Padahk kan en Doadoahk en Papah, Suhn 2019

Doadoahk en Papah Iei Kilang Mehteikan duwehte Sounkomouro ah kin ketin Mahsanih Irail

Sises ketin doadoahngki Sapwellime ahnsou laud ong irail kan me kin weksang mehteikan; E ketin mahsanih arail anahn en dahme irail kak wiahla.

Nan atail doadoahk en papah me duwehte Sounkomouro, kitail mwein pahn kak pwukoahki en papah emen me pahn weksang kitail. Met e kiheng kitail ansou mwahu en esehla oh keihrda.

Palien tiahk, kasukuhl, mehn iawasa, momour en wasa ehu, sounpar, wiewiahn mahs de ansou wet, de soangen wekdeklah kan me pahn kak en kahreda en mengei en kasawih emen aramas mwohn atail kin eseiraila. Mehn kesou wet iei e sang nan mongiongetail, oh Sounkomouro kin uhwong met (kilang 1 Samuel 16:7; Sohn 7:24.

Kitail kak kilangwei oh dehr kasawih dahme nekier oh kilang mehteikan duwehte Sounkomouro ah kin ketin mahsanih irail? Ia mwomwen atail pahn kak esehla en poakoahng mehteikan ni arail wiewia oh ihs me irail men wiahla?

Kilang oh Poakoahng

Pwuhk sarawi koasoia duwen soi en pwutak pwulopwul kepwehpweh men me kalalapak ia mwowen ah pahn alehdi mour soutuk: “Sises ahpw ketin komoalehdi ni limpoak oh mahsanihong, Mehteieu me luhwe, kohwei netikihla mehkoaros me ke ahneki, ke ahpw kihong pweine ko me paisuwedlahr kan; omw pai ahpw pahn laud mehlel nanleng; oh kohdo oh kapaikada lohpwuo oh idawehniehdo” Mark 10:21.

Ni ansou me Elder S. Mark Palmer onopki iren pwuhk sarawi wet pahr kei samwalahro, e wadekada wasahieu nan irehu me kapw ong ih.

“Eri Sises ahpw mahsaniada ni Ah poakoahng.’

“Ni ansou me i rong mahsen pwukat, kilel sansal ehu ahpw mihla nan ai madamadau ai kilang Kauno ah uhdi oh mahsaniadapwutak pwulopwul menet. Mahsaniada--iei kilang oh kasawih mwahu souleng men, pohnese ah wiewia mwahu kan oh ah koahiek, oh patehng dahme e kin keieu anahne.

“Oh ni mahsen mengei kan--Sises poakoahng ih. E ketin kehn limpoak laud ohng pwutak pwulopwul menet, oh pwehki sang ni limpoak wet oh ong ni limpoak wet, Sises ketin peki mehkot laud sang reh. I medewehla pahn soangen pepehm da me pwutak pwulopwul menet direkihla sang ni songen limpoak wet ni ilek ehu me kohieng en wia mehkot me inen apwal ni eh pahn netikihla ah pai koaros oh kiheng me semwehmweh kan…

“[I pein idek rehi] ‘Ia mwomwen ai pahn kan direkihla limpoak en Krais pwe [mehtei kan] en kak kehn limpoak en Koht wet sang rehi oh inengieng en weliakapwala?’ Ia mwomwen ai pahn kilang [emen emen irail kan me mih limwahi] en duwehte Kauno ah kin ketin mahsanih pwutak pwulopwul kepwehpweu, ni atail pahn kilang irail ni mwomwarail oh ihs me irail men wiahla, ahpw kaidente dahme irail kin wihwia de sohte wia? Ia mwomwen ai pahn kak nantiheng en duwehla Sounkomouro?”¹

Esehla Kilang Mehteikan

Kapai laud kin kodohng irail akan me kin esehla kilang mehteikan duehte Sounkomouro ah kin kilang irail. Iet soangen wiepeh kan me pahn kak sewesei kitail ni atail pahn nantiheng koadoahke kaskuhl wet.

Ese Iraila
Nantiheng en esehla aramas akan ni unsek. Ese me ni amwail pahn kin tapiada pehsepene e pahn kin anahne ahnsou oh ineng mehlel. (Kilang Oahkos 2018 kisin likou en Padahk kan en Doadoahk en Papah “Kawada Ehupene Mehlel kan” ong ni sawas.)
Kasawihuk Mahs
Tehk mwahu kadeik kan me ke wiewia sang ni pein nsenomw en inengieng wia de soh. Ntingihdi ire kan me sang ni pein amw madamadau me ke kin ahniki ong mehteikan oh song en wewehkihla dahme karehda ke ahniki songen pepehmo ong irail.
Ieremen Kadeik
Taman me imwilahn wiewia kan sohte kin kasalehda kamwahupen aramas emen. Na song medewe ma kumwail me mih nan arail kahpwalo oh medewe ia mwomwen ahmw pahn men aramas emen en kilang uhk ma kowe me mih nan songen irair wo. Katohrepeseng en emen eh pilipil oh wiewia sang ni dahme irail keieu kesempwalki oh dahme irail keieu mwahu loale kak sewese kitail en kilang irail duwehte Sounkomouro ah kin ketin mahsanih irail.
Kapakapki kumwail en Poakoahng Irail
Kapakapkin irail ansou koaros ni amwail pahn kin inda ederail oh en kak ahniki kanangamah ong ni keirdahn ehupene mehlel. Kapakap oh tehk mwahu sawas kan me kumwail kin wia. E mie wen wekpeseng ehu nan pwungen dahme kumwail wihwia oh dahme irail udahn anahne?

Sises ketin doadoahngki Sapwellime ahnsou ohng aramas wasa sohte lipilipil tohto nan Eh mour: me kepwehpweh kan, me semwehmweh kan, soun kou kosonned akan, oh aramas teikan. E ketin wia aramas emen me irail kin karaunlikamwehng ni arail kin kilang Ih oh sang ni arail kilang me Eh semwehmwe de sin mehkot sohte katepeh kan me irail kin kilang. “Ni ansou me kitail pahn kilang ih, sohte mehkot lingan me kitail pahn men alehsang… Kitail mwamwahliki, oh kitail kin pohnsehse pwe likamwete sohte mwahn ih mehkot”Aiseia 53:2-3.

Atail Kairoir en duwehte Krais

Riatail lih emen ehuki soi ehu me pid duwen kaskuhlki en kilang mehn mpeh nin duwen Krais ah kin kilang.

“Julia (ahd wet wekdeklahr) kin kousoan limwahi oh sohte kempoakepah. E kin kalapw mesen mwehl oh lingeringer. I mendahkihla mwo oh I lemehda ien wia kempoakepah. Kaidente ien wia kempoakepah ahpw kempoakepah mehlel men. I kin koasoaieng ansou koaros me I kin kilang oh kasalehieng me I pereniki dahme e kin wihwia. Ekis ekis I kairada ai limpoak ehng ih ni ai wia kempoakehpah, oh i ahniki peren nan ai mongiong.

“Ehu rahno, I lemehda ien kohla pwarek Julia oh idek reh duwen ah pilipil en sohte iang sarawih.

“I esehda me sohte ah peneinei de kiseh me karanih ih. Rie pwutakteh men me kin mihmi wasa doh, kin koasoaieng ih pakte ehu nan pahr ehu. Ni ai wie rongorong ah wie kaskasalehda ah insensued kan, lingeringer, oh pwunod kan en ah peneinei oh Mwomwohdiso, pepehm en limpoak laud ahpw aleiepene me inenen kehlail me I sohte kak kamahmkihla. I kak kehn ah medek oh pwunod kan. Iahpw esehda wen loaloid me e ahniki nan ah mour. Iapw pil rongada kisin ngihl meleilei kis mwurie inda: ‘I pil poakoahng ih. Poakoahng oh wahuniki ih.’

“I mwomwohd oh rongorong lau sohla mehkot e kak inda. I kehn limpoak oh kadek ohng ih. Lih menet me sohte douluhl ese ia mwomwen pepehm en limpoak. Ni ansouohte I wewehkihla ih douluhl. I kalahngan kiheng ah kak mweidehng ie ien pwarek ih, oh ni ansou me I mwesel I pwolehdi oh kiheng ai limpoak oh kasalehieng ai wahuniki ih. E sohte douluhl ese ia wen ah saihr ie ansou me I pwarek ih. Samatail Nanleng ritingadahr pwoaren mesei kan oh padahkihong ie me I ahniki lapalahn limpoak me kalaudehla ai kadek. I ese me dahme I wia sohte wewehki me I wiahte kempoakepah ahpw I pil wialahr kisehn ah peneinei.”

E wia mehkot sarawi ehu ken luhk ohng nan en emen aramas ah mour. Sang ni kapakap, kanengamah, oh sawas sang Ngehno, kitail kak esehla en wia mepwukat ni atail pahn ahniki soangen kairoir me Krais ahniki.

© 2019 sang Intellectual Reserve, Inc. All rights reserved. Ntingda nan USA. Mweimwei ni lokaiahn wai: 6/18. Mweimwei en kawewehdi: 6/18. Kawehwepen Ministering Principles, June 2019. Pohnpeian.15767 885