Ang Panalangin sa Pagkawala
Sa katapusan, human maningkamot sa taas nga higayon, nagpaabut na kami sa among unang anak. Nakasinati kami og kalipay ug pagkaemosyonal! Ang tanan maayo ra. Ang among anak nga babaye naglambo, nagtubo, ug ang tanan libut namo malipayon sama kanamo sa panalangin niining dugay nga gihulat nga anak nga babaye.
Apan ang komplikasyon miabut. Ang tagsaon nga dugo ug komplikasyon sa atay nakahulga sa bata ug kanako. Ang mga doktor nakadiskobre usab og pagbagtok sa dugo sa placenta. Sa dihang unom pa lang ka bulan, ang among anak nga babaye kinahanglan nang matawo.
Sa dihang natawo siya, mitimbang lang siya og ubos sa usa ka libra (0.5 kg) ug misukod og labaw sa 10 ka pulgada (25 cm). Sa ospital ang mga nurse mitawag kaniya nga among “gamay nga manggugubat.” Apan upat ka adlaw human siya matawo, ang iyang kondisyon migrabe ug siya namatay. Sa akong pagpanganak sa akong anak nga babaye ug dayon mopauli nga wala siya sa akong mga bukton ug magtan-aw sa iyang gagmay nga mga butang sa balay nakahatag nako og dakong kasakit!
Mibiyahe ko uban sa iyang gamay nga lungon sa akong sabakan sa hapit 190 ka milya (300 km) hangtud miabut kami sa among lungsod sa Garruchos ug gilubong siya didto. Usahay mabati nako ang iyang presensya, ingon og gihikap niya ang akong nawong sa iyang kamot. Ang akong bana, nga si Gustavo, mipahinungod sa lubnganan, ug among gilubong siya.
Kami migahin og tulo ka adlaw sa panimalay sa akong mga ginikanan, diin ang mga tawo mibisita kanamo. Ang pipila wala makasabut kon nganong mitugot ang Dios nga mahitabo kini kanamo. Apan wala gayud kami mokwestyon sa Ginoo. Siya mipili namo nga mahimong ginikanan niining espesyal nga tawo, niining gamay nga anghel, kinsa nagkinahanglan og pipila ka adlaw niini nga yuta sa pagtuman sa iyang misyon. Wala namo kini isipa nga usa ka silot o usa ka pagsulay. Nakita namo kini nga usa ka panalangin. Karon katungdanan namo nga mahimong takus nga makig-uban kaniya pag-usab.
Ang ebanghelyo naghatag namo sa kahayag, kalig-on, ug paglaum nga moabut ang adlaw nga makahimo sa pagpadako kaniya. Dayag lang, kami naguol sa nahitabo, ug usahay kami mobati og kahaw-ang. Apan ang Espiritu mihupay kanamo.
Naningkamot kami nga makabaton og laing masuso, ug kami nasayud nga ang mga butang mahitabo sumala sa plano ug panahon sa Ginoo. Ang Langitnong Amahan nahigugma kanamo ug dili gayud mobiya kanamo. Mapasalamaton kami Kaniya sa pag-andam og paagi alang namo nga sa umaabut magpuyo nga maghiusa isip usa ka pamilya.