Nongonongen Iamwir, July 2019

Ifa Usun Sipwe Fori Orenien Ochufengen non Fan?

Nupwen sia nenengeni ach kewe wart me pranch, sia kuna aramas mi fokkun masoch. Nge sise weweiti pwe me nein ekkena mi nikinikinin masoch, mi wor chommong ra mefi anaemon. Eu poraus, ren awewe a kuna pwe ukukun esopwun meinisin mwan me fefin non Merika ra mefi anaemon, nikitino, are aimufesen seni ekkoch aramas.¹

Mi auchea ne mefi pwe kich mi pachenong. Mi eu sokkun namwotan aramas, me nupwen sise mefi kapachenong, a efeingaw. Nikitino a tongeni efisata mefien netipechou are song.² Nupwen sise mefi pwe sia kapachenong, sia kutta eu neni ikewe sia kinamweoch. Mi namot sipwe anisi aramas meinisin pwe repwe mefi pwe ir mi pachenong non fan.

Kapachenong Usun ewe Chon Amanau

Ewe Chon Amanau mi ewe minen appirun aucheani me ochufengeni ekkoch. Nupwen a finata noun kewe Chon Kuno, ese afanni nonnomur, pisekisekir, are wiser. A aucheani ewe fin Samaria non ewe ito, a pwarata ngeni usun manamanan ese nifinifin ifa usun ekkewe chon Jew ra nennetiw won ekkewe chon Samaria (nengeni John 4). A nengeni netipen aramas me ese asokofeseni aramas (nengeni 1 Samuel 16:7; Doctrine and Covenants 38:16, 26).

Ewe Chon Amanau A apasa:

“Iwe iei upwe ngeni kemi ew annuk mi fö, oupwe tong fengen; Usun chok ngang ua tongei kemi, iwe oupwe pwan tong fengen.

“Ika oupwe tong fengen nefinemi, iwe, aramas meinisin repwe sinei pwe ami nei chon kaeo” (John 13:34–35).

Met Sia Tongeni Fori?

Fan ekkoch a weires ne esinna ika emon a mefi pwe ese kapachenong. Napengeni aramas resap apasa—me rese afattaochu. Nge ren netipen tong, ewe emwen seni ewe Ngun mi Fel, me achocho ne esinna, sia tongeni esinna nupwen emon ese mefi pwe a kapachenong non mwichen Fan.

Ekkoch Minen Esisinnan Emon Ese Mefi Kapachenong:

Mwokutun inis, usun numifengenin poun kewe are foun mas mi nennetiw.
A mottiw nesukurun ewe rumw are a mottiw anaemon chok.
Ese fiti fan are ese fiti iteitan.
A muttir su seni sokkopaten mwich.
Ese fiti poporaus are nesen.

Ekkei mi ekkoch esisinnan memef, usun sau, noninen, are ese kinamwe. Chon Mwichefen mi tongeni mefi “sokkofesen” nupwen ir chon Mwichefen minefo, chon ekis ika mi sokkono orenier, ika ra keran weri siwinin manau, usun ren aimufesen seni punuan, manon emon chon famini, are muttir niwinsefanito seni misin.

Ese nifinifin ewe popun, sisap amanga ach eitau pouch non tong. Met sia apasa me fori a tongeni efisata memmefin pwe aramas meinisin mi etiwetiwoch me ir meinisin mi namwot.

Ekkoch Napanapan Kapachenong me Etiwetiwoch:

Kosap mwot ren ekkewe chok pwan aramas iteitan non fan.
Kosap nengeni nikinikinin aramas pwe kopwe nengeni ewe ennetin aramas. (Ren pwan ekkoch poraus, nengeni “Iamwir wewen Kuna Ekkoch usun ewe Chon Amanau mi Fori,” Liahona, June 2019, 8–11.)
Apachanong ekkoch non poraus.
Tingorei ekkoch repwe eu kinikinin manauom. Ra tongeni fiti mwich ka fen kokkot ngeni.
Kutta me kouta won met oua sani.
Kosap auku om chiechi ngeni emon pokiten ese fich ngeni met ka mochen.
Nupwen ka kuna och mettoch mi sokkono usun emon aramas, kopwe aucheani nge kosap chok nikitano.
Pwarata tong me kapas pwetete.
Kopwe aea fansoun ne ekieki met wewen nupwen sia apasa pwe ewe Mwichefen an aramas meinisin, ese nifinifin sokkofesenir. Ifa usun sipwe fori ei epwe ennet?

Ese mecheres ne mefi kinamwe nein aramas mi sokkofesen senikich. Nge ren ach achocho, sia tongeni aochuno ach aucheani sokkofesen me kinisou ren ekkewe sokkofesenin emon me emon aramas. Usun Elter Dieter F. Uchtdorf seni ewe Mwichen Engon me Ruemon Aposel a aiti, ach sokkofesen mi tongeni anisikich pwe sipwe aramasoch, me pwan pwapwa: “Feito, aniskich ne kouta me apochokuna orenien echikara, kirokiroch, me chen ngeni meinisin noun Kot kewe semirit.”³

Feioch seni Kapachenong

Christl Fechter a mwokutuno ngeni pwan eu fonu mwirin maun a tano fonuan. Ese sineiochu fosun ewe fonu me ese sinei emon non ewe neni mi fo, iwe akkomwan e mefi anaemon chok.

A emon chon ewe Mwichefen, me a anapano an pwaracho me a poputa ne fiti an wart mi fo. A noninen pwe ngingin epwe eppeti aramas ar repwe mochen poraus ngeni are aramas repwe apungu i pun ese mo pupunu.

Nge a churi ekkoch rese afanni sokkofesenir me ra etiwa ngeni ar mwichen chiechifengen. Ra pwarano tong, me muttir chok a aninis ne aiti mwichen Kinter. Ekkewe semirit ra minen awewen etiwaoch, me ewe memmefin tong me auchea a apochokuna an nuku me a anisi ne apochokuna an mochen tapweno mwirin ewe Samon.

© 2019 by Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, July 2019. Chuukese. 15768 901

Foffori me Anganga

Sister Linda K. Burton, Prsetenin Mwichen Fin Anisi me nom, a aiti, “First observe, then serve” (Liahona, Nov. 2012, 78). Apwonuetan ei poraus a tongeni anisikich ne forata wart me pranch minne ikewe meinisin mi kapachenong me ra mefi namwoter. Ikkei pwan ekkoch mettoch ne ekieki usun:

Nupwen sia tonong non ewe imwen fan, sia tongeni nennefetan me katon ir minne ewe Samon a mochen pwe sipwe apachanong non ach mwichen chiechi non ena ran.
Fan ekkoch sise poraus ngeni ekkewe ir ra sokkofesen senikich are a weires manauer pokiten sia niuokusiti ach sipwe apasa mettoch mi muan. Ei epwe eseniapato ar repwe tongeni mefi anaemon chok, ra ekieki pwata ese wor emon a kapas ngeni. Sme rer, pwari tong, me eis ennetin kapaseis. Eisinir usun met mi fis ngenir ren ar osukosuk me ifa usun en mi tongeni aninis.
Non ach afanafan me non ach kewe nesen non Raninifel, sia tongeni finata ne aea awewe pwe aramas me famini non sokkopaten napanaper ra tongeni manaueni ewe kapas allim me apwapwaiti efeiochun.
Chon ewe klas ra tongeni feioch watte nupwen chon osukun ra apachanong chon fiti seni sokkopaten mwichen ierir, fonuer, me nonnomun famini. Mi wor chommong sipwe kaeo seni ekkewe chommong chon ewe Mwichefen mi nukuchar me a sokkofesen manauer.
Chon osukun ra tongeni fori nenien kinamwe fan iten aramas ar repwe aporousa mefier usun ar manaueni ewe kapas allim. Nupwen aramas ra poraus, emon sense a tongeni kapasoch ngeni ewe poraus. Chon ewe klas repwe pwan mefi pochokun me kinamwe ne aporausa ar memmef.