Osisechakl er a Odingel, Ongelolem el Buil 2019

A Oldingel a Sel Domes er a Rebebil el Diua Osobel

A Jesus a chiloit a betok el temel lobengterir tirkel mleues el ngodech; ng ulemes er a mo chedaol el tetelelir.

Chelsel a urered el mo oldingel el diua Osobel, e kede locha mokedong el mo oldingel er a chad el ngii a ngodech er kid. Tia meskid a techall el mo mesuub e mukeroul.

Siukang, skuul, belual, udoud, rekil, omerellel ra ngaramong me chelechang, malechub a ngii di el ngodech el teletael a sebechel rullid el mo mesaod er a ta er a chad ruchei er a bo dodengelterir. Tial di mesaod er a rechad a uchelel a omeliakl, me a Osobel a omeklatk el kirel (mesa 1 Samuel 16:7; Johanes 7:24).

Ng sebeched el bai diak dometab aikel ngedechel e bai mesterir a rebel el uai a Osobel a lesterir? Ng mekera e sebeched loubeltikelreng el mo er sel meral tir me sel tir a sechecherir el mo uai ngii?

Ongengii e Oubeltikelreng

A Bibilia ouchais er a dodengelii el cheldechedechal a tal merau el kekerel chad el uleker el kmo ng mekera e mo nguu a diak a ulebengelel el klengar: “Me a Jesus a mle ongengii e ulebeltikelreng el mo er ngii, e dilu er ngii el kmo, A tara tekoi el diak er kau: morael, el mo oterau a rokui el kloklem, e mrous er a remechebuul, mel borngii a meringel chad el kloklem er a babeluades: e mei, em chelengii a kerus, e moltirakl er ngak” (Mark 10:21).

A Elder S. Mark Palmer er a Rokeuid er a losuub er tial bades ra bebil rak ra memong, e a beches el telengtengil tial cheldecheduch e mlo bleketakl el mo er ngii.

“‘Me a Jesus a mlo ongengii e ulebeltikelreng el mo er ngii,.’

“Sera krenges a ikal tekoi, e ak milsa er a chelsel a uldesuek a Rubak el mlo chelellakl e chongengii ng kal kekerel chad. Ongengii—el ngii a dmolech osengel el subechii ra chaidirengul, miltebengii el kedung e mesa sel sebechel mo uaingii, e dirrek el mesa sel kot el lousbech er ngii.

“Me a ikal bleketakl el tekoi—a Jesus a ulebeltikelreng el mo er ngii. Ng mlo melechesuar a kmal berroad el beltikelreng me a chebechub el mo er a ngkal ungil ngeasked el chad, me a uchul tial beltikelreng me a lobengkel tial beltikelreng, Jesus a uleker e rulii uai ngii. A kulemes el kol ua ngera blo lomelchesiu ng kal kekerel chad el mlo iliuekl er tial bedengel a beltikelreng ngii mesel lolengit er ngii el mo meruul ra imong el meringel tekoi el molterau a kloklel e merous er a remechebuul. …

“[A kuleker er ngak] ‘Ak mekera e mo mui er a beltikelreng er a Kristo me a [rebebil] bolsebecherir lomelchesiu er a beltikelreng er a Dios lokiu ngak me bol sorir el mo mengodech?’ Ak mekerang chongengii [a derta el chad el ngar bita er ngak] lokiu osisiu el teletael el Rubak a mlo chongengii ngika el merau el kekerel chad, e omes er sel meral tir me sel tir a sebecherir el mo uaingii, e bai diak el sel tir a meruul er ngii malechub eng diak loruul? Ng mekera sebechek el mo uaia Osobel?”¹

Mesuub el mo Omes er a Rebebil

A mesuub el mo omes er a rebebil el diua Osobel a meskid a mgarbab el sengk. A ikakid a bebil er a uldasu el sebechel lolengeseu sel de oureor el kirel tial moktek er kid.

Bo modengelterir
Bol blak a regnum el mo medengelterir a rechad lengelakl er a ikel di momes er a ikrel. Bo motebengar el kmo a omeleketek el deleuill a nguu a klou el taem me a meral omeruul. (Mesa August 2018 babier er a Osisechakl er a Odingel “Meleketek er a Mera el Deleuill” el kirel a ngesou.)
Bo Mungil Mesekau
Bo momes a tekoi el mosaod el kirir a rechad el ngii a durengum ma diak el durengum. Momtab er ra rengum el kirir a rechad e molasem el moungil medengei el kmo ngera meke omelchesiu el uaisei el kirir.
Lak Morritel
Motebengii el kmo a teletael el chad a ngara chelsel a diak el ochotii a belkul a chad. Ka bo momes er kau el uai tir e momes el kmo ng soam a chad a lomes er kau el uangerang alsekum ke seluk ra chelsel a osisiu el teletael. A cheklii a omelilt me a blekerdelel a chad er a ultutelir me a mo chedaol teletelir a sebechel ngosukid lomes er tir el diuai a Osobel.
Moluluuch el mo Oubeltikelreng el mo er Tir
Blechoel meluluuch el kirir lomasech a ngklir me a kirel a kllou el reng el mo omekdubech a meral deleuill. Moba nglunguuch lomes omosiou. Ngar ngii a urebetakl er aikel moruul me a ikel meral lousbech?

A Jesus a chiloit a temel lobengterir a rebekbedengir a rechad: a remeteet, re mechebuul, re mengedereder, me a re di chad ra beluu. Ngii a mle cheldil a cheleuid el uldesuir a rechad er a lomes er Ngii me a chelebulel malechub eng diak el belsachel el teletael el le seluk ra chelsel. “Sel desang, eng diak a ngeral lochau a rengud el morngii. … Ke de ultubii, e odngeklii” (Isaia 53:2–3).

Ues el Diua Osengel a Kristo

A tal odos a ulechais er tial chelecheduch er a bolmeduch lomes er a tonari er ngii loba mad el diua teletelel a Kristo.

A Julia (delibech el ngakl) a kiliei er bita er ngak e ua le mlak a re sechelil. Ng mle blechoel osengel el diak lungil a rengul malechub eng kesib a rengul. Eng di, ngak a mle tibir el mo sechelil. Ng diak el kora di ikel sechelei el di mei e merael, ak meral sechelil. Ak milengedecheduch er ngii sel ta el kisang e ousemeriar er a ikel kmong ngerang el ngii a meruul. Omerolel mong, e ak milkdebechii a ungil deleuill lobengkel, el mlo dneu a renguk er ngii.

“A tara klebesei, e a kulemsadu el mo oldingel er a Julia e oker er ngii el kirel a uldesuel el diak el soal mora ikelesia.

‘Ak mlo medengei el kmo ng dimlak a ta el telungalek er ngii malechub a chedal el kmeed. A di ta el ta er ngii, a ochedal el kiei ra cheroid, el mengedecheduch er ngii el ta er a ta el rak er a dengua. Sera kurrenges er ngii louchais a mekngit el mlara rengul, ngasechereng, me a chelecherd el reng el kirel a telungalek er ngii me a Ikelesia, e a kulmelchesiu el klechubechub me a beltikelreng el mor ngikal odos a mle er ngak el kmal mesisiich. Ak mlo omelchesiu er a ringel el mla er ngii me a chelecherd el reng. Ak mlo mtebengii el mle sabisi er a klengar er ngii. Ng uaia blek rengesii a medemedemek el tekoi rullek: ‘Ng betik a renguk er ngii el dirrek. Moubeltikelreng e molngesenges el mo er ngii.’

“Ak dillengchokl e orrenges el mocha diak a tekingel. Ak mlo omelchesiu a beltikelreng me a klechubechub el mo er ngii. Ng kang a odos el dirkak a tang me bolodengelii el kmo ngua ngera a beltikelreng. Ak di mle mereched el mo dmolech a klemedengei er ngak er ngii. A kuluureng a sulel el milchikak me ak mlo odngelii, me se ra kurael e ak milchulii e msa beltkil a renguk me a olngesenges. Ng diak a tal bolodengei el kmo ngii a rirtechii a renguk er tia el odingel. A Chedam er a Babeluades a mla mekengii a medak e osisecheklak el kmo ng sebechel el oubeltikelreng loba klou el klechubechub. Ng ngarngii er a renguk el diak di ksechelil ak dirrek el mo telungalek er ngii.”

Tiang cheddaol tekoi el nguu ongit el mo soiseb er a klengar er a ta er a chad. A oba nglunguuch, kllou el reng, me a ngesou er a Reng, eng sebeched el momeduch el meruul a osisiu lokiu a klou el ues el diua Kristo.