Parau ’ōpanira’a
E mata nā tātou i te ha’amo’a ’e i te ha’amo’a fa’ahou i tō tātou orara’a nō te tāvinira’a i te Atua ’e i tāna mau tamari’i—i nā pae e piti o te pāruru.
E au mau taea’e, e au mau tuahine here, ’ua tae tātou i te hope’a o teie ’āmuira’a fa’ahiahia, tē ha’amāuruuru nei tātou i te Fatu nō tāna fa’aurura’a ’e tāna pārurura’a. ’Ua ha’api’i mai ’e ’ua fa’ateitei te mau parau poro’i ia tātou.
’Aita i hōro’ahia te mau parau tumu i te feiā a’o. ’Ua pure rātou tāta’itahi nō te ani i te fa’aurura’a i roto i te fa’aineinera’a i tā rātou mau parau poro’i. Nō’u nei, e mea fa’ahiahia mau ’ia hi’o ē, ’ua tū’ati maita’i te reira mau tumu parau i te tahi ’e te tahi. ’A tuatāpapa ai ’outou i te reira, ’a ’imi ’ia ’ite mai ē, e aha tā te Fatu e tāmata nei i te ha’api’i ia ’outou nā roto i tōna mau tāvini.
E mea hanahana roa te mau hīmene. E māuruuru rahi tō tātou i te feiā fa’ata’i ’upa’upa e rave rahi tei tāhō’ē i tō rātou mau tārēni nō te hōpoi mai i te Vārua o te Fatu i roto i te tuha’a purera’a tāta’itahi. ’E ’ua ha’amaita’i ’oia i te mau pure ’e i te mau ’āmuira’a i roto i te mau tuha’a purera’a ato’a. ’Oia mau, ’ua riro fa’ahou te ’āmuira’a ’ei poupoura’a i te pae vārua nā tātou pā’āto’a.
Tē ti’aturi nei mātou ’e tē pure nei ’ia riro mai te nohora’a o te melo tāta’itahi ’ei vāhi mau nō te fa’aro’o, i reira ho’i te Vārua o te Fatu e pārahi ai. Noa atu te mārōra’a ’ati a’e ia tātou, e nehenehe te fare o te hō’ē ta’ata e riro mai ’ei vāhi nō te ra’i ra, i reira te tuatāpapara’a, te pure, ’e te fa’aro’o e tū’ati ai i te here. E nehenehe mau tātou e riro mai ’ei mau pipi nā te Fatu, ma te ti’a i ni’a ’e ’ia paraparau nōna i te mau vāhi ato’a tei reira tātou.
E ti’a i te fā a te Atua ’ia riro ato’a ’ei fā nā tātou. Tē hina’aro nei ’oia i tāna mau tamari’i ’ia mā’iti e ho’i iāna ra, ma te ineine, ma te ’ite, ma te fāri’i i te ’ōro’a hiero, ma te tā’atihia, ’e ma te ha’apa’o i te mau fafaura’a i ravehia i roto i te mau hiero mo’a.
162 hiero ha’amo’ahia tā tātou i teienei. Te mau hiero ’āpī roa a’e tē ti’a nei ïa ’ei mau tāpa’o ha’amana’ora’a i te fa’aro’o ’e i te hi’ora’a ātea o tō tātou mau pionie. Te hiero tāta’itahi tei patuhia e rātou, e mea nā roto ïa i tā rātou iho fa’atūsiara’a ’e te tauto’ora’a rahi. Tē ti’a tāta’itahi nei te reira mai te hō’ē piru nehenehe i roto i te hei o te ’ohipa pionie.
E hōpoi’a rahi nā tātou i te ’atu’atura’a i te reira. Nō reira, fātata te taime e tātā’ihia ai teie mau hiero pionie, ma te fa’a’āpī, ’e nō te tahi pae, te hō’ē fa’a’āpīra’a rahi. E ’imihia te mau rāve’a pāpū nō te fa’aherehere i te ’ā’amu o te hiero tāta’itahi i te vāhi e nehenehe, ma te fa’aherehere i te nehenehe fa’auru ’e te hāmanira’a ta’a ’ē a te mau u’i tei mo’e e rā ’ē te tau.
’Ua ’īritihia te mau ha’apāpūra’a nō te hiero nō St. George Utaha. Te mau fa’anahora’a nō te fa’a’āpīra’a i te hiero nō Roto Miti, nō Temple Square, ’e te mau vāhi tāpiri mai i te fare nō te piha tōro’a o te ’Ēkālesia, e fa’aarahia ïa te reira i te mahana pae 19 nō ’Ēperēra 2019.
E fa’a’āpī-ato’a-hia te hiero nō Manti ’e nō Logan i te mau matahiti e haere mai nei. ’Ia ineine ana’e te reira mau fa’anahora’a, e fa’aara-ato’a-hia ïa.
E tītau teie ’ohipa ’ia tāpirihia te hiero tāta’itahi nō te hō’ē tau. E nehenehe te mau melo e tāmau noa i te fāna’o i te ha’amorira’a ’e te tāvinira’a hiero i roto i te tahi atu mau hiero. ’Ia oti ana’e te hō’ē ’ōpuara’a, e ha’amo’a-fa’ahou-hia te hiero tāta’itahi.
E te mau taea’e ’e te mau tuahine, tē fa’ariro nei tātou i te hō’ē hiero ’ei fare mo’a roa a’e i roto i te ’Ēkālesia. ’Ia fa’aara ana’e tātou i te mau fa’anahora’a nō te hāmani i te hō’ē hiero ’āpī e riro mai te reira ’ei tuha’a nō tō tātou ’ā’amu mo’a. I teienei, ’a fa’aro’o maita’i mai ma te fa’atura. Mai te mea ē, e fa’aara atu vau i te hō’ē hiero i roto i te hō’ē vāhi ta’a ’ē roa nō ’outou, tē ani atu nei au ia ’outou ’ia taupe noa tō ’outou upo’o i raro ’e te hō’ē pure ha’amāuruuru muhu ’ore i roto i tō ’outou ’ā’au. ’Aita tātou e hina’aro i te vaha rahi o te ha’afifi i te nātura mo’a o teie ’āmuira’a ’e o te mau hiero o te Fatu.
I teie mahana te ’oa’oa nei mātou ’ia fa’aara atu i te mau fa’anahora’a nō te hāmani i te tahi atu ā mau hiero, o te patuhia i roto i teie mau vāhi i muri nei :
Pago Pago, American Hāmoa ; Okinawa City, Okinawa ; Neiafu, Tona ; Tooele Valley, Utaha ; Moses Lake, Washington ; San Pedro Sula, Honetura ; Antofagasta, Tīreni ; Budapest, Honeteria.
Mauuruuru e au mau taea’e, ’e e au mau tuahine here.
’A paraparau ai tātou nō tā tātou mau hiero tahito ’e te mea ’āpī, e mata nā tātou tāta’itahi i te fa’a’ite nā roto i tā tātou mau ’ohipa ē, e mau pipi mau tātou nā te Fatu ra o Iesu Mesia. E mata nā tātou i te fa’a’āpī i tō tātou orara’a nā roto i tō tātou fa’aro’o ’e te ti’aturi iāna. E mata nā tātou i te tītau i te mana o tōna Tāra’ehara nā roto i tā tātou tātarahapara’a i te mau mahana ato’a. ’E e mata nā tātou i te ha’amo’a ’e i te ha’amo’a fa’ahou i tō tātou orara’a nō te tāvinira’a i te Atua ’e i tāna mau tamari’i—i nā pae e piti o te pāruru.
Tē vaiiho atu nei au i tō’u here ’e tā’u ha’amaita’ira’a ia ’outou na, ma te ha’apāpū atu ia ’outou ē, tē tāmau noa nei te heheura’a i roto i teie ’Ēkālesia a te Fatu. E tāmau noa te reira « e hope noa atu te mau fā a te Atua i te tupu, ’ei reira o Iehova tei hau i te rahi e parau mai ai ē, ’ua oti te ’ohipa ».1
’O tā’u ïa ha’amaita’ira’a ia ’outou ’e tō’u ’itera’a pāpū ē, tē ora nei te Atua ! ’O Iesu te Mesia ! Teie tāna ’Ēkālesia. E nuna’a tātou nāna. Nā roto i te i’oa mo’a o Iesu Mesia, ’āmene.