’Ua fa’aarahia e va’u hiero ’āpī ’e te tahi mau fa’a’āpīra’a rahi
E fa’a’āpīhia te mau hiero nō te tau o te mau pionie, mai te hiero nō Roto Miti, ’e e patuhia e va’u fa’ahou hiero ’āpī.
’Ua ’ōpani te peresideni Russell M. Nelson i te ’āmuira’a rahi nō ’Ēperēra 2019 ma te fa’aara e va’u hiero ’āpī ’e te fa’a’āpīra’a e maha hiero nō te tau o te mau pionie, ’ua hōro’a-ato’a-hia te tahi mau ha’amāramaramara’a nō ni’a i te fa’a’āpīra’a o te hiero nō Roto Miti.
E patuhia te mau hiero ’āpī i Pago Pago (Hamoa Marite) ; i Okinawa City (Okinawa) ; i Neiafu (Tona) ; i Tooele Valley (Utah, Marite) ; i Moses Lake (Washington, Marite) ; i San Pedro Sula (Honetura) ; i Antofagasta (Tīreni) ; ’e i Budapest (Honeteria).
I roto i te mau ’ōpuara’a rahi nō te fa’a’āpīra’a i te hiero nō Roto Miti, e fa’a’āpī-ato’a-hia Temple Square ’e te māhora tāpiri i te fare nō te piha tōro’a a te ’Ēkālesia i Roto Miti (Utah, Marite). E fa’a’āpī-ato’a-hia te mau hiero nō St. George, Manti ’e Logan, i Utah (Marite) i te mau mahana i muri nei. « E tītau teie ’ohipa ’ia tapirihia te hiero tāta’itahi nō te hō’ē tau », te parau ïa a te peresideni Nelson. « E nehenehe te mau melo e tāmau noa i te fāna’o i te ha’amorira’a ’e te tāvinira’a hiero i roto i te tahi atu mau hiero. ’Ia oti ana’e te hō’ē ’ōpuara’a, e ha’amo’a-fa’ahou-hia te hiero tāta’itahi ».
Mai tōna rirora’a ’ei Peresideni nō te ’Ēkālesia i te ’āva’e Tēnuare 2018, ’ua fa’aara te peresideni Nelson e 27 hiero. Mai te ’āmuira’a rahi nō ’Ātopa 2018 i ma’iri, ’ua ha’amo’ahia te mau hiero nō Roma (’Ītāria) ; Barranquilla (Colombia) ; ’e Concepción(Tīreni).