Paano Bala Kita Makatuga sang isa ka Kultura sang Paglakip sa Simbahan?

Kon manghulong-hulong kita sa aton mga ward kag branch, makita naton ang mga tawo nga daw mahapos lang makigbagay. Ang wala naton matalupangdan amo nga bisan sa mga tawo nga daw mahapos lang makigbagay, may madamo sa pamatyag nila nga wala sila nalakip. Sa isa ka pagtuon, halimbawa, nakita sang sini lang nga halos katunga sang mga hamtong sa Estados Unidos ang nagsiling nga nagabatyag sila sang kapung-aw, ginapangiban-iban, ukon napain sa iban.¹

Importante ang makabatyag nga nalakip. Isa ini ka tig-una nga panginahanglan sang tawo, kag kon pamatyag naton nga wala kita ginalakip, masakit ini. Ang indi malakip sarang magtuga sang pamatyagan sang kasubo ukon kaakig.² Kon wala kita nagabatyag nga nalakip, nagapangita kita sang lugar kon sa diin mas komportable kita. Kinahanglan naton buligan ang tanan nga makabatyag nga nalakip sila sa simbahan.

Paglakip (sang Iban) Kasubong sang Manluluwas

Ang Manluluwas amo ang perpekto nga ehemplo sang paghatag bili kag paglakip sang iban. Sang Iya ginpili ang Iya mga Apostoles, wala Niya gintulok ang ila estado, manggad, ukon mataas nga propesyon. Ginhatagan man Niya sang bili ang babayi nga Samariahanon sa tupad sang bubon, nga nagapamatuod sa iya sang Iya pagkadiosnon wala sapayan sang pagpakanubo sang mga Judio sa mga Samariahanon (tan-awa sa Juan 4). Nagatulok Sia sa tagipusuon kag wala sang may pinalabi sa mga tawo (tan-awa sa 1 Samuel 16:7; Doctrine and Covenants 38:16, 26).

Ang Manluluwas nagsiling:

“Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay.

“Sa sini ang tanan nga tawo makahibalo nga kamo mga gintutun-an ko, kon maghigugmaanay kamo” (Juan 13:34–35).

Ano ang Sarang Naton Himuon?

Kon kaisa mabudlay pakton kon ang isa ka tawo nagabatyag nga daw yara sila sa gwa. Kalabanan sang mga tawo wala nagahambal sini—sing prangka. Pero upod ang mapinalanggaon nga tagipusuon, ang paggiya sang Balaan nga Espiritu, kag pagpaninguha nga mangin bukas ang panghunahuna, mabatyagan naton kon ang isa ka tawo nagabatyag nga wala sia malakip sa mga miting kag mga kahiwatan sang Simbahan.

Posible nga mga Tanda nga ang Isa ka Tawo Nagabatyag nga Wala Malakip:

Depensibo nga panghulag-hulag, pareho sang pagpangursimano ukon nagatulok paidalom.
Nagapungko sa likod nga bahin sang kuwarto ukon nagapungko sing isahanon.
Wala nagasimba ukon malaka lang nagasimba.
Nagauna pauli halin sa mga miting ukon kahiwatan.
Wala nagapasakop sa mga paghinambalanay ukon mga leksyon.

Mahimo man nga mga tanda ini sang iban pa nga emosyon, pareho sa pagkamahuluy-on, indi pagkahamtang, ukon indi komportable. Ang mga miyembro mahimo magbatyag sang “pagpangiban-iban” kon bag-o sila nga mga miyembro sang Simbahan, gikan sa iban nga mga pungsod ukon kultura, ukon nakaagi sang masakit nga mga pagbag-o sa kabuhi, pareho sang [pagbulagay sang mag-asawa], pagtaliwan sang isa ka miyembro sang pamilya, ukon temprano nga pagpauli halin sa misyon.

Bisan ano pa ang rason, indi kita dapat magpangduha-duha sa pagdab-ot sa ila nga may pagpalangga. Ang aton ginahambal kag ang aton ginahimo sarang magtuga sang pamatyagan nga ang tanan ginaabi-abi kag ang tanan ginakinahanglan.

Pila ka Pamaagi agud Mangin Malakipon kag Mainabi-abihon

Indi pirme magtupad sa amo gihapon nga mga tawo sa simbahan.
Indi pagtamda ang panggwa nga hitsura sang mga tawo agud makilala ang tunay nga pagkatawo. (Para sa dugang nga impormasyon sa sini nga topiko, tan-awa sa “Ang Ministering Amo ang Pagtan-aw sa Iban Pareho sang Pagtan-aw sang Manluluwas,” Liahona, Hunyo 2019, 8–11.)
Ilakip ang iban sa mga paghambalanay.
Agdaha ang iban nga mangin kabahin sang inyo kabuhi. Mahimo man ninyo sila ilakip sa mga kahiwatan nga inyo na ginaplano.
Magpangita kag pabakura ang komon ninyo nga mga interes.
Indi pagpunggi ang makig-abyan bangod lamang ang isa ka tawo wala nagasibo sa inyo ginapaabot.
Kon makakita kamo sang bagay nga pinasahi sa isa ka tawo, magmangin interesado diri imbes nga kabigon ini nga indi importante ukon likawan ini.
Magpahayag sang pagpalangga kag magtanyag sang sinsero nga pagdayaw.
Hatagi sang tion agud hunahunaon kon ano gid ang matuod nga kahulugan kon magsiling kita nga ang Simbahan para sa tanan, wala sapayan sang ila mga kinatuhay. Paano naton ini himuon nga mangin matuod?

Indi pirme mahapos nga mangin komportable sa palibot sang mga tawo nga tuhay sa aton. Pero upod sang paghanas, mangin mas maayo kita sa paghatag bili sa mga kinatuhay kag pasalamatan ang pinasahi nga mga kontribusyon sang tagsa ka tawo. Subong sang gintudlo ni Elder Dieter F. Uchtdorf sang Korum sang Dose ka mga Apostoles, ang aton mga kinatuhay sarang nga maghimo sa aton nga mas maayo, mas malipayon nga mga tawo: “Kari kamo, buligi kami nga magpasad kag magpabakod sang isa ka kultura sang pagpaayo, kaayo, kag kaluoy sa tanan nga mga anak sang Dios.”³

Ginbugayan sang Paglakip

Si Christl Fechter nagsaylo sa iban nga pungsod pagkatapos nga ginwasak sang giyera ang iya dutang natawhan. Indi sia makahambal sing maayo sa bag-o nga pulong kag wala sing kilala sa iya bag-o nga lugar, gani sang primero pamatyag niya napain sia kag nagaisahanon.

Bilang miyembro sang Simbahan, gintipon niya ang kaisog kag nagsugod nga magtambong sa iya bag-o nga ward. Nabalaka sia nga ang iya tono sa panghambal magapugong sa mga tawo nga makighambal sa iya ukon nga pagahusgaran sia tungod wala sia sang bana.

Pero nakakilala sia sang mga tawo nga wala nagtulok sa iya mga kinatuhay kag gin-abiabi sia sa ila komunidad sang mga abyan. Nagdab-ot sila nga may pagpalangga, kag wala nadugayi nangin masako na sia sa pagbulig tudlo sa klase sang Primary. Ang mga kabataan dako nga ehemplo sang pagbaton, kag ang pamatyagan nga ginapalangga kag ginakinahanglan nagpabakod sang iya pagtuo kag nagbulig pukaw sang iya bug-os kabuhi nga debosyon sa Ginuo.

© 2019 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, July 2019. Hiligaynon. 15768 861

I-aplikar Ini

Si Sister Linda K. Burton, anay Relief Society General President, nagtudlo, “First observe, then serve” (Liahona, Nob. 2012, 78). Ang pagsunod sini nga laygay sarang magbulig sa aton sa pagtuga sang mga ward kag branch kon sa diin ang tanan nalakip kag ginakinahanglan. Yari ang pila ka mga ideya nga dapat binag-binagon:

Kon magsulod kita sa simbahan, mahimo kita magtulok sa palibot kag magpanilag kon si sin-o ang luyag sang Ginuo nga dalhon naton sa aton grupo sang pag-inabyanay sa sina nga adlaw.
Kon kaisa ginalikawan naton ang mga tawo nga lain sangsa aton ukon nagaeksperiyensya sang kabudlayan tungod nahadlok kita nga magsala sa aton ihambal. Ginapabilin sini sila nga napain, nga nagakatingala kon ngaa wala sang may nagaestorya sa ila. Sini sa ila, magpahayag sang pagpalangga, kag magpamangkot sang sinsero nga mga pamangkot. Pamangkuta sila parte sa ila eksperiyensya sa ila mga hangkat kag kon paano kamo makabulig.
Sa aton mga pamulong-pulong kag sa aton mga leksyon kon Domingo, mahimo kita maggamit sang mga halimbawa nga nagapakita nga ang mga indibidwal kag mga pamilya sa nagkalain-lain nga mga sitwasyon sarang magpangabuhi sang ebanghelyo kag magkalipay sa mga bugay sini.
Ang mga miyembro sang klase mahimo nga mabugayan sing dako kon ang mga manunudlo nagalakip sang mga miyembro halin sa nagkalain-lain nga edad, nasyonalidad, kag kahimtangan sang pamilya. Madamo kita sang matun-an gikan sa madamo nga matutom nga mga miyembro sang Simbahan nga may mga eksperiyensya nga lain sangsa sa aton.
Ang mga manunudlo sarang nga magtuga sang hilway nga lugar para magpaambit ang tanan sang ila mga inagihan sa pagpangabuhi sang ebanghelyo. Sa tagsa nga may magpaambit sang komento, ang isa ka manunudlo mahimo nga magsabat sing positibo sa kon ano ang ginhambal. Nian ang mga miyembro sa klase mas mangin may kompiyansa kag komportable sa pagpaambit sang ila mga panghunahuna.