Elder Peter M. Johnson

Hitu ’Ahuru Hui mana fa’atere rahi

E tāmuta ’e e fa’ahoro taxi te metua tāne o Peter M. Johnson, i muri iho i tōna fāri’ira’a i te hō’ē pūtē moni taora pōpō i roto i te ’ete nō te fare ha’api’ira’a teitei nō Hawaii, ’ua fārerei ’oia i te hō’ē ’orometua nō te institut.

« E tomo ’oe i roto i te ’Ēkālesia i teienei, ’aita ana’e e maoro atu ā te reira nō ’oe », ’ua parau tohu te ’orometua.

’Ua tano te ’orometua. Hō’ē matahiti i muri mai, ’ua « ha’apae [Peter] i te mā’a ’e ’ua pure ho’i ’e ’ua fāri’i i te hō’ē pāhonora’a. » ’Ua bāpetizohia ’oia i te 16 nō ’Ātete 1986.

’O Peter Matthew Johnson te maha o nā tamari’i e pae, ’ua fānauhia ’oia e McKinley Johnson ’e e Geneva Paris Long i te 29 nō Novema 1966, i Queens (New York, Marite).

’Ua ta’a tōna nā metua i te 11ra’a o tōna matahiti, ’e ’ua fa’anu’u tōna metua vahine i Hawaii. Hō’ē matahiti i muri mai, ’ua ’āmui atu Peter i te nuna’a mahometa [Nation of Islam] ’e ’ua riro mai ’ei mahometa. ’Ua noa’a iāna i reira te arata’ira’a ’e te pāturura’a, ’e ’ua fa’aineine iāna nō te fāri’i i te ’evanelia a Iesu Mesia.

I te 15ra’a o tōna matahiti, ’ua fa’anu’u Peter i Hawaii i pīha’i iho i tōna metua vahine. I reira, ’ua ’ite mai ’oia i te ’ohipa tū’aro—te taora popo i roto i te ’ete iho ā rā—’ua ha’amata a’era tōna ’ē’a i te ha’api’ira’a tuatoru, te melora’a i roto i te ’Ēkālesia a Iesu Mesia i te Feiā Mo’a i te mau Mahana Hope’a Nei, te tāvinira’a ’ei misiōnare i roto i te misiōni nō Alabama Birmingham, ’e i te fa’aipoipora’a i te hiero ’e ’o Stephanie Lyn Chadwick i te matahiti 1990. ’Ua fārerei rāua ’a ha’uti ai i te taorara’a pōpō i roto i te ’ete i te fare ha’api’ira’a teitei nō Southern Utah, ’e e maha tā rāua tamari’i.

« Tei ’ō nei au nō te tāvini i te Fatu », tē nā reira ra ’ō Elder Johnson nō ni’a i tōna pi’ira’a ’ei Hitu ’Ahuru. « Ta’a ’ē noa atu te ti’ara’a tīvira ’aore rā te ta’ere ’aore rā nō hea mai au, tō’u nei pi’ira’a, ’o te tāvinira’a ïa i te Fatu ma tō’u ’ā’au ato’a, tō’u vārua ’e tō’u pūai, ’e nō te ti’a nō te Fatu i mua i tōna mau ta’ata. ’Ua here te Fa’aora ia tātou pā’āto’a. E mau tamāroa ’e e mau tamāhine tātou nā te Atua. »

’Ua fāri’i ’o Elder Johnson i te hō’ē parau tū’ite Licence ’e te parau tū’ite Master i te pae nō te nūmerara’a faufa’a i te fare ha’api’ira’a teitei nō Southern Utah ’e te hō’ē parau Doctorat i te pae nō te nūmerara’a faufa’a i te fare ha’api’ira’a teitei nō Arizona State. ’Ua rave ’oia i te ’ohipa ’ei ’orometua ’āpiti i BYU–Hawaii, ’ei ’orometua rahi i Brigham Young University, ’e ’ei ’orometua ’āpiti i te fare ha’api’ira’a teitei nō Alabama. ’Ua tāvini ’oia ’ei Hitu ’Ahuru ārea, ’ei peresideni titi, ’ei pāpa’i parau ha’apa’o faufa’a nō te titi ’e ’ei ta’ata fa’atere ’ohipa mīsionare nō te pāroita.