ពាក្យចុងក្រោយ
« កុំឲ្យខ្លាចអ្វីឡើយ ពីព្រោះយើងនៅជាមួយ »
ដោយអែលឌើរ ដាវីឌ អេ បែដណា
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញមកពីសុន្ទរកថាមួយដែលបានថ្លែងនៅសាកលវិទ្យាល័យ ព្រិកហាំ យ៉ង់–រដ្ឋហាវ៉ៃ កាលពីថ្ងៃទី ១៥ ខែ ធ្នូ ឆ្នាំ ២០១២ ។
មានគ្រាមួយ អ្នកដឹកនាំកងទ័ពដ៏ល្បីល្បាញម្នាក់បានសង្កត់ធ្ងន់ថា ៖ « ចូរកុំទទួលការទូន្មាន [ ពី ]ការភ័យខ្លាចរបស់អ្នកឡើយ » ។១
ពេលយើងពិចារណាអំពីអ្វីៗ ដែលកំពុងកើតឡើងនៅជុំវិញយើងទាំងអស់គ្នាសព្វថ្ងៃនេះ យើងអាចឃើញហេតុផលជាច្រើនដើម្បីភ័យខ្លាច មានចិត្តស្ទាក់ស្ទើរ ហើយឆ្ងល់ថា តើអ្វីៗនៅក្នុងជីវិតយើងអាចកើតឡើងតាមក្តីរំពឹងជាយូរដែលយើងប៉ងដែរឬទេ ។
អ្នកអាចមានសំណួរ ឬខ្វះទំនុកចិត្តលើសមត្ថភាពរបស់អ្នកដើម្បីទទួលជោគជ័យខាងសាច់ឈាម និងខាងវិញ្ញាណ ។ ប្រហែលអ្នកឆ្ងល់ថា តើការសន្យារបស់ព្រះអម្ចាស់អំពីការជួយជ្រោមជ្រែង និងការដឹកនាំ—ដែលអ្នកបានដឹង និងទទួលស្គាល់រួចទៅហើយនៅក្នុងជីវិតមនុស្សជាច្រើនផ្សេងទៀត—នឹងកើតឡើងក្នុងជីវិតរបស់អ្នកដែរឬទេ ។ អ្នកអាចពុំប្រាកដប្រជាអំពីការស្វែងរកឱកាសមួយ ដោយសារអ្នកពុំអាចមើលឃើញពីរឿងលម្អិតទាំងអស់អំពីរបៀបដែលកិច្ចការនានានឹងកើតឡើងនោះទេ ហេតុដូច្នោះហើយ អ្នកមានចិត្តស្ទាក់ស្ទើរក្នុងការចាប់ផ្តើម ហើយដើរលើផ្លូវនោះ ។ ឬអ្នកប្រហែលជាខ្វាយខ្វល់អំពីការធ្វើកំហុសមួយដែលអ្នកមិនបានអនុវត្តតាមសេចក្តីជំនឿ ហើយបន្តឈានទៅមុខ ហើយបង្កើននូវភាពដូចគ្នានៃបរាជ័យដែលអ្នកភ័យខ្លាច ។
ការមិនទទួលដំបូន្មានពីសេចក្តីភ័យខ្លាចរបស់យើង វាមានន័យយ៉ាងសាមញ្ញថា យើងពុំអនុញ្ញាតឲ្យការភ័យខ្លាច និងភាពមិនប្រាកដប្រជាកំណត់ដំណើរជីវិតយើង ដែលជះឥទ្ធិពលអវិជ្ជមានដល់លក្ខណៈ និងឥរិយាបថរបស់យើង មានឥទ្ធិពលមិនល្អលើការសម្រេចចិត្តសំខាន់របស់យើង ឬបង្វៀង ឬបង្វែរយើងចេញពីអ្វីៗទាំងអស់ក្នុងពិភពលោកនេះដែលមានគុណធម៌ គួរឲ្យស្រឡាញ់ ឬអ្វីដែលល្អ ។ ការមិនទទួលដំបូន្មានពីការភ័យខ្លាចរបស់យើង មានន័យថា សេចក្ដីជំនឿទៅលើព្រះអម្ចាស់ព្រះយេស៊ូវគ្រីស្ទ គ្រប់គ្រងលើការភ័ចខ្លាចយើង ហើយយើងឈានទៅមុខដោយខ្ជាប់ខ្ជួននៅក្នុងទ្រង់ ។ ការមិនទទួលដំបូន្មានពីការភ័យខ្លាចរបស់យើង មានន័យថា យើងទុកចិត្តលើការណែនាំ ការអះអាង និងពេលវេលារបស់ព្រះនៅក្នុងជីវិតរបស់យើង ។ ខ្ញុំសន្យាថា យើងម្នាក់ៗអាច ហើយនឹងមានពរជាមួយនឹងការដឹកនាំ ការការពារ និងអំណរយូរអង្វែង ពេលយើងរៀនដើម្បីមិនទទួលដំបូន្មានពីការភ័យខ្លាចរបស់យើង ។
ពេលយើងអនុវត្តសេចក្តីជំនឿលើព្រះគ្រីស្ទ ហើយទុកចិត្តលើការសន្យារបស់ទ្រង់ នោះយើងអាចដើរទៅក្នុងភាពងងឹត ជាមួយនឹងការធានាអះអាងយ៉ាងមុតមាំថា ផ្លូវរបស់យើងនឹងត្រូវបានបំភ្លឺ—យ៉ាងហោចណាស់គ្រប់គ្រាន់ល្មមដើម្បីចាប់ផ្តើមជំហានបន្ទាប់—បន្ទាប់មកទៀតជំហានបន្ទាប់—ហើយជំហានបន្ទាប់ទៀត ។
យ៉ូសែប ស៊្មីធ បានប្រកាសថា « យើងគ្មានអ្វីត្រូវភ័យខ្លាចឡើយ ប្រសិនបើយើងមានចិត្តស្មោះត្រង់នោះ » ។២
ប្រធាន ថូម៉ាស អេស ម៉នសុន ( ១៩២៧–២០១៨ ) បានទូន្មានថា ៖ « ចូរកុំខ្លាចឡើយ ។ ចូរមានចិត្តរីករាយ ។ អនាគតគឺភ្លឺត្រចះត្រចង់ដូចជាសេចក្តីជំនឿរបស់បងប្អូនដែរ » ។៣
ពេលអ្នកប្រឈមមុខនឹងអនាគតអ្នកដោយសេចក្តីជំនឿ នោះព្រះអង្គសង្គ្រោះនឹងយាងទៅពីមុខអ្នក នឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់ទ្រង់នឹងសណ្ឋិតនៅក្នុងដួងចិត្តរបស់អ្នក ( សូមមើល គោលលទ្ធិ និងសេចក្ដីសញ្ញា ៨៤:៨៨ ) នៅក្នុងកិច្ចខិតខំដ៏សុចរិតទាំងអស់របស់អ្នក និងពេញមួយជីវិតរបស់អ្នក ។