Ko e Meʻa ʻOku Tau Tui Ki Aí
ʻOku Mau Tui ki he Hoko ʻo Haohaoá—ʻia Kalaisi
AFE MAI HĒ, FAI ʻE Del Parson
Lolotonga ʻene Malanga he Moʻungá, ne tuku mai ʻe Sīsū kiate kitautolu e fekau faingataʻa ke hoko ʻo haohaoá (vakai, Mātiu 5:48). Ka koeʻuhí ʻe pau ke tau tōnounou kotoá, ʻoku fēfē nai e ʻamanaki mai ʻa e ʻOtuá ke tau tauhi e fekau ko ení? Te tau lava ʻo ʻiloʻi e ʻuhinga ʻa e palōfita ko Molonaí, ʻaki ʻetau maʻu ha mahino totonu ki he finangalo ʻo e ʻOtuá maʻatautolú, ʻi heʻene pehē te tau lava ʻo hoko ʻo “haohaoa ʻia Kalaisi” (vakai, Molonai 10:32–33).
ʻOku ʻUhinga ki he Hā ke Hoko ʻo Haohaoá?
“ʻE lava ke liliu e foʻi lea faka-Kalisi ki he haohaoá ko e ‘kakato, ʻosi, tupulaki kakato’ (ʻi he Matthew 5:48, footnote b). Naʻe kole mai ʻe hotau Fakamoʻuí ke tau hoko ʻo kakato, ʻosi, tupulaki kakato—ke hoko ʻo haohaoa ʻi he ʻulungaanga mo e ngaahi tōʻonga fakaʻofoʻofa ʻokú Ne maʻu mo ʻetau Tamai ʻi Hēvaní.”1
“ʻOku lahi lahi hake ʻa e haohaoa ʻoku ʻamanaki mai ki ai ʻa e Fakamoʻuí maʻatautolú ʻi he ngāue ʻikai ha fehalākí pē. Ko e ʻamanaki taʻengatá ia ʻo hangē ko hono fakamatalaʻi ʻe he ʻEikí ʻi heʻene lotu hufekina ki heʻene Tamaí—ke lava ke fakahaohaoaʻi kitautolu mo lava ʻo nofo fakataha mo Kinaua ʻi he taʻengatá he kahaʻú.”2
“Ko ia ʻoku ou tui naʻe ʻikai ke fakataumuʻa ʻe Sīsū ʻEne malanga ʻi he tefitó ni, ke tāpalasia ʻaki kitautolu koeʻuhi ko ʻetau ngaahi tōnounoú. ʻIkai, ʻoku ou tui naʻá Ne fakataumuʻa ke fakalangilangiʻi e ʻOtua ko e Tamai Taʻengatá mo e meʻa ʻe lava ke tau maʻu mo Ia ʻi he taʻengatá.”3
“ʻE hanga ʻe he mahino lelei e ʻofa fakalelei ne foaki tauʻatāina ʻe he ʻEikí ki he kakai kotoa pē, ʻo toʻo atu meiate kitautolu ʻa e fakapuhopuhaʻá, maʻu halá, mo e ʻamanaki ʻoku fuʻu tōtuʻa ki he ʻuhinga moʻoni ʻo e haohaoá.”
ʻEletā Gerrit W. Gong ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Hoko ʻo Haohaoa ʻia Kalaisí,” Liahona, Siulai 2014, 42.