Mga Tuku, mga Gangis, ug Panahon uban sa mga Anak

Ni Nancy Thomas

Ang tagsulat nagpuyo sa Maine, USA.

Wala gayud ako makahanduraw nga ang magkamang nga mga mananap [reptiles] adunay malungtarong epekto sa akong relasyon ngadto sa akong anak.

Ang akong anak nga si Dallin ganahan kanunay og magkamang nga mga mananap. Ako, sa laing bahin, dili gayud ganahan niini. Gitugutan siya nga makaangkon og magkamang nga mananap sa kondisyon nga ang bisan unsa nga iyang pilion masulod ra sa hose sa vacuum, kon in kaso makagawas kini sa iyang hawla samtang anaa siya sa eskwelahan. Gikonsiderar namo ang pipila ka mga kapilian, gikan sa mga baki ngadto sa mga iguana, hangtud nga nakahukom kami sa duha ka itomon nga pintuk-pintok nga mga tuku [leopard geckos] nga ginganlan og Fuzz ug Diane.

Ang bag-ong mga binuhi ni Dallin nahisakop sa among pamilya sa dihang siyete anyos pa siya. Usa ka aspeto sa pagpanag-iya og mga tuku nga wala nako dahuma mao ang panginahanglan sa pagpakaon kanila og mga gangis—buhi nga mga gangis—kausa matag semana. Sulod sa mga katuigan si Dallin ug ako mamalit og buhi nga mga gangis. Dili kini kanunayng sayon, kasagarang nahitabo sa gabii samtang naningkamot nga makaapas sa oras sa dili pa manira ang tindahan sa mga mananap.

Si Diane nabuhi lamang og tulo ka tuig, apan si Fuzz nabuhi sulod sa daghang katuigan, himsog ug malipayon. Sa hinapos nga bahin sa senior year ni Dallin sa high school, gisangunan siya sa paghatag og demonstrasyon alang sa iyang klase sa pangpubliko nga pagpamulong [public speaking]. Nangayo siya og mga ideya gikan sa akong bana ug kanako. Gisugyot namo nga hisgutan niya ang pintuk-pintok nga mga tuko tungod kay daghan na kaayo siya og nahibaloan mahitungod niini ug mahimo niyang dad-on si Fuzz aron mapakita sa klase. Gisultihan dayon kami ni Dallin nga namatay na si Fuzz.

“Seryuso ka? Kanus-a man siya namatay?” Nangutana ko nga dili makatuo.

Gisultihan kami ni Dallin nga usa na ka semana nga namatay si Fuzz.

“Naa siya sa akong kwarto, apan ayaw kabalaka. Dili siya manimaho. Duha ka bag ang akong giputos niya.”

Human makakita sa among kakurat, mipasabut si Dallin, “Naghimo ko og eksperimento—gusto nako siyang makita nga madugta.”

Ang eksperimento ni Dallin sobra pa diay sa pagtan-aw lang niini nga madugta. Iyang langayon ang proseso pinaagi sa pagbutang ni Fuzz diha sa freezer sulod sa duha ka semana ug dayon ipagawas aron matunaw ug dugang nga madunot.

Paglabay sa usa ka tuig, sa dihang anaa sa iyang misyon si Dallin, akong gilimpyuhan ang freezer ug nakit-an si Fuzz, giputos gihapon sa duha ka bag, sa luyo. Tungod kay nangandam ko og pakete nga ipadala kang Dallin, nakahunahuna ko nga kataw-anan nga ipadala niya ang iyang gamay nga eksperimento. Mainampingon nakong gibutang si Fuzz sa usa ka kahon, giputos kini sa maanindot nga itum ug puti nga polka-dot nga papel, ug han-ay nga gibutang sa pakete ni Dallin nga adunay gamayng sulat nga nag-ingon, “Adunay surprisa sulod sa imong pakete.” Dayon mahinamon akong naghulat sa iyang tubag.

Mibalos og sulat si Dallin: “Nadawat na nako ang pakete. Salamat! Ako kining giablihan ug nakita ang mubo nga sulat mahitungod sa usa ka surprisa diha sa kahon, mao nga naghinam-hinam ko. Ang sunod nakong nasimhutan tukmang nagsulti kanako unsa ang anaa niana nga kahon. Mipahinumdom kini nako sa panahon nga mga usa ka tuig ug tunga ang milabay dihang misulod ko sa akong kwarto ug nakita ang akong higala nga magkamang nga mananap nga patay na. Ang baho mipuno sa among apartment sa misyonaryo. Salamat, Ma!”

“Naghunahuna ko mahitungod niana nga tuku sukad nakuha ko kini og balik,” misulat siya. “Dili kaayo sa tuko mismo, apan sa tanang panahon nga gigahin sa sakyanan matag semana aron mokuha sa mga gangis ug mobuhat sa uban pang buluhaton, maminaw sa imong mga ideya, mga istorya, ug sa imong pagpamatuod samtang diha sa sakyanan. Maayo kadto nga rason aron manglakaw ug makahigayon sa pagpakigsulti kanimo (dili hinoon kaayo ko mosulti, apan naminaw gyud ko).”

Pagpamalit og mga gangis. Kinsay nasayud nga mahimo na nga importante? Isip mga ginikanan dili nato maplano kanunay ang panahon sa atong impluwensya. Kasagaran nga mahitabo ra gayud kini. Tingali mahitabo kini samtang nagpakatulog kita sa atong mga anak magabii, dungan nga nagsakay sa ski lift, o naay giadto nga buluhaton gamit ang sakyanan. Kinahanglang mogahin kita og panahon uban sa atong mga anak.

Ang Manluluwas mipakita sa labing mahinungdanong ehemplo sa paggahin og panahon alang sa mga anak. Human sa taas nga adlaw sa pagtudlo sa mga Nephite, misugo si Kristo sa katawhan sa pagdala sa ilang gagmayng mga bata ngadto Kaniya. Miluhod Siya uban sa gagmay nga mga bata ug nag-ampo. Human sa pag-ampo, mihilak Siya. Ug dayon “siya mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila” (3 Nephi 17:21).

Kadto nga mga bata nasayud nga si Jesus nagmahal kanila. Andam Siyang migahin og panahon alang kanila. Naminaw Siya kanila, nag-ampo alang kanila, ug mipanalangin kanila. Kadtong nakasaksi niini napuno sa hilabihan nga gahum nga ang istorya mirekord, “Ang mata wala pa makatan-aw, ni ang dunggan makadungog, kaniadto, sa mahinungdanon ug kahibulongan nga mga butang diin kami nakakita ug nakadungog ni Jesus nga nakigsulti ngadto sa Amahan” (3 Nephi 17:16).

Ang impluwensya ni Jesukristo ngadto sa mga bata milungtad og mga henerasyon. Samtang mogahin kita og interes ug panahon sa atong mga anak, bisan kon miuban lang kita kanila sa pagpalit og mga gangis, hinaut nga ang atong impluwensya molungtad usab og mga henerasyon.