Elder Jorge M. Alvarado

Hitu ’Ahuru Hui mana fa’atere rahi

’Ua tomo mai Miguel ’e Iris Alvarado i roto i te ’Ēkālesia i Puerto Rico i te matahiti 1977, e ono matahiti tō tā rāua tamaiti i terā taime. ’Ua bāpetizohia te taure’are’a ra Jorge e piti matahiti i muri mai ’e ’aita ’oia i ma’iri i te hō’ē noa a’e purera’a i te sābati.

« ’Ua tupu rā tō’u fa’afāriura’a i te 16ra’a o tō’u matahiti », ’ua parau te Hitu ’Ahuru Huimana fa’atere rahi ’āpī.

I te Lycée, ’ua ha’amata ’oia i te tāvini ’ei peresideni nō te piha séminaire nō tōna ’oire nō Ponce. Tē tuatāpapa ra te mau pīahi i te Buka a Moromona i terā matahiti. Nā roto i tāna hōpoi’a ’āpī, ’ua tae mai te mana’o hi’opo’a iāna iho.

« E mea tītau ’ia ui au iā’u iho nei ē : ‘Tē ti’aturi mau ra ānei au e parau mau te Buka a Moromona ?’ Nāhea pa’i au, e peresideni au nō tā’u piha séminaire ’e ’aita tō’u e ’ite nō te parau mau o teie buka ? »

’Ua rave mai ’oia i tāna Buka a Moromona ’e nō te taime mātāmua, ’ua ha’amata ’oia i te tai’o pāpū i te reira.

« ’Ua tūturi au ’e ’ua pure au, ’e ’ua tae mai tō’u ’ite ē, e parau mau te reira », tāna ïa parau.

’Ua riro noa te Buka a Moromona ’ei mana fa’auru i roto i te orara’a o Elder Alvarado.

I te tāvinira’a ’oia ’ei misiōnare rave tāmau i roto i te misiōni nō Florida Tampa, ’ua hōro’a ’oia i te Buka a Moromona i te mau ta’ata ato’a tāna i ha’api’i. I muri mai, ’ua tuatāpapa ’oia i te buka ’e tāna vahine ’e tā rāua e toru tamari’i. ’Ei peresideni nō te misiōni nō Puerto Rico i San Juan, ’ua tu’u ’ōna i te ’ōpuara’a i mua i tāna mau misiōnare ’ia here ’e ’ia ’ōpere i te Buka a Moromona.

I teienei ’ei Hitu ’Ahuru Hui mana fa’atere rahi, tē vai noa nei terā hina’aro i roto ia Elder Alvarado ’ia ani i te ta’ata ’ia ’ite i te mau parau mau o te Buka a Moromona e taui i te orara’a.

’Ua fānauahi Jorge Miguel Alvarado Pazo i te 21 nō Novema 1970. I te 19 nō Tītema 1992, ’ua fa’aipoipo ’oia ia Cari Lu Rios i roto i te hiero nō Washington D.C.

I muri mai i te ha’api’ira’a nō te fa’aterera’a taiete i te fare ha’api’ira’a teitei nō Puerto Rico, ’ua ’ohipa ’oia i ni’a i te mau ti’ara’a rau nō te fa’aterera’a taiete i Puerto Rico ’e i te Fenua Marite. ’Aita i maoro a’enei, ’ua ’ohipa ’oia i te pū fa’atere a te ’Ēkālesia i Roto Miti ’ei fa’atere nā te ara nō te Fa’arava’ira’a iāna iho.

’Ua tāvini Elder Alvarado ’ei Hitu ’Ahuru ārea, ’ei peresideni titi, ’ei melo ’āpo’ora’a teitei, ’ei peresideni ’āma’a ’e ’ei ta’ata fa’atere ’ohipa misiōnare nō te pāroita.