Ip Yohk ke Karihngihn, Ohkohs 2019

Yac Nga Kuh in Kahsruh Sie Mwet in Eklac?

Ahok. Tuhsruhk kunohkohn lom an sahp ac siena liki nuhnak lom an.

Kuht oreklac in muh kuh in eklac. Kapkapwack in sun ohiyac muhtahl lasr an pa srihpen ma kuht puhlakihn ke moul suhkawihl lasr uh. Sie sin ma kuht finsrakkihn ke karihngihnyuck uh pa in kahsruh mwet sahyac in tuhkuh nuh yurun Kraist ac oruh ma enenweyuck in eklac in fohlohk nuh Yohrohl. Tuhsruhk ke srihpen sukohsohk in sulaclah lalos, kunohkohn lasr in kahsrwelos in eklac oacna Kraist uh srihklac.

Pa inge mwe luti fokoko itkohsr sin Mwet Lahngo lah kuht kuh in kahsruh fuhkah mwet sahyac ke kampare lalos in eklac oacna El.

1. Nimet Sahngweng in Suli Eklac

   Mwet Lahngo El tiacna sahngweng in suli mwet sahyac in fihliyac som liki ohiyac mahtuh ac apihsyac luti Lal. El solwacl Peter ac James in som liki orekma lalos ac in eklac mwet “paturi mwet“ (Mark 1:17). El suli muhtwacn se suc sruhoh ke kosro in “som, tusruktu nimet sifilpa oru ma koluk” (John 8:11). El suli sie mukul fuhsr kahsruhp in fuhlweack luhngse lal nuh ke ma luhn facluh ac in fahsr Tohkohl (liye Mark 10:17–22). Kuht kuh pac in kwewana puhlaik ac luhngse ke kuht suli mwet sahyac in oraclah eklac an ac in fahsr tukun Mwet Lahngo.

2. Esam lah Sulaclah na Lalos in Eklac

   Kain in eklac se ma Mwet Lahngo El suli kac uh tiac kuh in fohrsiyuck. Mwet Lahngo El luti ac suli, tuhsruhk El tiacna fohrsi. Mukul fuhsr kahsruhp sac “som … ke inse toasr” (Matthew 19:22). Fin acn Capernaum, puhs suhnuhn mwet tuhma lutlut Lal sulaclah in “fohlohklac,” ac El siyuck sin Singucul Luo ah elos fin ac som pac (liye John 6:66–67). Kuhtuh sin mwet ukwacl John Bacptais elos sulaclah in fahsr tukun Mwet Lahngo, mwet sahyac ah tiac na (liye John 1:35–37; 10:40–42). Kuht kuh in suli mwet sahyac in eklac oacna El, tuhsruhk kuht tiac kuh in otwelah laltahl in eklac. Ac elos fin soenna sulaclah in eklac, kuht enenuh in tiac fuhlweack--kuh kuht tiac pac enenuh in puhlakihn muh kuht kuf.

3. Pruhe kacn Mwet Sahyac in Kuh in Eklac

   Ke El Pruhe Kwacfe, Jisus El siyuck sin God tuh mwet tuhma lutlut Lal elos in loangweyucklac liki ma koluk, in eklac oacna El ac Pahpah, ac in sesesslah ke luhngse luhn God (liye John 17:11, 21–23, 26). Ac etuh na lah Peter el ac enenuh kuh ke kampare lal in kapkapwack nuh ke kunohkohn lal, Mwet Lahngo El pruhe kacl (liye Luke 22:32). Pruhe lasr kacn mwet sahyac kuh in oraclah eklac (liye James 5:16).

4. Lotwelos in Muhngnguh Kuh Lal

   Kacn Mwet Lahngo muhkwena pa inkacnek sefanna ma kuht kuh in eklac na pwacye ac kapkapwack nuh ke kasrpen ohiyac muhtahl lasr nuhkwewa. El pa “inkanek, ac pwaye, ac moul; wangin mwet som nu yurin Papa fin tia [ke El]” (John 14:6). Kuh Lal pa kuh in “oruh ma muhnahs uh in ma fokoko“ (Ether 12:27). Luhlahlfongi ke kuh luhn iwaclah Lal pa oruh Alma suc Fuhsr elan eklac ah (liye Alma 36:16–23). Kuht kuh in luti mwet sahyac in luhlahlfongi Mwet Lahngo tuh elos in kuh pac in eis ahknwacsnwacs kuh in moul lalos.

5. Oracltahl Oacna ma Elos Kuh in Eklac Oacna

   Luhngse ac inseselac kuh in mwe kahsruh fokoko ke eklac. Muhtwacn se ke luhf in utkof sac tuh wi sie mukul suc tiac mukul tuhmwacl. Mwet tuhma lutlut luhn Kraist elos “arulana lut in liye lah El kaskas nu sin mutan se” (John 4:27), tuhsruhk Jisus El lohacng na yohk nuh kac lah meac el kuh in eklac oacna. El lotwel ac sang pacl wo lal in eklac, ac el eklac. (Liye John 4:4–42.)

   Ke kuht oruh nuh sin mwet sahyac oacna nuh ke ohiyaclos, liki na nuh ke ohiyac ma elos kuh in eklac oacna, kuht kuh na in sruokyac kapkapwack lalos an. Liki na inge, kuht kuh in nuhnakmuhnahs ac muhlkuhnlah tahfonglac ke pacl somlah ah. Kuht kuh in luhlahlfongi lah mwet sahyac kuh in eklac. Kuht kuh in tiac lohacng nuh ke ma muhnahs an ac srihsrngiyac na ohiyac wo ma elos sahp tiacna liye kaclos sifacna. ”Ma kunacsr in liye kais sie mwet, tiac oacna ke ohiyaclos ingena tuhsruhk oacna ke elos kuh in eklac.”¹

6. Lwelah Elos in Oruh Wiwi na Kuhiyaclos Sifacna

   Eklac uh eis pacl. Kuht nuhkwewa enenuh in “tahfwelah na in muhtweng ne ke na [kuht] suwohswohslah” (Doctrine and Covenants 67:13). Jisus El muhtweng nuh sin mwet sahyac ac tahfwelah na in luti pac elos suc lainuhl, fahkwack ke ma kunacl suc ituckyang nuh Sel sin Pahpah Tuhmwacl ac topuk kihsensiyuck lalos (liye Matthew 12:1–13; John 7:28–29). Kuht kuh in muhtweng nuh sin mwet sahyac ac ahkkweyaclos in muhtweng nuh selos sifacna.

7. Nimet Fuhlweack Elos Fin Fohlohk nuh ke Ohiyac Mahtuh [Lalos]

   Tukun Kraist El misac ah, finne Peter ac kuhtuh sin Mwet Sap ah fohlohklac nuh ke ohiyac muh elos etuh kac (liye John 21:3). Kraist El ahkacsmakihnyacl Peter lah el enenuh in “karinganang sheep [Nahtuhl]” (liye John 21:15–17), ac Peter el fohlohk nuh ke orekma in luti. Kuh in arulacna fihsrwacsr in fohlohklac nuh ke ohiyac mah. Kuht kuh in tahfwelah na in kahsruh ke kahkahsrihk ahkkweye ac ke suli ma mokleyuck in tahfwelah na in fwahsr tukun Mwet Lahngo ac in srihke in eklac oacna El.

Lwelah Mwet Sahyac in Kapkapwack

Elder Jeffrey R. Holland ke U luhn Mwet Sap Singucul Luo el sruhmuhn sramsram soko inge ke lwelah mwet sahyac in kapkapwack: “Tuh fwack nuh sihk ke sie pacl ah ke sie mukul fuhsr suc ke lusen yac pucspucs, oacna in ahksruhksruhkyeyuck el ke ahksruhksruhk nuhkwewa ke lutlut lal ah. El suhkahpahsr kuhtuh, ac fihsrwacsr nuh sin mwet matwacl in ahksruhksruhkyacl. Tohkoh in moul lal el som liki acn we. Fahsr ne el welah army ac oasr ma sikyak pihsrlac wo nuh sel ke som wi lutlut fuhlwact ac kais kuhtuh na som liki pacl somlah lal met ah. Lucng liki nuhkwewa, oacna inkaiyaclos ke military ah, el sokwack kahtoiyac ac wolacna luhn Alu uh, ac el eklac wi mukwikwi ke alu ac engan kac.

“Na, tukun yac pucspucs, el fohlohklac nuh ke mura se el tuh muhta we ke el fuhsr ah. Inkaiyacn matwacl elos som liki acn we tuhsruhk tiac nohfohn na. Inge, ke el fohlohklac ac el mwet pihsrlac ac oacna in el eklac sasuc, tuh mahn nuhnak sepacna lal met ah srackna oasr, sano na fohlohk lal an. Nuh sin mwet ke mura se lal ah, nuh srackpacna el ah.

“Kais kuhtuhsrihsrihk na kampare oacna Paul luhn mukul se inge in som liki ma fihliyucki na ke pacl somlah ah ac sruokyac na mwe sang sacohk ma God El fihliyac ye muhtahl tuh kais kuhtuh na wacngihnlac ne ke na el misac oacna ke ohiyacn moul se lah ke el tuh fuhsr ah. Arulacna koluk, arulacna suhpwacr lah el sifilpac rauniyucklac … selos suc motko muh pacl somlah lal ah yohk srihpac liki pacl fahsruh lal uh. Elos oruh ne ke na elos ahlah luhkwel ke ma suc Kraist El tuh sruokilyac. Ac el suhpwacr na misac, finne wacngihn tahfonglac lal sifacna kac. …

“Lwelah mwet uh in auliyak. Lwelah mwet uh in kapkapwack. Luhlahlfongi lah mwet uh kuh in eklac ac wolac.”²

© 2019 ke Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/18. Ahkkweyeyucklac ke lweng: 6/18. Lweng ke Ministering Principles, August 2019. Kosraean. 15769 868

Mwe Kahsruh

1. Thomas S Monson, “See Others as They May Become,” Liahona, Nohfuhmpuh 2012, 70.

2. Jeffrey R. Holland, “The Best Is Yet to Be,” Liahona, Jacnweri. 2010, 19, 20.

Suli in Oruh

Meac kom kuh in oruh ke wik se inge in suli ac kahsruh mwet sahyac ke kampare lalos in eklac ac eklac oacna Mwet Lahngo?