Kausaban sa Kasingkasing, Kausaban sa mga Higala

Pangalan gipugngan

California, USA

Isip tin-edyer, hilabihan ako kamasinupakon, ug milihok ako sa mga paagi nga nahisupak sa pagpadako kanako. Misugod ko sa pag-inom og makahubog sa dihang nag-edad ko og 13, ug pag-abut nako og senior year sa high school, moinom ko matag tapos sa semana.

Mosimba ko usahay aron maminosan ang mga komprontasyon uban sa akong mga ginikanan, apan matulog ra ko sa tibuok sakrament miting ug dayon moadto sa baybayon sa dili pa mag-Sunday School. Wala gayud malipay ang akong mga ginikanan sa akong kinaiya. Angay silang dayegon tungod kay gitahud nila ang akong kabubut-on samtang nagpadayon sa pag-awhag nako sa pagsunod sa ebanghelyo. Sa gihapon, wala akoy intensyon nga magpabiling aktibo sa Simbahan, ug siguradong wala ako maghunahuna nga magmisyon ko sa umaabut.

Human sa high school, mitambong ko og kolehiyo sa komunidad ug mipadayon sa akong masinupakon nga mga paagi. Apan usa ka gabii, nakahinumdom ko nga naghigda sa akong katulganan nga naghunahuna sa akong kaugmaon. Unsa nga matang sa babaye ang akong minyoan? Kon mopalayo ko sa dalan nga gusto sa Ginoo kanako, makabalik pa kaha ko? Bisan importante kaayo kini nga mga desisyon, wala ako madasig sa pag-usab.

Wala madugay human niana, mitambong ko og party sa luyo sa balay sa usa ka higala nga adunay ilimnong makahubog ug dako nga daob. Human makigkomedya kadiyot sa akong mga higala, mipalayo ko kadali ug mipiyong sa akong mga mata.

Sa dihang gibuka nako pag-usab ang akong mga mata, nianang higayuna klaro nakong nasabtan ang akong sitwasyon. Gitan-aw nako ang akong mga higala nga nagbinuang sa paglihok ug dili na nako gusto nga mahisakop niana nga grupo. Mibiya ko ug nakahukom nga mohunong sa pag-inom ug pag-adto og mga party. Nagpasabut kana nga kinahanglan nakong ilisan ang akong grupo sa mga higala, nga dili gayud sayon. Apan gihimo nako kini.

Kadto nga mga desisyon nakapanalangin sa akong kinabuhi. Sa katapusan nakaserbisyo ko og misyon ug nakatuman og daghang mga calling. Labing importante, naminyo ko og talagsaong babaye diha sa templo. Miresulta kini sa labing maanindot nga mga panalangin sa akong kinabuhi.

Bag-uhay lang nga nakabasa ko mahitungod sa pagkakabig ni Alma ug sa mga anak ni Mosiah (tan-awa sa Mosiah 27) ug sa unsang paagi nga nakasinati sila og dakong kausaban sa kasingkasing (tan-awa sa Alma 5:12–14), nga nahitabo sa usa ka bahin tungod sa matinud-anon nga mga pag-ampo sa amahan ni Alma. Dayon nakahunahuna ko sa akong mga ginikanan ug nakaamgo, paglabay og sobra sa 30 ka tuig, nga ang akong seryuso nga kasinatian niadto nga party maoy usa ka direkta nga resulta sa ilang mga pag-ampo.

Karon, isip ginikanan sa nanlimbasug nga anak, akong nakaplagan ang akong kaugalingon nga anaa sa susamang sitwasyon sa amahan ni Alma ug sa akong mga ginikanan. Apan sa pagpahisama sa mga kasulatan ngari kanako, aduna akoy pagtuo ug paglaum nga usa ka adlaw ang akong anak makasinati usab og kausaban sa kasingkasing.