Te tāvinira’a a te mau ’āpōsetolo nā te ao ato’a nei
Nō te taime mātāmua i roto i te ’ā’ai o te ’Ēkālesia i fa’aho’ihia mai, ’ua putuputu te mau melo ato’a nō te Peresidenira’a Mātāmua ’e nō te pupu nō te Tino ’Ahuru Ma Piti i te hō’ē vāhi i rāpae i te Fenua Marite, i te terera’a rātou i ’Ītāria nō te ha’amo’ara’a o te hiero nō Roma (’Ītāria) i te ’āva’e ra Māti 2019. (Hi’o i te ’ā’amu i te ’api xx.)
I te tahi atu mau tere tāvinira’a i roto i nā ’āva’e e ono i ma’iri a’enei :
I muri iho i tō rāua tere i Carolina Apato’erau ’e Apato’a ra, i te Fenua Marite, ’ua paraparau te peresideni Dallin H. Oaks rāua Elder David A. Bednar i te mau ta’ata tei ro’ohia i te mata’i rorofa’i, i te hō’ē purera’a i Tallahassee (Florida, Fenua Marite). ’Ua fa’aha’amana’o te peresideni Oaks i te feiā i fa’aro’o iāna ē, e tuha’a te mau ’ati ’e te mau māuiui nō te orara’a tāhuti nei : « Mai te mea rā e vai ha’apa’o maita’i tātou ’e e pure tātou, e tauturu mai te Fatu ia tātou nō te fa’aruru i te reira. »
I Chicago (Illinois, Fenua Marite), ’ua parau Elder Oaks i te mau melo taure’are’a o te ’Ēkālesia tei fa’aipoipo ē : « E nā mua te fa’afāriura’a i te Fatu i te fa’afāriura’a i te ’Ēkālesia. ’E e tae mai te fa’afāriura’a i te Fatu nā roto i te pure ’e te tuatāpapara’a ’e te tāvinira’a. » ’E i Arizona ’āpitihia e te peresideni Russell M. Nelson, ’ua fa’aha’amana’o te peresideni Oaks i te feiā ’āpī ’e te feiā ’āpī pa’ari ē : « Te parau nūmera hō’ē roa e parau nō ni’a ia tātou, ’oia ho’i ïa, e tamaiti ’aore rā e tamāhine tātou nā te Atua. »
Ta’a ’ē noa atu te reira, ’ua tere tāvini ato’a te mau melo nō te pupu nō te Tino ’Ahuru Ma Piti ’āpōsetolo nā te ao nei :
I Peretāne, ’o Elder Jeffrey R. Holland ana’e tei paraparau i roto i te hō’ē fa’anahora’a Noela i te fare purera’a Pembroke College Chapel nō te fare ha’api’ira’a Oxford University, ’e ’ua ha’api’i ’oia nō ni’a i te ’oa’oa nō te fa’atumura’a i ni’a i te fānaura’a o te Mesia, e ’ere noa ra terā, i ni’a ato’a i tōna ora, tōna pohe ’e « tāna tusia tāra’ehara rahi ».
I São Paulo ’e i Salvador (Beresiria), ’ua tāvini Elder Dieter F. Uchtdorf i roto i te mau pupu rahi nā roto i te mau purera’a, ’e i roto ato’a rā i te mau pupu na’ina’i ’e i pīha’i iho i te ta’ata hō’ē, i te tāmarūra’a i te hō’ē ’utuāfare tei heva a’enei nō te pohera’a te hō’ē misiōnare rave tāmau, i te haerera’a i e piti purera’a ’ōro’a ’e i te Ha’api’ira’a Sābati ’e i te haerera’a nā muri i te mau pupu misiōnare e rave rahi nō te fārerei i te mau ’utuāfare ’āfa melo, ’e ’ua haru roa mai te mata o te tahi melo ’āpī i roto i te pere’o’o nā raro a’e i te fenua ē ’o ’ōna terā. ’Ua nā ’ō ’oia ē, « e vāhi Beresiria tei reira te mana’o ē e tamari’i tātou nā te Metua i te Ao ra e ’ite-pāpū-hia ’e e ha’apa’o-pāpū-hia ».
I te fenua Émirats arabes unis, ’ua fa’atere Elder David A. Bednar i te hō’ē purera’a ta’a ’ē nō te feiā ’āpī ’e te feiā ’āpī pa’ari o te titi nō Abu Dhabi. ’Ua tere māta’ita’i ’oia i te hō’ē pū ha’api’ira’a nō te mau tītīhoria nō Afirika i Aiphiti nā reira ato’a te hō’ē pū nō te feiā i fa’anu’uhia i Iraqi Kurdistan. « E mau tamaiti ’e e mau tamāhine ana’e tātou nā te Atua », ’ua parau o Elder Bednar i te mau tītīhoria. I ’Īserā’ela, ’ua peresideni ’oia i te hō’ē ’āmuira’a nō te mata’eina’a nō Ierusalema, nā reira ato’a te tahi purera’a i te pū Brigham Young University nō Ierusalema. I te taime nō te putuputura’a rahi RootsTech nō ni’a i te ’ā’amu ’utuāfare i Roto Miti (Utah, Fenua Marite), ’ua vauvau Elder Bednar i te hō’ē ō 2 milioni tārā marite nā te ’Ēkālesia i te fa’anahora’a ra International African American Museum Center nō te ’ohipa ’ā’amu ’utuāfare.
I ’Ūterenia, Aramenia, Farāni, Honeteria, Heleni, Rūmānia, ’e Tēhetia, ’ua paraparau Elder Quentin L. Cook nō ni’a i te parau tumu nō te orara’a i te mau mahana ato’a i te ’evanelia a Iesu Mesia i fa’aho’ihia mai, ’e te fa’a’itera’a i te reira nā roto i te hi’ora’a maita’i ’e te torora’a i te rima ia vetahi ’ē. I New York City (Fenua Marite), ’ua paraparau Elder Cook nō ni’a i te tū’atira’a e vai ra i roto i Te ’Ēkālesia a Iesu Mesia i te Feiā Mo’a i te mau Mahana Hope’a Nei ’e te mau ’āmuira’a ’āti Iuda. « Tē tū’ati nei tātou ’e tō tātou mau hoa ’āti Iuda nō ni’a i te parau nō te mau nūna’a tei ha’avīhia ’e nō ni’a i te mau ta’ata e fa’aruru nei i te mau ’ati ta’a ’ē », ’ua nā ’ō ’oia.
I Mehiko City, Mérida ’e Cancún (Mehiko), ’ua tāvini Elder Cook i rotopū i te mau feiā fa’atere o te ’Ēkalesia, te mau melo, te mau misiōnare ’e te mau feiā fa’atere pae fa’aro’o, te fa’aterera’a hau ’e te mau ’ona taiete. E purera’a nā te feiā ’āpī tei fa’ata’iruru mai e 800 feiā ’āpī nō roto mai e va’u titi i Mehiko City, ’e tei ha’apurorohia nō e 38 000 feiā ’āpī nā Mehiko tā’āto’a. ’E ’ua paraparau ato’a Elder Cook i te hō’ē mātutura’a parau i te piha ’āparaura’a nō te mau to’ofa nō Mehiko, i reira ’oia i te pi’ira’a i te ta’ata fa’aro’o ’ia ti’a pāpū ’e ’ia tāhō’ē nō te pāruru i te ti’amāra’a pae fa’aro’o.
I Puerto Rico ’e i te Rēpupirita Tominita, ’ua ’ite mai Elder D. Todd Christofferson ē, noa atu ā te vāvahira’a rahi a te mau mata’i rorofa’i, tē ti’a noa nei te mau melo. ’Ua nā ’ō ’oia ē, ’ua « pūaihia te ito » o taua ārea ra, i te ’itera’a rātou ē e patuhia e toru hiero i teie mau vāhi Caraïbes mā (i Haiti, Puerto Rico ’e te Rēpupirita Tominita). ’Ua paraparau ato’a ’oia i te hō’ē ’āmuira’a nō ni’a i te mau peu maita’i i roto i te tapiho’ora’a ’e i te hō’ē ato’a ’āmuira’a pae fa’aro’o. I te hō’ē putuputura’a ve’a parau ’āpī i Washington, D.C. Fenua Marite), ’ua paraparau Elder Christofferson nō ni’a i te faufa’a rahi nō te parau mau ’e te huru parau ti’a. ’E ’a rātere ai ’oia nā Guatemala ’e El Salvador, ta’a ’ē noa atu te tahi atu mau rurura’a, ’ua haere Elder Christofferson i roto i te hō’ē ha’apurorora’a tei ’itehia nā Amerika rōpū tā’āto’a, ’e ’ua tūra’i ’oia i te parau nō te faufa’a rahi o te tuatāpapara’a ’evanelia i te fare.
I Afirika Apato’a ’e Zimbabwe, ’ua parau Elder Neil L. Andersen i te mau melo ’ia ha’amana’o i te Fa’aora ’e ’ia pe’e i te parau nō te ’āpora’a fa’atumuhia i ni’a i te ’utuāfare, turuhia e te ’Ēkālesia. I Peretāne, Pays de Galles, Farāni ’e Auteteria, ’ua fa’ahiti ’oia i te parau nō te pūai e noa’a mai ’ia rahi te mau u’i o te hō’ē ’utuāfare i roto i te ’Ēkālesia, ma te parau ato’a ē, tē tāmau nei te mau melo nō Europa i te rave i te hō’ē tuha’a tumu i roto i te tupura’a ’e te pāpūra’a te ’Ēkālesia. ’Ua nā ’ō ’oia ē, ’ua riro rātou ’ei pāruru nō te fa’aro’o.
Tē māna’ona’o rahi nei te ’Ēkālesia nō ni’a i te ’ōnohira’a a te feiā ’āpī, ’o te parau ïa tā Elder Ronald A. Rasband i tūra’i ’a paraparau ai ’oia i te mau ’orometua ha’api’i nō te séminaire ’e te Institut i Roto Miti, Utah. E ti’a i te mau ’orometua nō te séminaire ’e te Institut e tauturu i te feiā e ’opa ra i roto i te reira nā roto i te fa’a’ohipara’a i te mau mātēria e rave rahi a te ’Ēkālesia nō te ārai i te ’ōnohira’a, ’e nā roto ato’a i te fa’aha’amana’ora’a i te mau pīahi ē, e ’ite rātou i te tauturu hanahana ’e te aupurura’a nā roto i te Fa’aora.
I Rwanda, ’ua tere Elder Gary E. Stevenson nā te hō’ē vāhi ha’amana’ora’a i te ha’amoura’a nūna’a, i reira tōna paraura’a ē, noa atu ā te mau pe’ape’a i tupu, i teie mahana e nūna’a « hāmani maita’i ’e te marū ’e te fa’afaite ’e te fa’a’ore hapa » te nūna’a nō Rwanda, ’e tē fa’a’ite nei rātou i te maita’i o te ta’ata nei. ’Ua pūpū atu ’oia i te tahi moni i terā vāhi ha’amana’ora’a, nā ni’a i te i’oa o te ’Ēkālesia. ’Ua rātere ato’a Elder Stevenson nā ’Ūtaneta, ’Ētiopia, Tanatānia ’e Madagascar, ’e ’ua fa’atere ’oia i te tahi mau ’āmuira’a feiā fa’atere autahu’ara, ’ua paraparau i te mau melo ’e te mau misiōnare, ’ua ti’a i roto i te hō’ē purera’a nā te feiā ’āpī ’e te feiā ’āpī pa’ari ’ōtahi, ’ua fārerei i te mau ti’a nō te fa’aterera’a hau ’e ’ua pāhono i te mau uira’a a te ve’a.
’Ua tere Elder Dale G. Renlund nā te mau vāhi mo’emo’e nō Rāparata ’e nō Tīreni, mai ia Antofagasta i te vāhi medebara i te pae apato’erau nō Tīreni ; i te hō’ē ’āmuira’a nō te misiōni nō Argentina Comodoro Rivadavia ; i te ’āma’a nō El Calafate i Rāparata, i reira ’ua ’ī roa te fare purera’a na’ina’i, ’ua hau i te 30–40 ta’ata tei tīa’ihia ; ’e i te hō’ē putuputura’a i Ushuaia (Rāparata), tei reira te 600 ta’ata i tae mai ’o te mau melo itoito ïa e vai ra nā terā vāhi nō Tierra del Fuego. I te mau vāhi mai ia Rio Gallegos (Rāparata), ’ua paraparau Elder Renlund nō ni’a i te mau ha’amaita’ira’a nō te fa’anahora’a ha’api’ira’a tei fa’atumuhia i ni’a i te ’utuāfare, turuhia e te ’Ēkālesia, ’e nō te huru ato’a te mau ’utuāfare e ha’amaita’ihia nā roto i te fa’aturara’a i te mahana sābati.
I Paratue, Urutue, Tīreni ’e Rāparata, ’ua fa’a’ite Elder Gerrit W. Gong i te mau parau tumu nō roto mai i te mau pāpa’ira’a mo’a ’e te mau ha’api’ira’a a te peresideni Nelson—’o te mau parau tumu ïa nō te aupurura’a, te fa’aeara’a i ni’ai te ’ē’a nō te fafaura’a, te heheura’a o te ta’ata iho, te fa’a’ohipa-tano-ra’a i te i’oa o te ’Ēkālesia ’e te fa’a’ohipa i te ’evanelia nō te pāhono ’e nō te upo’oti’a i ni’a i te mau tāmatara’a ’e te mau fifi i mua ia tātou.
I te pū ha’api’ipi’ira’a misiōnare nō Tuatemara, ’ua fa’a’ite Elder Ulisses Soares i te mau ha’api’ira’a tāna i ’apo mai i roto i te fa’afāriura’a o tōna nā metua. ’Ua fa’a’ohipa ’oia i taua mau ha’api’ira’a ra nō te fa’aitoito i te mau misiōnare ’ia vai ha’apa’o maita’i noa ’e ’ia vai pūai noa. ’Ua tere ato’a ’oia nā Costa Rica ’e nā Panama ma te parau ē, « ’ua hina’aro [te mau melo nō Amerika rōpū] e tāvini i te Fatu. ’Ua hina’aro rātou e rave i tāna i ani ia rātou ’ia rave. » I te hope’a o tōna tere, ’ua haere ’oia i te Rēpupirita Tominita ’e i Trinidad ’e Tobago, ’ua nā ’ō ’oia ē, i te mau vāhi Caraïbes mā, « e mea ’oa’oa te ta’ata i te ’evanelia a Iesu Mesia i roto i tō rātou orara’a. » ’Ua ha’amo’a ato’a ’oia i te nūna’a motu nō Curaçao nō te porora’a ’evanelia. « E mea ’ana’ana te ananahi o te ’Ēkālesia i Curaçao », ’ua parau fa’ahou ’oia. « E mea ha’apa’o maita’i te ta’ata ’e ’ua ineine nō te fāri’i i te ’evanelia ».