau pāpa’ira’a mo’a ē, noa atu te huru o te mau hara e ravehia ’e te mau huru ta’ata ato’a, e vai mahora noa tōna nā rima.2
’Oia mau, e tītau te vārua i roto ia tātou tāta’itahi ’ia vai noa te here o te ’utuāfare e a muri noa atu. Tē tāmau noa nei te mau hīmene nō te here i te fa’atupu i te ti’aturira’a hape, ’o tē here ana’e te hina’arohia nō te vai hō’ēra’a e a muri noa atu. ’E tē ti’aturi hape nei te tahi pae ē, tē hōro’a nei te ti’afa’ahoura’a o Iesu Mesia i te hō’ē fafaura’a ē, e pārahi te mau ta’ata ato’a i pīha’i iho i tei herehia e rātou i muri a’e i te pohe.
Parau mau, ’ua ha’apāpū maita’i mai te Fa’aora ē, nā roto i tōna ti’afa’ahoura’a e ti’afa’ahou mau te ta’ata ato’a i ora nā, ’e e ora ho’i e a muri noa atu,3 terā rā, e mau mea rahi atu ’o te tītauhia ia tātou mai te mea ē, e hina’aro tātou e fāri’i i te ha’amaita’ira’a teitei o te fa’ateiteira’a. E ’ohipa te fa’aorara’a nā te ta’ata tāta’itahi, ’āre’a te fa’ateiteira’a ra, e ’ohipa ïa nā te ’utuāfare.
’A fa’aro’o mai na i teie mau parau tei parauhia e te Fatu o Iesu Mesia i tōna peropheta : « Te mau fafaura’a ato’a, te mau fa’aaura’a, te mau ru’uru’ura’a, te mau tārahu, te mau tapura’a, te mau euhe, te mau ravera’a ’ohipa, te mau tū’atira’a, te mau ’āmuira’a, ’e ’aore raā, te mau ti’aturira’a, ’o te ’ore e fa’aotihia ’e e fa’aōhia ’e i tā’atihia atu ho’i e te Vārua Mo’a nō te fafaura’a, ’aore ho’i e faufa’a, ’aore e ti’a, ’e ’aore ho’i e mana i roto ’e i muri a’e ho’i i te ti’afa’ahoura’a mai tē pohe mai ra ; nō te mea e hope’a tō te mau fa’aaura’a ’o tei ’ore i fa’aotihia mai teie te huru ’ia pohe atu te ta’ata ra ».4
Nō reira, e aha te tītauhia i te hō’ē ’utuāfare nō te fa’ateiteira’a e a muri noa atu ? E fāri’i tātou i te reira ha’amaita’ira’a nā roto i te ravera’a i te mau fafaura’a ’e te Atua, te ha’apa’ora’a i te reira mau fafaura’a, ’e te fāri’ira’a i te mau ’ōro’a e tītauhia.
E parau mau te reira mai te ’ōmuara’a mai o te tau. Adamu ’e ’o Eva, Noa ’e tāna vahine, Aberahama ’e ’o Sara, Lehi ’e ’o Saria, ’e pauroa te tahi atu mau pipi ha’apa’o nā Iesu Mesia—mai te hāmanira’ahia mai te ao nei—’ua hope pā’āto’a rātou i te rave i taua mau fafaura’a ato’a ra ’e te Atua. ’Ua fāri’i ato’a rātou i te reira mau ’ōro’a tā tātou, te mau melo nō te ’Ēkālesia tei fa’aho’ihia mai a te Fatu i teie mahana i rave : Teie mau fafaura’a tā tātou i fāri’i i te bāpetizora’a ’e i roto i te hiero.
Tē ani manihini mai nei te Fa’aora i te mau ta’ata ato’a ’ia pe’e iāna i roto i te mau pape o te bāpetizora’a ’e, ’ia tae i te taime, ’ia rave i te tahi atu mau fafaura’a ’e te Atua i roto i te hiero ’e ’ia fāri’i ’e ’ia ha’apa’o i taua mau ’ōro’a faufa’a ra. Tītauhia teie mau mea ato’a mai te mea ē, e hina’aro tātou ’ia fa’ateiteihia ’e tō tātou mau ’utuāfare ’e i pīha’i i te Atua e a muri noa atu.
Tō’u pe’ape’a rahi maori rā, e rave rahi ta’ata tā’u e here nei, e fa’ahiahia nei ’e e fa’atura nei, ’o tē pāto’i nei i tāna ani-manihini-ra’a. Tē tau’a ’ore nei rātou i te mau tāparura’a a Iesu Mesia ’ia ani mai ’oia ē, « Haere mai, ’a pe’e mai iā’u ».5
’Ua ’ite au ē, nō te aha te Atua i ’oto ai.6 Tē ’oto ato’a nei au nō taua mau huru hoa ra ’e te mau feti’i. E mau tāne ’e e mau vahine fa’ahiahia rātou, tei ha’apa’o i tō rātou ’utuāfare ’e tā rātou mau hōpoi’a i te pae tīvira. ’Ua hōro’a pipiri ’ore noa rātou i tō rātou taime, tō rātou itoito ’e tā rātou mau faufa’a. ’E ’ua maita’i a’e te ao nei nā roto i tā rātou mau tauto’ora’a. Terā rā ’ua mā’iti rātou ’eiaha e rave i te mau fafaura’a ’e te Atua. ’Aita rātou i fāri’i i te mau ’ōro’a ’o tē fa’ateitei ia rātou ’e tō rātou ’utuāfare ’e ’o te tā’amu ’āmui ia rātou e a muri noa atu.7
’Auē tō’u hina’aro e fārerei ia rātou ’e e ani manihini ia rātou ’ia feruri pāpū i te mau ture a te Fatu. ’Ua uiui noa vau ē, e aha te ti’a iā’u ’ia parau, ’ia ti’a ia rātou ’ia ’ite i te here rahi o te Fa’aora ia rātou, ’ia ’ite i tō’u here rahi ia rātou, ’e ’ia ’ite i te « ’īra’a o te ’oa’oa » e fāri’ihia e te mau vahine ’e te mau tāne e ha’apa’o i te fafaura’a.8
E ti’a ia rātou ’ia māramarama ē, noa atu ē, tē vai ra hō’ē vāhi nō rātou i muri a’e ra—i pīha’i iho i te mau tāne ’e te mau vahine nehenehe tei mā’iti ato’a ’eiaha e rave i te mau fafaura’a ’e te Atua—e ’ere te reira te vāhi i reira te mau ’utuāfare e tāhō’ēhia ai ’e e hōro’ahia ai te ha’amaita’ira’a ’ia ora ’e ’ia haere i mua e a muri noa atu. E ’ere te reira te bāsileia i reira rātou e fāri’i ai i te ’īra’a o te ’oa’oa—o te haerera’a hope’a ’ore i mua ’e te ’oa’oa.9 E tae mai teie mau ha’amaita’ira’a teitei nā roto ana’e i te orara’a i roto i te hō’ē ao tīrētiēra fa’ateiteihia i pīha’i iho i te Atua, tō tātou Metua mure ’ore ; tāna Tamaiti, o Iesu Mesia; ’e tō tātou mau melo nō te ’utuāfare nehenehe, te ti’amā, ’e te maita’i.
Tē hina’aro nei au e parau i tō’u mau hoa ’ōti’ati’a :
« I roto i teie orara’a, ’aita roa atu ’outou e fa’anaho nō te ti’ara’a piti i roto i te mau huru mea ato’a. Terā rā, nā roto i tō ’outou pāto’ira’a ’ia fāri’i hope roa i te ’evanelia a Iesu Mesia i fa’aho’ihia mai, tē mā’iti ra ïa ’outou ’ia fa’anaho nō te ti’ara’a piti.
« ’Ua parau te Fa’aora ē, ‘e rave rahi te pārahira’a i te fare o tā’u Metua ra.’10 Terā rā, mai te mea ē, e mā’iti ’outou ’eiaha e rave i te mau fafaura’a ’e te Atua, tē fa’anaho ra ïa ’outou nō te hō’ē tāpo’i fare iti ha’iha’i roa i ni’a a’e i tō ’outou upo’o e a muri noa atu ».
Tē tāparu nei au i tō’u mau hoa ’ōti’ati’a ma te parau atu ē :
« ’A nīni’i i tō ’outou ’ā’au i te Atua ra. ’A ani iāna e parau mau ānei teie mau mea. ’A rave i te taime nō te tuatāpapa i tāna mau parau. ’A tuatāpapa pāpū ! Mai te mea ē, ’ua here mau ’outou i tō ’outou ’utuāfare ’e mai te mea ē, e hina’aro ’outou ’ia fa’ateiteihia ’outou ’e o rātou e a muri noa atu, ’a aufau i te ho’o i teienei—nā roto i te tuatāpapara’a pāpū ’e te pure tu’utu’u ’ore—nō te ’ite i teie mau parau mau mure ’ore ’e i muri iho ’a ha’apa’o i te reira.
« Mai te mea ē, ’aita ’outou i pāpū i te ti’aturi i te Atua, ’a ha’amata i reira. ’Ia ’ite mai ’outou ē, ’aita ana’e te hō’ē ta’ata i fāri’i i te mau ’itera’a nō ni’a i te Atua, e tupu te fē’a’a i roto iāna nō te ’ite ē, tē vai mau ra ānei te Atua. Nō reira, ’a tu’u ia ’outou i roto i te hō’ē ti’ara’a nō te ha’amata i te fāri’i i te mau ’itera’a nō ni’a iāna. Fa’aha’eha’a ia ’outou iho. ’A pure nō te fāri’i i te mata nō te ’ite i te rima o te Atua i roto i tō ’outou orara’a ’e i roto i te ao ’ati a’e ia ’outou. ’A ani iāna ’ia parau mai ia ’outou ē, tei reira mau ānei ’oia—’ua ’ite ānei ’oia ia ’outou. ’A ani iāna e aha tōna mana’o nō ni’a ia ’outou. ’E i reira, ’a fa’aro’o ».
Tē vai ra tō’u hō’ē hoa rahi e mea iti roa tōna mau ’itera’a nō ni’a i te Atua. E hina’aro rahi rā tōna ’ia pārahi i pīha’i iho i tāna vahine i pohe. ’Ua ani mai ra ’oia iā’u ’ia tauturu iāna. ’Ua fa’aitoito vau iāna ’ia fārerei i tō tātou mau misiōnare ’ia māramarama ’oia i te parau ha’api’ira’a a te Mesia ’e ’ia ha’api’i mai i te mau fafaura’a, te mau ’ōro’a ’e te mau ha’amaita’ira’a o te ’evanelia.
ʼE ʼua nā reira ʼoia. Terā rā ’ua feruri ’oia ē, e tītau te ha’api’ira’a tā rātou i ha’api’i iāna, ’ia rave i te mau tauira’a rahi roa i roto i tōna orara’a. ’Ua parau ’oia, « e mea fifi roa nō’u te reira mau fa’auera’a ’e te mau fafaura’a. Pāpū ē, e’ita ato’a tā’u e nehenehe e aufau i te tuha’a ’ahuru, ’e ’aita tō’u e taime nō te tāvini i roto i te ’Ēkālesia ». I muri iho ’ua ui mai ’oia iā’u ē, « ’ia pohe ana’e au, ’a rave i te ’ohipa hiero e tītauhia nō tā’u vahine ’e nō’u ’ia nehenehe ia māua ’ia ’āmui fa’ahou mai ».
Aua’e, e ’ere au te ha’avā nō teie ta’ata. Tē ui nei rā tō’u mana’o i te maita’i o te ’ohipa hiero ’ei mono nō te hō’ē ta’ata tei fāri’i i te rāve’a ’ia bāpetizohia i roto i teie orara’a—’ia fa’atōro’ahia i te ’autahu’ara’a ’e ’ia fāri’i i te mau ha’amaita’ira’a o te hiero ’a vai ai ’oia i te tāhuti nei—terā rā ’ua rave i te fa’aotira’a pāpū e pāto’i i taua ha’api’ira’a ra.
E au mau taea’e ’e e au mau tuahine here ē, tē ani manihini mai nei Iesu Mesia ia tātou ’ia rave i te ’ē’a nō te fafaura’a nō te ho’i i pīha’i iho i tō tātou nā Metua i te ao ra ’e ia pārahi i pīha’i iho i te feiā tā tātou i here. Tē ani manihini mai nei ’oia ia tātou ’ia « haere mai, ’a pe’e mai iā’u ».
I teienei, ’ei Peresideni nō te ’Ēkālesia, tē tāparu nei au ia ’outou tei fa’aātea ’ē ia ’outou i te ’Ēkālesia ’e ia ’outou tei ’ore ā i ’imi pāpū ’ia ’ite ē, ’ua fa’aho’ihia mai te ’Ēkālesia a te Fa’aora. ’A rave i te ’ohipa pae vārua nō te ’ite nō ’outou iho, ’e ’a rave i te reira i teienei. Tē poto ra te taime.
Tē fa’a’ite pāpū nei au ē, tē ora nei te Atua ! ’O Iesu te Mesia. ’Ua fa’aho’ihia mai tāna ’Ēkālesia ’e te ’īra’a o tāna ’evanelia nō te ha’amaita’i i tō tātou orara’a i te ’oa’oa i teienei ’e a muri atu. Tē fa’a’ite pāpū nei au i te reira nā roto i te i’oa o Iesu Mesia, ’āmene.