Tokoni ʻa e Ngaahi Ngāue Tokoni ʻOfa Fakaetangatá ki ha Laui Afe
Ko ha neesi ʻi ʻInitonēsia ʻokú ne tuʻu he tafaʻaki ʻo ha faʻē olopoʻou. Naʻe fakakakato ʻe he kau neesi ʻi he senitā faifāʻele ko ʻení ha kalasi Tokoni ki he Mānava ʻa e Pēpeé, ʻa ia naʻe fakalele ʻe he Kautaha Tokoni ʻOfa ʻa e Siasí.
Ko e malimali ʻa ha talavou ʻi Kana hili hano fakaheka ia ki ha saliote, ʻi he tokoni ʻa ha tokotaha ngāue fakatekinikale he Kautaha Tokoni ʻOfa ʻa e Siasí.
Naʻe kau atu e vaʻa tokoni fakaetangata ʻa e Siasí, Kautaha Tokoni ʻOfa ʻa e Siasí, ki ha ngaahi polōseki ʻe 2,885 ʻi he tukui fonua ʻe 141 he taʻu kuo ʻosí, ʻo nau hoa ngāue ai mo ha ʻū kautaha tokoni ʻofa fakaetangata ʻe 1,900. Talu mei he 1985, kuo foaki ʻe he Kautaha Tokoni ʻOfa ʻa e Siasí ha tokoni $2.2 piliona tupu—ʻo kau ai ha paʻanga, koloa mo ha ngaahi tokoni kehe ʻi ha tukui fonua mo ha vahefonua ʻe 197, ʻo fakatatau ki he lipooti fakataʻu ʻa e Kautaha Tokoni ʻOfa ʻa e Siasí ki he 2018 ʻa ia ne tukuange ʻi he ʻaho 19 ʻo Fepueli, 2019.
ʻOku tupu e ngaahi ngāue tokoni ʻofa fakaetangata ʻa e Siasí mei he manavaʻofa mo e ʻofa ki he fānau kotoa ʻa e ʻOtuá pea ʻokú ne fakamamafaʻi ha tefitoʻi fakahinohino ʻe tolu—ko hono tokangaekina ʻo kinautolu ʻoku fuʻu fie maʻu vivilí, ko hono ohi ʻo e moʻui fakafalala pē kiate kitá, pea mo hono fakaʻaiʻai ʻo e ngāue tokoní. ʻOku makatuʻunga ʻi he tui kia Sīsū Kalaisí ʻa hono fakamālohia ʻe he ngaahi tefitoʻi moʻoni ko ʻení ʻa e fakafoʻituituí mo e ngaahi fāmilí ʻo tatau ai pē pe ko e hā e matakalí, tui fakalotú pe fonuá.
ʻOku tokoni ʻa e Siasí ʻi he ngaahi fie maʻu tokoni fakatuʻupakeé (ʻo kau ai e kau ngāue tokoni), ngaahi ngāue ki he kakai ʻoku ʻikai ke lava ʻo sio leleí, tokangaekina ʻo e kakai feitamá mo e fānau valevale toki fāʻeleʻí, vai maʻá, huhu maluʻí, faʻu e saliote teketeké mo e tokotokó, tokoniʻi e kakaí ke maʻu ha meʻatokoni maʻanautolu pē ʻo ngāue ʻaki e ngaahi maʻuʻanga tokoni fakalotofonuá, pea mo e tokoni fakavavevave mo taimi lōloa ki he kau kumi-hūfangá. ʻOku toe kau foki ʻa e Siasí ʻi he ʻū polōseki fakalotofonua ki he tukui koló ʻi ha ngaahi vahefonua ʻe 43 ʻi ʻAmelika mo Kānata ke tokoni ki he kakai ʻoku ʻikai ha nofoʻangá, nofoʻanga maʻá e kau kumi hūfangá, mo ha ngaahi fie maʻu kehé.
Naʻe pehē ʻe Sisitā Seiloni ʻIupangikē, ko e palesiteni ʻo e Kautaha Tokoni ʻOfa ʻa e Siasí pea mo e Tokoni ʻUluaki ʻi he Kau Palesitenisī Lahi ʻo e Fineʻofá, “ʻOku mau ongoʻi loto-houngaʻia moʻoni mo fekāingaʻaki mo e tokotaha kotoa pē naʻe tokoni ki he lavameʻa ʻa e ngāue tokoni ʻofa fakaetangata ʻi he 2018.” Naʻá ne pehē ʻoku fakafofongaʻi ʻe he lipōtí ʻa e angaʻofa ʻa ha kakai ʻe laumano.