Mau parau ’āpī nō te mau misiōnare

Te paraparaura’a i te ’utuāfare. I teienei, e fa’ati’ahia te mau misiōnare ’ia paraparau i tō rātou ’utuāfare i te mau hepetoma ato’a i te mahana fa’aineinera’a nā roto i te mau parau poro’i, te ’itenati, te niuniu, ’e te paraparaura’a video ta’a ’ē atu i te mau rata ’e te mau rata uira.

Mau mauha’a tārenara’a nō te mau ta’ata e tano ’ei misiōnare. Tē vai ra te hō’ē mauha’a ’āpī i ni’a i te natirara, e mauha’a tārenara’a nō ’ō mai i te Tuha’a fa’atere misiōnare nō te tauturu i te mau ta’ata e tano ’ei misiōnare nō te fa’aoti ’e nō te feruri rahi atu ā rātou iho i te taime ’ua ineine maita’i roa rātou nō te tāvini i te Fatu ’ei misiōnare.

Mau misiōni tauturura’a. Mai te ’āva’e Tēnuare 2019 ra, e parauhia te mau taure’are’a misiōnare i te mau pū ’ohipara’a ’ei « misiōnare tauturu. » Te mau taure’are’a ato’a e tītau i te haere i te hō’ē misiōni tauturura’a, e nā reira ïa rātou mai te tahi mau pu’era’a, nā ni’a i te natirara, ’e te mau pi’ira’a misiōni ato’a, te pi’ira’a ānei ’ei misiōnare poro ’evanelia ’aore rā ’ei misiōnare tauturu—nō ’ō mai ïa i te peropheta. Nō te mau taure’are’a ti’amā tei ha’apaehia te misiōni poro ’evanelia nō te tahi tumu rau, e nehenehe tā rātou e pi’ihia nō te hō’ē misiōni tauturura’a.

E nehenehe te mau misiōnare vahine e ’ō’omo i te piripou ’āvae roa. I teienei, tē vai nei te mā’itira’a i roto i te mau misiōnare vahine ’ia ’ō’omo i te piripou ’āvae roa i roto i tā rātou ’ohipa misiōnare i te mau mahana ato’a, ’ia tāmau noa rā te mau tuahine i te ’ō’omo i te ’ahu ’aore rā i te piritoti ’ia haere rātou i te hiero ’e i te mau ’ōro’a purera’a i te sābati, i te mau ’āmuira’a nā te feiā fa’atere ’e te mau ārea, te mau ’ōro’a bāpetizora’a, ’e te mau purera’a i te mau pū ha’api’ipi’ira’a misiōnare. E nehenehe te piripou ’āvae roa e pāruru i te mau tuahine i te mau ma’i parare a te naonao, e tāpe’a māhanahana ia rātou i te mau vāhi to’eto’e ’e e fa’a’ōhie i te ta’ahira’a i te pere’o’o ta’ata’ahi.

Mau misiōni tei ha’amauhia, mau ’ōti’a tei tauihia. ’Ua ha’amauhia e maha misiōni ’āpī ’e e ’ahuru ma piti misiōni tei ’otehia i roto i te tahi mau misiōni e vai ra. E tupu iho ā te reira mau tauira’a i terā taime ’e terā taime nō te fa’atano i ni’a i te mau misiōnare e tāvini ra. Teie te mau misiōni ’āpī, te mau misiōni nō te Rēpupirita manahune o Tōneto Kinshasa East, nō Tuatemara Antigua, nō Peru Limatambo, ’e nō Philipino Antipolo. E fāri’i te mau melo nō taua mau misiōnare ra e tāvini i roto i teie mau misiōni—tei ha’amauhia ānei ’aore rā tei fa’a’orehia—i te mau ha’amāramaramara’a nō ’ō mai i tō rātou mau peresideni misiōni.

Te rahira’a pū ha’api’ipi’ira’a misiōnare tei fa’atanohia. Nō te fa’a’ohipa maita’i atu ā i te mau pū ha’api’ipi’ira’a misiōnare nā te ao nei, e ’ōpanihia te mau pū i Rāparata, i Pāniora, i Tīreni ’e i te Rēpupirita Tominita. Nō teie mau ’ōpanira’a, e fa’a’ohipa te ’Ēkālesia e 11 pū ha’api’ipi’ira’a misiōnare, i Beresiria ; i Colombia ; i Peretāne ; i Ghana ; i Tuatemara ; i Mehiko ; i Niuterani ; i Peru ; i Philipino ; i Provo (Utah, Marite) ; ’e i Afirika Apato’a.

Mau video pārurura’a. ’Ua ’ōpuahia te ’āna’ira’a 12 tuha’a video ’āpī ra Te vāhi pāruru [The Safety Zone] nō te ha’amaita’i atu ā i te pārurura’a o te 65 000 misiōnare rave tāmau ’e ia rātou ato’a e tāvini i muri mai ia rātou. ’Ua ’ōpuahia te video mātāmua ’ia māta’ita’ihia e te mau ta’ata e tano ’ei misiōnare ’e tō rātou nā metua i muri iho i tō rātou fāri’ira’a i te pi’ira’a misiōni ’e nā mua a’e i te haere i te pū ha’api’ipi’ira’a misiōnare. I te PHM, e māta’ita’i fa’ahou ā te misiōnare i te video mātāmua nā reira ato’a te tahi atu 11 video. E ravehia te tahi mau fa’aha’amana’ora’a nō te mau misiōnare i terā taime ’e terā taime o tā rātou misiōni.