Jan E. Newman

Tauturu piti i roto i te peresidenira’a rahi o te Ha’api’ira’a Sabati

’Ei taure’are’a misiōnare i Strasbourg (Farāni), ’ua tupu te tahi ’ohipa pae vārua ta’a ’ē i ni’a ia Jan E. Newman tei ha’apūai i tōna ’itera’a pāpū ’e tei fa’aputapū iāna i te here o te Metua i te Ao ra. ’Ua tupu terā ’ohipa ’a tai’o ai ’oia i te mau parau a te peropheta Alama i roto i te Buka a Moromona nō ni’a i te tanura’a i te huero o te ’evanelia i roto i tō tātou ’ā’au (hi’o Alama 32:28 ; 33:22–23).

« ’Ua tai’o vau ē, mai te mea e fa’aāteatea tātou i te tahi vāhi nō terā huero i roto i tō ’oe ’ā’au, e tupu mai te reira, ’e e putapū mai ’oe i terā tupura’a », tē nā reira ra te taea’e Newman. « Tē ha’amana’o nei au i te tai’ora’a i te reira ’e ’ua fa’a’ite pāpū noa ’e ’ua fa’a’ite pūai mai te Vārua iā’u ē e parau mau te reira. ’Ua putapū vau i terā tupura’a. E’ita te reira e mo’e iā’u ē pohe noa atu vau. »

’Ua tauturu te reira ’ohipa ’e te tahi ato’a i te ha’apa’ari i te ’itera’a pāpū o te taea’e Newman nō te ’evanelia ’e ’ua fa’aineine iāna nō tōna orara’a tāvinira’a ’ei tāne fa’aipoipo, ’ei metua tāne ’e ’ei pipi nā Iesu Mesia.

’Ua fānauhia Jan Eric Newman i te 16 nō ’Ēperēra 1960, i Jerome (Idaho, Marite), e George Raymond ’e e Dora Walker Newman. ’Ua pa’ari ’oia i Overton (Nevada, Marite). ’Ua fa’afāriuhia tōna metua tāne, ’e nō roto mai tōna metua vahine i te hō’ē ’utuāfare melo e rave rahi u’i.

I tōna ’āpīra’a, te tupura’a tōna ’itera’a pāpū ’e ’ua tāvini ’oia i te hō’ē misiōni rave tāmau i Farāni ’e i Belegita. I te otira’a tāna misiōni, ’ua noa’a i te taea’e Newman te hō’ē parau tū’ite Licence i te pae nō te reo farāni i Brigham Young University. Nō tōna au roa i terā parau tū’ite, ’ua mana’o roa ’oia e riro mai ’ei ’orometua ha’api’i reo farāni, ’aita rā, ’ua pe’e ’oia i te tōro’a hāmani paparoro (logiciel). ’Ua ’ohipa ’oia ’ei tuatāpapa fa’anahora’a ’āpī ’ua hau i te 30 matahiti te maoro, ’e ’ua ha’amau i te mau taiete paparoro manuia e rave rahi. I teienei ’e ’āpiti fa’atere ’oia nō SageCreek Partners, e taiete tuatāpapa i te mau rāve’a ’āpī i Alpine (Utah).

’Ua fa’aipoipohia te taea’e Newman ia Lucia Price i te hiero nō Oakland (California) i te 18 nō ’Ātete 1984. E ono tā rāua tamari’i ’e tē ora nei rātou i Elk Ridge (Utah).

’Ua tāvini te taea’e Newman ’ei peresideni titi, ’ei ’episekōpo, ’ei peresideni Feiā ’Āpī Tamāroa nō te pāroita, ’ei ti’a Scout ’e ’ei rave ’ohipa nō te hiero. Mai te matahiti 2006 i te matahiti 2009, ’ua tāvini ’oia ’ei peresideni nō te misiōni nō Nebraska Omaha.