E Rawa Vakacava me da Bulia e Dua na iTovo ni Veiciqomi ena Lotu?

Ni da vakararai ena noda tabanalevu kei na tabana, eda raici ira na tamata e rawarawa noda vakaitokanitaka. E dua na ka eda sega ni raica rawa ena kedra maliwa sara mada ga e dau rawarawa nodra vakaitokanitaki, e levu era vakila ni ra guilecavi tu. E dua na vakadidike, me kena ivakaraitaki, qai kunei walega qo ni voleka ni veimama ni tamata uabula e Amerika e tukuni ni ra galili voli, guilecavi, se sega na kedra isema vei ira tale eso.¹

Sa ka bibi me ra kauwaitaki. Oqo e dua na ka e gadrevi taumada ena bula vakatamata, ni da sega ni kauwaitaki, ena mosi vei keda. Ni da guilecavi tu e rawa ni vakatubura na rarawa se na cudru.² Ni da vakila ni da sega ni kauwaitaki, e vaka me da dau vaqara e dua na vanua eda na logalogavinaka kina. E dodonu meda vukea na tamata kecega me vakila ni kauwaitaki ena lotu.

Dau Veikauwaitaki me vaka na iVakabula

Sa ivakaraitaki uasivi sara na iVakabula ni nodra vakaliuci ka kauwaitaki na tani. Ni digitaki iratou na Nona iApositolo, a sega ni raica na ituvaki, na iyau, se na cakacaka vinaka. A vakamareqeta na yalewa ni Samaria ena ikeli wai, ka vakadinadinataka vua na Nona itutu vakalou e dina ga ni ra dau raici ira sobu na kai Samaria o ira na Jiu (raica na Joni 4). E raica o Koya na yalo ka sega ni dau digitaki ira vakailoa na tamata (raica na 1 Samuela 16:7; Vunau kei na Veiyalayalati 38:16, 26).

E kaya na iVakabula:

“E dua na ivunau vou au sa solia vei kemudou; mo dou veilomani me vaka kau sa lomani kemudou, mo dou veilomani talega vakakina.

“A ka oqo era na kila kina na tamata kecega ni dou sa noqu tisaipeli kevaka dou sa veilomani” (Joni 13:34–35).

Na Cava E Rawa Ni Da Cakava?

Ena so na gauna e dredre me da kila na nona sa nanuma tiko e dua ni sega ni kauwaitaki. E levu na tamata era sega ni dau kaya—me vaka e sega ni matata. Ia na yalo ni loloma, na veidusimaki ni Yalo Tabu, kei na noda segata me da kila, sa rawa kina meda kila na nona nanuma e dua ni sega ni kauwaitaki ena soqoni ni Lotu kei na itaviqaravi eso.

Na iVakatakilakila e Rawa ni Laurai Vua e Dua e Nanuma ni Sega ni Kauwaitaki:

Vakaraitaka ena nona ivukivuki ni sogoti koya, me vaka nona roqoliga vakaukauwa se dau rai sobu tu ga.
Dabe tu mai muri ka dabe duadua tu ga.
Sega ni dau tiko ena Lotu se dau lako mai vakavudua.
Biuta na soqoni se itaviqaravi ni se bera ni oti.
Sega ni dau vakaitavi ena veivosaki se lesoni.

Oqo na ivakatakilakila talega ni so na itovoniyalo, me vaka na mamadua, lomaleqa, se na logaloga ca. E rawa ni ra vakila na lewenilotu ni ra “duatani” ni ra se qai lewe ni Lotu vou, ni ra cavutu mai na dua na matanitu se dua na itovonibula duatani, se era se qai sotava oti ga e dua na veisau levu ni bula, me vaka na veisere, ni mate e dua na lewe ni matavuvale, se ni vakasukai mai na buturara ni kaulotu.

Se cava ga na vuna, me da kakua ni wawa ka tarai ira yani ena yalo ni loloma. Na ka eda cavuta kei na ka eda cakava e rawa ni vakavurea na vakanananu ni tamata kece e taleitaki ka gadrevi.

Eso na Sala me da Veiciqomi ka Veikauwaitaki Kina:

Kakua ni dau dabe tikiva e dua ga na tamata e valenilotu.
Raibaleta na waqawaqa ni tamata e taudaku mo kila na kena irairai dina. (Me baleta na ikuri ni ulutaga oqo, raica “Na Veiqaravi na Noda Raici Ira Tale Eso me Vaka e Cakava na iVakabula,” Liaona, June 2019, 8 – 11.)
Okata eso tale ena veivosaki.
Sureta eso tale me ra mai tiki ni nomu bula. E rawa ni o okati ira ena itaviqaravi eso o sa vakarautaka tiko.
Raica ka tara cake na veika era taleitaka vata.
Kakua ni bureitaka nomu veitokani baleta ga ni sega ni sotava e dua na veika o namaka.
Ni ko raica e dua na ka e duatani kina e dua na tamata, taleitaka na ka oya kakua ni vakalewa se via levea.
Vakaraitaka na loloma ka cavuta na vosa ni veivakacaucautaki e vu mai loma.
Taura na gauna mo vakasamataka na ibalebale dina ni da tukuna na Lotu e sa baleti keda kece, se cava ga na nodra duidui. Ena rawa vakacava ni da cakava oqo me itovo tudei.

E sega ni dau rawarawa me da logaloga vinaka ena kedra maliwa na tamata e duatani mai vei keda. Ia ni vakatovotovotaki, e rawa ni da vinaka cake ena noda kunea na yaga ni duidui ka taleitaka na cau duidui era kauta mai na tamata. Me vaka e vakavuvulitaka o Elder Dieter F. Uchtdorf ena Kuoramu ni iApositolo Le Tinikarua, sa rawa ni vukei keda me da tamata vinaka cake, tamata mamarau na noda duidui “Lako mai, ka veivuke meda tara cake ka vaqaqacotaka e dua na itovo ni veivakabulai, loloma, kei na loloma cecere vei ira kece na luve ni Kalou.”³

Vakalougatataki ena Veiciqomi

A toki o Christl Fechter ki na dua tale na matanitu ni oti na kena vakacacani na nona vanua ena ivalu. A sega ni cavuta vinaka na vosa ka sega ni kila e dua ena nona itikotiko vou, a mani tu duadua ka galili voli ena ivakatekivu.

A mani vakayaloqaqataki koya ka tekivu lako ki na nona tabanalevu vou me vaka ni lewena na Lotu. A lomaleqa de ra na sega ni via vosa vua ni sega ni matata na nona ivosavosa se de ra vakalewai koya ni sega voli ni vakawati.

Ia sa sota sara kei ira eso ka raibaleta na duidui ka kidavaki koya ki na nodra itikotiko raraba vakaveitokani. Era tatara yani ena loloma, ka sega ni dede sa vakaogai ena nona veivuke ni vakavulica e dua na kalasi ni Lalai. Era sa ivakaraitaki cecere ni veiciqomi na gonelalai, ka sa vaqaqacotaka nona vakabauta ka vakacaudreva tale na nona yalayala ni bula taucoko vua na Turaga na vakilai ni loloma kei na nona kauwaitaki.

© 2019 mai na Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, July 2019. Fijian. 15768 858

Vakayagataka Sara ena Nomu Bula

O Sisita Linda K. Burton, Peresitedi Raraba e liu ni iSoqosoqo ni Veivukei, a vakavulica, “Taumada vakararai, qai veiqaravi” (Liaona, Nove. 2012, 78). Ni vakamuri na ivakasala oqo e rawa ni vukea noda tauyavutaka na tabanalevu kei na tabana era kauwaitaki ka ciqomi kina na tamata kecega. Oqo eso na ikuri ni vakasama me navuci:

Ni da curu ki na noda vale ni lotu, eda rawa ni vakararai wavoki ka raica o cei ena vinakata na Turaga me da vakaitokanitaka ena siga o ya.
Ena so na gauna eda dau levei ira era duatani mai vei keda se o ira era sotava tiko e dua na gauna dredre baleta ni da rerevaka ni kaya cala tu e dua na ka. Oqo e rawa ni ra nanuma tu kina ni ra sega ni ciqomi, ka vakananuma voli se cava e sega ni vosa tu kina vua e dua. Dabe e yasadra, vakaraitaka na loloma, ka taroga na veitaro dina. Taroga na veika era sotava ena nodra bolebole kei na sala mo veivuke kina.
Ena noda vosa kei na lesoni ena Sigatabu, sa rawa ni da digitaka meda vakayagataka na ivakaraitaki eso e vakatakila ni sa rawa ki na tamata yadua kei na matavuvale ena vuqa na ituvaki me bulataka na kosipeli ka marautaka na kena veivakalougatataki.
E rawa ni ra vakalougatataki vakalevu na lewe ni kalasi ni ra okata na qasenivuli na lewenilotu duidui nodra yabaki ni bula, vanua era lako mai kina kei na kedra ituvaki vakamatavuvale. Sa levu sara na ka me da na vulica mai na vuqa na lewe ni Lotu yalodina ka duidui tu na ka era sotava mai vei keda.
E rawa me ra cakava na qasenivuli e dua na idrodro me ra wasea kina na tamata na veika era sa sotava ena bulataki ni kosipeli. Ena gauna cava ga e wasei kina e dua na vakasama, sa rawa vei qasenivuli me sauma vakavinaka na ka sa cauraki mai. Ena rawa kina vei ira na lewe ni kalasi me ra yalodei ka logaloga vinaka ena wasei ni nodra nanuma.