Mark L. Pace

Peresideni rahi nō te Ha’api’ira’a Sābati

I roto i te hō’ē uiuira’a tei fa’ata’ahia nō te hō’ē pi’ira’a e tāvini ’ei peresideni rahi ’āpī nō te Ha’api’ira’a Sābati a te ’Ēkālesia, ’ua pūpū te taea’e Mark L. Pace i tāna pure fafaura’a.

« E te Metua i te Ao ra, te mea ato’a tā ’oe e hina’aro iā’u ’ia rave, e rave au ma te ’oa’oa », ’o tāna ïa parau. « ’Ia ’ite noa ’oe ē, ’ua ineine hope au. »

Tē parau ra te taea’e Pace ē, tōna hina’aro mātāmua, ’o te ha’amaita’ira’a ïa ’e te turura’a ’e te fa’aitoitora’a i te mau melo o te ’Ēkālesia. « ’Ua hina’aro mātou e hōro’a i te mau mea ato’a tā mātou e vai ra », ’ua parau ’oia nā ni’a i te i’oa o te peresidenira’a rahi ’āpī o te Ha’api’ira’a Sābati.

’Ua fānauhia Mark Leonard Pace i te 1 nō Tēnuare 1957, i Buenos Aires (Rāparata), e Lorin Nelson ’e e Marylynn Haymore Pace. I terā tau, e peresideni misiōni te metua tāne o te taea’e Pace, nō te misiōni nō Rāparata.

’Ua fārerei te taea’e Pace ia Anne Marie Langeland, tei riro mai ’ei vahine nāna ’a haere ai rāua i roto i te hō’ē ā piha piti i te fare ha’api’ira’a tuatahi i Roto Miti (Utah, Marite). Ē i muri a’era, ’a ta’a ’ē ai tā rātou fare ha’api’ira’a tuarua, ’ua fārerei fa’ahou rāua i te hō’ē fa’a’oa’oara’a ’āmui a te séminaire. ’Ua pāpa’i rāua ia rāua i te mau matahiti i muri iho ’a haere ai Anne i Norovetia, i reira tōna metua tāne i te peresidenira’a i te misiōni nō Norovetia i Oslo, ’e ’a tāvini ato’a ai te taea’e Pace i roto i te misiōni nō Pāniora i Madrid. ’Ua fa’aipoipohia rāua i roto i te hiero nō Roto Miti i te 21 nō Novema 1978, ’e e hitu tamari’i tā rāua.

’Ua roa’a tā te taea’e Pace parau tū’ite Licence nō te fa’arava’ira’a faufa’a i te fare ha’api’ira’a teitei nō Utah i te matahiti 1980 ’e te hō’ē parau tū’ite Master nō te ’ohipa fa’aterera’a taiete i te fare ha’api’ira’a Harvard Business i te matahiti 1982. ’Ua ’ohipa ’oia nō te hō’ē tau poto nā Price Waterhouse i New York City, i muri iho ’ua ’ohipa ’oia nō te taiete Boyer Company i Roto Miti nō te tapiho’ora’a i te mau fenua, mai te matahiti 1984 i te matahiti 2012. I muri mai i te tāvinira’a e toru matahiti ’ei peresideni nō te misiōni nō Pāniora i Barcelona, ’ua ’ohipa ’oia nō te taiete Gardner Company i te matahiti 2015, i roto i te fa’ahotura’a fenua.

I te pi’ira’ahia ’oia i teie pi’ira’a ’āpī, tē tāvini ra te taea’e Pace ’ei Hitu ’Ahuru ārea. I roto i tāna mau pi’ira’a nā mua atu, tē vai ra ’ei tauturu i roto i te hō’ē peresidenira’a titi, ’ei melo ’āpo’ora’a teitei, ’ei ’episekōpo, ’ei tauturu i roto i te hō’ē ’episekōpora’a, ’ei peresideni pupu peresibutero, ’ei peresideni Feiā ’Āpī Tamāroa o te pāroita ’e ’ei ti’a fa’atere Scout.