Usa ka Balaang Tawag [Calling] alang ni John
Paghulagway ni John Kachik
Isip usa ka bag-ong bishop daghang mga tuig na ang milabay, ako nakamatikod og matinud-anong sister kinsa sa kanunay mitambong sa simbahan nga wala ang iyang bana, nga si John. Akong nahibaloan nga siya kanhi usa ka presidente sa branch sa dihang ang ilang meetinghouse gitukod pa. Wala kaayo siyay nadawat nga tabang gikan sa mga miyembro sa branch nga siya naluya pag-ayo sa paghimo sa kadaghanan sa trabaho ug nahimong dili na kaayo aktibo.
Kon ang mga miyembro sa ward moadto sa ilang panimalay, siya modagkot sa iyang sigarilyo ug molingkod sa iyang lingkuranan nga naggunit sa iyang lata sa beer ingon og mosulti nga, “Dili kamo makapabalik kanako.”
Sa katapusan, akong nahibaloan nga si John usa ka tig-ayo og appliance. Ang karaang mga miyembro sa ward sa kasagaran motawag nako aron moayo. Karon nga ako nakahibalo sa mga kahanas ni John, motawag ko ni John ug mangayo og tambag unsaon sa pag-ayo.
Nagpadayon ako niini sulod sa mga usa ka tuig. Nianang higayuna, kami nagkinahanglan nga motawag og klerk sa ward. Human sa mainampoong konsiderasyon, gibati nako nga nadasig sa pagtawag ni John.
Gisultihan nako ang presidente sa stake ug siya miingon, “Dili kita makatawag kaniya karon! Siya manabako ug moinom og beer.” Mihangyo ko sa presidente sa stake nga motawag kaniya alang sa usa ka interbyu. Miabut si John sa interbyu apan hugot nga mitubag, “Dili, dili ako takus.”
Nagpadayon ang mga butang sama kaniadto—si John nagpabilin nga dili aktibo, ug ako motawag kaniya aron magpakitambag. Nianang higayuna, ako mosulti og bisan unsa ngadto kaniya mahitungod sa pagbalik ngadto sa Simbahan. Gihangyo nako ang presidente sa stake sa pag-interbyu niya sa ikaduhang higayon. Pag-usab, si John miingon og dili, apan niining higayuna siya midugang, “Sultihan ko ikaw kon ako andam na.”
Human niini gitawag gihapon nako si John aron magpatambag ug pagpakigdait kaniya kutob sa akong mahimo.
Usa ka adlaw gitubag nako ang telepono ug nakadungog, “Ang Bishop ba kini?” Siya nagsugod sa pagtawag kanako niana nga titulo. “Si John kini. Andam na ko.” Dayon siya gitawag ug nag-alagad isip klerk sa among ward.
Paglabay sa katuigan, si John nag-alagad og daghang mga balaang tawag. Siya ug ang iyang asawa nag-alagad og misyon, ug karon sila nag-alagad sa templo. Sa akong ika-50 nga salo-salo sa anibersaryo sa kasal, si John misulat og mubo nga sulat nga nag-ingon, “Bishop, salamat sa pagluwas sa akong kinabuhi.”
Dili nako ikahulagway ang kalipay nga akong gibati nga nakahibalo nga si John mibalik sa simbahan tungod kay nagpasensya ko ug mihangyo kaniya sa panabang kon ako nagkinahanglan niini.