Milton Camargo

Tauturu mātāmua i roto i te peresidenira’a rahi o te Ha’api’ira’a Sābati

Fātata hō’ē matahiti te maoro tō Helio da Rocha Camargo, e fa’atere tahito i roto i te tahi atu ’ēkālesia, hou ’oia ’a fāri’i ai e bāpetizo iāna i roto i te ’Ēkālesia a Iesu Mesia i te Feiā Mo’a i te mau Mahana Hope’a Nei. ’Aita i maoro i muri mai, ’ua fa’aoti ato’a mai tāna vahine ’o Nair Belmira da Rocha Camargo, e pe’e i te hi’ora’a o tāna tāne fa’aipoipo ’e ’ua bāpetizo ato’a iāna.

I terā taime, ’ua hapū Nair i tā rāua tamaiti, tā rāua i topa te i’oa ’o Milton. ’Ua ha’amaita’i a muri noa atu te fa’aotira’a tāhō’ē a Camargo mā e tomo i roto i te ’Ēkālesia, i te mau u’i nō muri iho o tō rāua ’utuāfare.

’Ua fānauhia te taea’e Milton da Rocha Camargo i te 10 nō Māti 1958, i São Paulo (Beresiria). ’Ua parau te taea’e Camargo, tei pāturuhia i te 6 nō ’Ēperēra 2019, ’ei tauturu mātāmua i roto i te peresidenira’a rahi o te Ha’api’ira’a Sābati ē, e ha’amaita’ira’a nōna te pa’arira’a ’ei melo nō te ’Ēkālesia.

« ’Ua ’ite te Fatu ia tātou tāta’itahi », ’ua nā ’ō ’oia. « Tāna mau fa’anahora’a nō tātou tāta’itahi, ’ua hau atu ā ïa i tā tātou e nehenehe e feruri. »

’Ua mātau te taea’e Camargo i tāna vahine ’o Patricia, ’a peresideni ai tōna metua tāne i te misiōni nō Beresiria i Rio de Janeiro, i te pae hope’a o te mau matahiti 1970. ’Ua fa’aipoipo rāua i te 4 nō Tiurai 1980, fātata hō’ē matahiti i muri mai i te otira’a te taea’e Camargo i tāna misiōni ’ei misiōnare rave tāmau i roto i te misiōni nō Pōtītī i Lisbon. E toru tā rāua tamari’i.

I te ha’amatara’a o tō rāua orara’a, ’ua pārahi Camargo mā i Rio de Janeiro, i reira tō te taea’e Camargo noa’ara’a te hō’ē parau tū’ite Licence i te pae nō te ihi patu fare i te Instituto Militar de Engenharia. I muri a’e, ’ua noa’a iāna te hō’ē parau tū’ite Master nō te fa’aterera’a taiete i Brigham Young University.

I te roara’a o tōna tōro’a, ’ua pūpū te taea’e i tōna taime ’e tōna itoito nō te ha’api’i i te mau ta’ata. E rave rahi matahiti tōna ravera’a i roto i te mau fare ha’api’ira’a tuatoru, mai te Laureate Brazil Online Education, Universidad Tecnológica de México, ’e ’aita i maoro a’enei nō te fa’anahora’a BYU-Pathway Worldwide ’ei mono peresideni nō te reira.

’Ua tāvini te taea’e Carmargo ’ei Hitu ’Ahuru ārea, ’ei peresideni nō te misiōni nō Beresiria i Porto Alegre South (1997–2000), ’ei tauturu i roto i te peresidenira’a nō te pū ha’api’ipi’ira’a misiōnare i Beresiria (2002–5), ’ei ’episekōpo, ’ei peresideni misiōni nō te titi ’e ’ei peresideni pupu peresibutero.