Ukpebnkpo Unwam Ofiong June, 2019
Unwam Edi Ndikut Mbon-efen nte Andinyanga Anamde
Jesus akabiat ediwak ini Esie ye mmo oro ekekutde nte isen; Enye ama okut edisana uduak mmo.
Ke udong nnyin ndinam utom nte Andinyanga, ekeme edidoho nnyin inam utom ino mbio efen. Emi eyeno nnyin ifet ndikpep nnyung nkori.
Edu unam nkpo, ifiok nwed, ebiet otode, idagha uwem, isua emana, akani ye obufa edu uwem, ye mme nkpo eken ekeme edinam inyene ifiok ibanga mmo. Edito mbat se owo edide inyeneke iwuk, ndien Andinyanga ono ewuho abanga emi (se 1 Samuel 16:7; John 7:24).
Nte imekeme ndifumi odusat nte Andinyanga anamde? Nnyin idikpep didie edima mbio efen nte mmo etiede ye se mmo ekemede ndidi?
Edi-se-se nnyung Mma
Bible eting abanga akparawa oro ekenyenede nkpo emi okobup-de mme nte imo idinam didie inyene nsi-nsi uwem: “Jesus nte okosuk-de ese onyung amade enye, ama oboho ete, Afo emenana nkpo kiet: ka ke nyam kpukpru se enyenede nno mme ubuene, do afo eyenyene nti nkpo ke heaven: nnyung, dimen cross fo tiene mi” (Mark 10:21).
Kini Elder S. Mark Palmer kiet Seventy ekekpep-de abanga iko emi mme isua ebede, obufa ifiok mbuk emi ama oworo ada.
“‘Nte Jesus ekesede amama enye.‘
“Nte nkop-de mme iko emi, oyoho ndise Obong ama oduk ekikere mi nte enye osuk ekerede onyung osuk esede akparawa emi. Edisese- ke ndiwuk enyin nse nsim ukpong esie, editim mfiok mbanga eti udong esie ye ukeme, ye ediyarade mfiok akwa unana esie.
“Do mem-mem iko—Jesus ama ama enye. Enye ama okop ata ntotuongo ima ye mbom ono akparawa emi, ndien ke ntak ima emi ye uto ima emi, Jesus ama otim obup enye. Mma nda nkut nte eketiede akparawa emi kidem ndikut uto ima emi kini esuk edohode enye anam ata okosong nkpo ke ndiyam ofuri-ofuri se enyenede nno mme ubuene. …
“[Mma mbup idem] ‘Mme ndinam didie nyoho-idem ye ima Christ man [mbio efen] ekutde ima Abasi kidem mi ekeme ndikpuhore?‘ Mkpekeme didie ndikut [mmo oro ekanare mi ekuk] ke usung emi Obong okokut-de akparawa oro ekenyenede nkpo, ndikut mmo nte edide emi ebede okpong se enamde ye se minamke? Mkpekeme nditie didie nte Andinyanga?”1
Edikpep ndikut mmo efen
Edikpep ndikut mmo efen nte Andinyanga anamde ada nti utip edi. Se itienede mi ekeme ndiwam nte inwanade ndikan nam emi.
-
Eyom usung Ediongo Mmo
Sin idem nte okpofiok-de mme owo akan edisuk ndada nse. Fiok ete ndinyene ebuana ye owo ada ini ye utom k’esit. (Se Ukpebnkpo Unwam eke Ofiong August 2018 ”Edibop Nti Ebuana” ebo unwam.) -
Dungo-re Idem-fo Se
Ting enyin se ubiere-ikpe emi esede anam ye onyung anamde ke ekikere. Tim bat se ekerede abanga mmo efen nyung domo edifiok nte afo ekerede ntre abanga mmo. -
Mum ubiere-ikpe fo Kama
Fiok ete ke nte nkpo etiede iyak-ke etim efiok se owo edide. Men idem fo domo ke mme itie owo oro nyung se nte ekpetie-de fi k’idem edieke afo odude ke uto itie oro. Edidianga-de mbumek owo mkpong se obot esinde mmo k’idem eyenam nnyin ikut mmo nte Andinyanga okutde. -
Ebong Akam man ema Mmo
Ebong akam ekot enying mmo kpukpru ini enyung enyene ime ndisik mkpere nte eti ufan. Eting enyin ke akam ese utom unwam mbufo. Mme nte ufang odu ke se afo anamde ye se mmo etimde eyom?
Jesus akabiat ini Esie ye kpukpru oruk owo: mme enyene nkpo, ubuene, mme andikara, mbon usuhore itie. Mmo ke esede Enye ikebat-ke Enye nte nkpo emi enyenede se owowrode ndomo-kiet otode ke usuhore itie Esie. “Kini nnyin idikut-de enye, nkpo idibiongo-ke nnyin ndiyom enye. … Ema esuene enye, edi nnyin ibatke enye ke nkpo” (Isaiah 53:2–3).
Nkukut Ebietde eke Christ
Eyen-eka nnwan kiet ama ono mbuk edikut mboho-idung ke enyin Christ:
“Julia (ekpuho enying emi) okodung adiana mi ndien eketie nte enye inyeneke ufan. Enye eketie ifut-ifut ye ke iyaresit. Okposuk ntre, mma nyom ndidi ufan esie. Emi ikidige tek-tek ufan, edi ata eti ufan. Mma nsi-neme nneme nte nkut-de enye, nsik mkpere se enye anamde. Sung-sung, mma ntongo usung ufan emi okonode mi idara ke esit.
“Usen kiet, mma nduak ndisobo ye Julia mbup ntak enye mimaha ndidi ufok Abasi.
“Mma nkop ke ikot ufok ye mbon esie ikpereke. Nkokure eyen-eka eren esie, odung-de ke ata ayan usung esiting iko ke phone usen-kiet ke isua ye enye. Nte nkekpang-de utong nno idot-idot iko iyatesit ye unam-ukak ufokemana ye ufok Abasi nto enye, mbom ye ima eyeneka nnwan emi ama enehede omum mi. Mma nkop ubiak esie ye nam-nkak. Mma ndifiok nte ido ikpong esie asanga-de. Eketie nte nkop sung-sung uyo odohode: ‘Ami mmama enye nko. Ma nyung kpono enye.’
“Ami mma ntie nkop tutu enye inyeneke nkpo efen editing. Ami mma nnyene ima ye mbom mbanga enye. Enye ekedi eyen anwan emi mifiok-ke se ekot-de ima. Ke usop-usop mma ndinehede mfiok enye ofon. Mma nkom enye nte enyimede yak ndise imo, do mma mfat enye ke ima ye ukpono esie. Enye idifiok-ke nte ntuk esie okomumde mi ke ami ediki-ka oro. Ete ke Heaven ama atat mi enyin onyung ekpep ke mmenyene ukeme ndima diana ye nditua owo mbom. Ami mmebiere ke ufan nnyin itoho ima ikpong-ikpong edi ke ndi ata owo ufokemana esie.”
Edi edisana nkpo owo ndikot fi nsin ke uwem esie. Ke akam, ime, ye unwam otode Spirit, nnyin imekeme ndikpep edinam ntre ke mbiet nkukut Christ.
© 2019 by Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Ikɔ Mbakara: 6/18. Enyime ndikabare: 6/18. Edikabare eke Ministering Principles, June 2019. Efik. 15767 553