Wok blong Givhan I Blong Lukluk Ol Narawan olsem we Sevya i MEKEM

Jisas i spendem fulap taem blong Hem wetem olgeta we maet ol pipol oli lukluk olgeta long wan defren wei; Hem i luk ol tabu paoa we oli gat.

Long ol traehad blong yumi blong givhan olsem Sevya, bae oli askem yumi blong givhan long wan man we i defren long yumi. Hemia i givim wan janis long yumi blong lan mo gro.

Kalja, edukesen, kala blong skin, ekonomi, yia, fasin blong long taem finis mo fasin blong naoia,o ol nara samting we i defren we i save mekem wan man i save jajem wan nara man bifo hem i save man ia. Blong jajem wan man bifo yu save hem i stamba blong no laekem man, mo Sevya i wonem agensem hemia (luk long 1 Samuel 16:7; Jon 7:24).

?Yumi save lukluk i go bitim ol defren fasin blong ol nara man mo lukluk ol narawan olsem we Sevya i lukluk? ?Olsem wanem nao bae yumi lan blong lavem ol narawan long huia olgeta mo huia bae oli kam olsem?

Lukluk mo Lavem

Baebol i talem wan stori we yumi evriwan i save gud long hem abaot wan rij yang man we i askem Jisas hao blong kasem laef we i no save finis: “Nao Jisas i lukluk stret long man ya, mo i lavem hem tumas, i talem se, “Wan samting nomo i stap we yu yu no mekem yet. Yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi”(Mak 10:21).

Taem we Elda S. Mark Palmer blong olgeta Seventi i stadi long skripja ia sam yia i pas, wan niu pat blong stori ia i bin kamaot gud long hem.

“‘Nao Jisas i lukluk stret long man ya, mo i lavem hem tumas.’

“Taem mi harem ol toktok ia, wan klia pikja i fulumap maen blong mi long Lod blong yumi i stop mo lavem yangfala man ia. Lavem— i olsem blong lukluk moa dip i go insaed long sol blong hem, mo blong luk save ol samting we hem i gud abaot hem mo wanem gudfala samting we hem i bin gat finis, mo tu, blong luk save ol bigfala nid blong hem.

“Afta ol simpol toktok ia—Jisas i lavem hem.Hem i filim wan gudfala lav mo sore long gudfala yang man ia, mo from se lav ia mo wetem lav ia, Jisas i askem fulap moa long hem. Mi pikjarem wanem bae mi filim olsem yangfala boe ia blong filim lav ia we i strong raon long hem iven taem oli askem blong mekem,wan samting we i bigwan mo i had blong mekem blong salem evri samting we hem i gat mo givim long olgeta we i pua. …

“[Mi askem miwan ] ‘?Olsem wanem nao bae mi save gat Fasin blong Kraes blong gat lav mekem se [ol narawan] i save filim lav blong God tru long mi mo gat wan strong tingting blong wantem jenis?’ ?Olsem wanem nao mi lavem [wanwan man, woman raon long mi] long semmak wei we Lod i lukluk rij man ia, blong stap lukluk olgeta long huia olgeta mo huia oli save kam, be i no blong wanem oli stap mekem o no stap mekem. ?Olsem wanem mi save kam moaolsem Sevya?”¹

Lanem blong Lukluk long Ol Narafalawan

Lanem blong lukluk long ol narafalawan olsem we Sevya i mekem i save karem ol rij blesing. Hemia sam long ol tingting we i save helpem taem yumi wok from ol kol ia.

Kam blong Save Olgeta
Traehad blong kam blong save gud pipol moa bitim wanem yu bin save abaot olgeta. Luk save se blong bildim ol rilesensip i tekem taem mo fasin blong traehad blong wantem mekem, we i kam long hat. (Luk long Okis 2018 Prinsipol blong Wok blong Givhan atikol “Bildimap wan Gudfala Rilesensip” blong help.)
Lukaotem yuwan
Lukluk gud long ol jajmen we yu minim blong mekem o yu no save se yu stap mekem. Luksave ol tingting we yu gat abaot ol narafala man mo traem blong andastanem from wanem nao yu filim olsem abaot olgeta.
Holemtaet Jajmen
Luksave se wanem oli stap go tru long hem i no talemaot hamas i impoten long wanwan man, woman. Putum yuwan long wanem oli stap gotru long hem mo traem blong tingting hao nao yu wantem wan narawan i lukluk long yu sapos yu stap long sem hadtaem ia. Blong seperetem joes blong wan man mo fasin blong hem long tabu valiu mo tabu paoa blong olgeta i save helpem yumi luk olgeta olsem we bae Sevya bae i luk olgeta.
Prea from olgeta
Prea from olgeta evri taem mo talem nem blong olgeta mo from fasin blong save wet long taem blong save mekem tru frensip. Lukluk gud mo prea long hao yu givim seves blong yu long olgeta. ?I gat wan samting i defren long wanem yu stap mekem mo wanem oli rili nidim?

Jisas i Spendem taem blong Hem wetem ol pipol we oli gat plante defren kaen blong eksperiens: ol rij man, ol puaman,ol rula, mo ol pipol we oli semmak nomo. Hem i wan viktim blong ol jajmen we oli no stret taem ol nara man oli lukluk long Hem mo Hem i pua o i stap go tru long ol samting we i no stret. “Yumi no save talem se bodi blong man ya i naes. … Nao oli yumi lukluk nogud long hem, mo i no gat man i lukluk i go long hem”. (Aesea 53:2–3).

Lukluk long Fasin blong Kraes

Wan sista i serem stori ia blong stap lan blong lukluk long neiba blong hem wetem wan ae we i fasin blong Kraes:

“Julia (nem oli jenisim) i wan neiba blong mi mo hem i nogat fren. Oltaem hem i harem nogud mo i stap kros. Nomata long hemia, mi tingting blong kam fren blong hem. Be i no wan fren we i pas nomo, be wan tru fren. Mi toktok long hem enitaem mi luk hem mo mi soem se mi intres long wanem hem i stap mekem. Sloslo, mi stap krietem wan frensip wetem hem, we i karem glad i kam long hat blong mi.

“Wan dei, mi disaed blong visitim Julia mo askem desisen blong hem blong no kam long Jos.

“Mi lanem se hem i no gat famli o famli memba i stap kolosap. Brata blong hem nomo, we i stap longwe long hem, i stap ringim hem wan taem long wan yia tru long fon. Taem mi stap lisin long hem i stap serem ol konkon filing blong hem, kros, mo tingting i fasfas abaot ol famli blong hem mo abaot Jos, wan filing blong sore mo lav blong sista ia i kam strong long mi we mi no save lego. Mi bin filim ol soa blong hem mo ol tingting fasfas blong hem. Mi jes luksave olsem wanem i fil blong stap stap hemwan. I olsem we mi harem wan smol voes i talem biaen long mi: ‘Mi lavem hem tu. Lavem mo respektem hem.’

“Mi sidaon mo lisin kasem hem i nomo gat samting blong talem. Mi filim lav mo sore long hem. Sista ia we i neva save hao nao blong i filim lav. I no longtaem nomo, mi andastanem gud hem moa. Mi talem tangkyu long hem blong letem mi visitim hem, mo mi lego hem wetem wan hag mo lav mo respek blong mi long hem. Hem bae i neva save se hamas nao ol gudfala filing we i bin tajem mi long taem blong visit ia. Papa long Heven i openem ol ae blong mi mo tijim mi se mi mi gat paoa ia blong save lavem mo save mekem fasin blong sore i kam antap. Mi tingting strong long wanem mi bin faenemaot wetem sista ia mo se bae mi no wan fren blong hem nomo be wan famli longhem tu.”

Hem i wan tabu janis blong wan narafala wan isave invaetem yu insaed long laef blong olgeta.Wetem prea, fasin blong save wet long taem,mo wetem help blong spirit, yumi save lan blong mekem olsem wetem moa fasin blong Kraes.