Ture nō te mau tamari’i a nā metua pā’i’a, mau melo tei fa’aipoipo pā’i’a

I teienei, nō te mau metua e parau nei ia rātou iho ’ei pā’i’a vahine, ’ei pā’i’a tāne ’ei airua ’aore rā ’ei ta’ata taui ’āpeni, e nehenehe tā rātou e tītau ’ia ha’amaita’ihia tā rātou ’aiū e te hō’ē taea’e ti’amā e mau nei i te autahu’ara’a a Melehizedeka, ’e e nehenehe ato’a tā rātou mau tamari’i ’ia bāpetizohia ’ia ti’a tō rātou va’u matahiti, ma te tītau ’ore i te parau fa’ati’a a te Peresidenira’a Mātāmua, ’ua fa’aara te peresideni Dallin H. Oaks, tauturu mātāmua i roto i te Peresidenira’a Mātāmua i roto i te hō’ē rurura’a feiā fa’atere o te ’āmuira’a rahi.

Hau atu, noa atu ā tē hi’o-noa-hia nei te fa’aipoipora’a ta’ata nō tōna ’āpeni ’ei « ’ōfatira’a ture teimaha », e’ita te ’Ēkālesia e fa’ariro fa’ahou ā i te reira ’ei « tāivara’a » i roto i te mau fa’atītī’aifarora’a a te ’Ēkālesia. « E hi’ohia te mau peu vi’ivi’i i te hō’ē ā fāito e tāne ’e te vahine ānei ’aore rā e pā’i’a », te parau ïa a te peresideni Oaks.

E ’ere teie mau tauira’a ture « i te tauira’a i roto i te ha’api’ira’a tumu a te ’Ēkālesia nō ni’a i te fa’aipoipora’a ’aore rā nō ni’a i te mau fa’auera’a a te Atua nō te vi’ivi’i ’ore ’e te peu mōrare », ’ua pūhara te Peresidenira’a Mātāmua i roto i te hō’ē parau mana. « E’ita te ha’api’ira’a tumu nō ni’a i te fa’anahora’a nō te fa’aorara’a ’e te faufa’a rahi o te vi’ivi’i ’ore e taui. »

’Ua nā ’ō te peresideni Oaks e tauturu atu te mau ture i te mau ’utuāfare mai te reira, ’e « hau atu, maoti te tauto’ora’a a tō tātou mau melo nō te fa’a’ite rahi atu ā i te fa’a’oroma’i, te aumihi ’e te here e rahi atu ā te fa’atura ’e te fa’a’oroma’i i roto i te mau feiā mana’o maita’i ato’a. »