Tē tāvini nei te mau tuahine, tē fārerei nei ’e tē hōro’a nei

’Ua vauvau te tuahine Jean B. Bingham, te peresideni rahi o te Sōtaiete Tauturu, ’e Bonnie H. Cordon, te peresideni rahi o te Feiā ’Āpī Tamāhine i te mau fa’anahora’a tauturura’a e rave rahi a te ’Ēkālesia, mai te pape mā, te ’ihitamamario (néonatalogie) ’e te mau pātia pāruru, nā reira ato’a te mau fa’anahora’a ha’api’ira’a ’e ha’api’ira’a pī’āpā, i te fārereira’a rāua i te feiā nō te fa’aterera’a hau ’e i te tāvinira’a rāua i te mau melo o te ’Ēkālesia i Ghana, Nigeria, ’e te Fenua ’Īvori.

« Te fā nō tō mātou tere, ’o te fārereira’a ïa i te feiā mo’a, te ha’api’ipi’ira’a i te mau tuahine, te fa’aro’ora’a i tō rātou mau fifi, te putapūra’a i te maita’i o tō rātou ’ā’au ’e te fa’a’itera’a ia rātou ē, ’ua here mātou ia rātou », ’ua nā ’ō te tuahine Bingham.

’Ua fa’atupu nā tuahine Bingham ’e Cordon i te hō’ē purera’a ’e te mau misiōnare nō te misiōni nō Ghana Accra West. ’Ua hāhaere ato’a rāua i te mau melo e rave rahi i tō rātou fare. ’Ua ’āmui atu te tuahine Bingham i te hō’ē ’ōpuara’a ha’api’ira’a pī’āpā ’evanelia, ’o tē ha’api’i i te ta’ata nāhea ’ia tai’o ’a ha’api’i ato’a ai ia rātou i te ’evanelia a Iesu Mesia. ’E ’ua ’āmui ato’a rāua i roto i te hō’ē ha’apurorora’a ha’api’ipi’ira’a nō te feiā fa’atere mai Accra atu, e ha’apurorora’a tei fa’atae atu i e 100 ’āmuira’a nā Afirika Tō’o’a o te rā ; ’ua fārerei ato’a rāua i te Vahine mātāmua nō Ghana, nā reira ato’a te Pāpa’i parau tāmau nō te Fa’aterera’a hau nō te mau ’ohipa nō te mau vahine ’e te fa’aitira’a i te veve nō Lagos State i Nigeria.

I muri mai i te hō’ē rurura’a ’e te mau tuahine nō te Fenua ’Īvori, ’ua parau te tuahine Cordon ē : « E mea fa’ahiahia mau tō rātou ti’aturi ’e tō rātou māramarama i te Atua, ’o vai ’oia ’e e aha tāna e nehenehe e rave i roto i tō rātou orara’a. » ’Ua nā ’ō ’oia ē, i tōna fa’ahitira’a i te parau nō te hō’ē hiero i Abidjan, ’ua ta’i te hō’ē tuahine ma te ’oa’oa. « Tē reva nei mātou ma te mata afirika », ’ua parau te tuahine Cordon. « Tē reva nei mātou ma te ’ā’au ’āpī. »

’Ua hōro’a te tuahine Joy D. Jones, peresideni rahi nō te Paraimere, i te tahi tino moni tei noa’a mai nā roto i te ’ōpuara’a Tūrama i te ao nei [Light the World] i te mau piha tōro’a o te mau fa’anahora’a tōtauturu e rave rahi nō Manhattan (New York, Marite). « Tē fa’ahanahana nei tātou i te Fa’aora Iesu Mesia nā roto i te tāvinira’a », ’ua parau te tuahine Jones, ’ua parau ato’a ’oia ē, e mea fa’ahiahia ’ia ’ite i te ’ohipa i tupu « i te ’itera’a te mau ta’ata i te ’oa’ao ’ia hōro’a. »

I Roto Miti (Utah, Marite), ’ua hōro’a te tuahine Sharon Eubank, tauturu mātāmua i roto i te peresidenira’a rahi nō te Sōtaiete Tauturu, i te hō’ē tino moni tei noa’a mai nā roto i te mau « mātini ’ōpere » o te ’ōpuara’a Tūrama i te ao nei, i te hō’ē fare mā’a, i te hō’ē fare tōtauturu e rāpa’au i te mata o te mau tamari’i, ’e i te hō’ē pū tītīhoria. E 2,3 miriōni tārā marite noa ïa tei noa’a mai i roto i te mau mātini i Arizona, New York, ’e Utah (Marite), ’e i London (Peretāne), ’e i Manila (Philipino), ’e tei hōro’ahia i te mau pū tōtauturu nā te ao nei.