Padahk en Papah, Oahkos 2019

I Kak Sewese Emen Aramas enWekila?

Ehng. Ahpw dahme ke pahn wiahu kakete weksang dahme ke medemedewe.

Kitail kepikipikda iangahki atail koahiek en wekila. Kekeirda nin duwen atail wia kepikipik en Kauno kei ih atail pwukoah me kitail anahne esehla ni atail mihmi sampah. Ehu atail pwukoah keieu laud en papah iei en sewese mehteikan kohdo rehn Krais oh wekidiraila pwe irail en kak pwurala mwohn Sihlangih. Ahpw pwehki pein arail pilipil, atail kak en seweseirail en duwehla Krais kin tikitikla.

Iet padahk isuh sang Sounkomouro pid ia mwomwen atail kak sewese mehteikan wen arail kak koaros en wekila oh duwehla Ih,

Kedehr Masak Lukeirail en Weliakapwala.

Sounkomouro sohte kin masak lukehiong aramas akan en weksang arail wiewia en mahs akan oh alehda Sapwellime padahk kan. E ketin luke Piter oh Seims en pwilikihdi ara doadoahk oh “wiahla soun laidih aramas” (Mark 1:17). E ketin luke lih me dierekda nan ah kamwahlo en “kohla oh dehr pwurehng wiahda dihp” (Sohn 8:11). E ketin luke mwahnakapw kepwehpwehu en pwilkihdi ah pai en sampah koaros oh idawehnla Ih (tehk Mark 10:17–22). Kitail pil kak ngilen komwad de ngilen limpoak ni atail kin luke mehteikan en weliakapwala oh idawehn Soukomouro.
Tamataman Me Arail Pilipil Irail en Weliakapwala

Luhk en weliakapwala me Sounkomouro kin ketin wia e sohte idihd. Sounkomouro ketin padahk oh luk, ahpw E sohte ketin iding kitail. Mwahnakapw kepwehpwehu “nsensuwedla oh kohkohla“ (Madiu 19:22). Nan Kapernaum, tohnpadahk tohto pilada irail en “pwurala mwuri“ oh E ahpw keinemwe rehn Sapwellime Wahnparonoko ma irail pahn pil iang (tehk Sohn 6:66–67). Ekei irail me kin ideidawehn Sohn sounpepdaiso pilada pwe irail en idawehnla Sounkomouro, ah ekei soh (tehk Sohn 1:35–37; 10:40–42). Kitail kak luke mehteikan en nantihong duwehla Ih, ahpw kitail sohte kak wiahda pwe irail en weliakapwala. Oh ma irail saik wiahda arail pilipil en weliakapw, kitail sohte pahn—de medewe me atail pwukoah sohte pweida.
Kapakapki ahn Mehteikan Koahiek en Weliakapwala

Ni ansou me E ketin kasakaski Sapwellime tohnpadahngko, E peki rehn Koht en ketin katiasang irail me suwedo, pwe irail en kak duwehla Ih oh Sahmo, oh pil audaudkihda Sapwellimen Koht limpoak (tehk Sohn 17:11, 21–23, 26). Oh pwehki E ketin mwahngih me Piter pahn anahne kakehlepe pwe en kak keirda nan ah pwukoah, Sounkomouro pil kasakaski (tehk Luk 22:32). Atail kapakapki mehteikan kak wekidiraila (tehk Seims 5:16).
Padahkiong Irail en Koapwoaroapwoarki Sapwellime Manaman

Ihte sang rehn Sounkomouro me kitail kak weliakapwala ni mehlel oh kekeirda sang ni mehkoaros me Kauno ketkiong kitail. Ihme “ahl, mehlel, oh mour: sohte me kak kolahng Semehu, ma soh [Ih]” (Sohn 14:6 Sapwellime manaman kelehpw me kak “wekidala mehkot luwet ong ni mehkot kehlail“ (Ether 12:27). Pwoson Sapwellime tomwo me kahrehda nein Alma pwutak Alma ah weliakapwala (tehk Alma 36:16–23). Kitail kak padahkiong mehteikan en kehliki Sounkomouro pwe arail mour en pil kak iang mwakelekelkihda Sapwellime manamano.
Wiahieng Irail Wiepe Me Irail Kak Wiahla

Limpoak oh pohnese kak wia mehn doadoahk keieu mwahu ohng wekidala emen aramas. Lih me mihmi ni pwarero kin koukousoan rehn ohl emen me kaidehn ah pwoud. Sapwellime werengko pwuriamweikihla ah koasoaiong liho“ Sohn 4:27, ahpw dahme Sises kesempwaliki dahme e pahn wiahla. E ketin padahkohng oh ketkihong ah ansou mwahu en weliakapwala, eri e wia. (Tehk Sohn 4:4–42.)

Ma kitail kin sewese mehteikan duwehte me re kak mwahusang dahme irail wiadahr, kitail kak kapwureiraildo. Pil ehu, kitail kak mahk oh manokehla sapwung kan me wiawidahr mahs. Kitail kak kamehlele me mehteikan kak weliakapwala. Kitail kak kilang arail luwet oh kihong ni pali me mwahu me pein irail sohte kak kilangada. “Atail pwukoah kaidehn en kilikilangki aramas akan dahme arail wiewia ahpw dahme irail kak wiahla.“¹
Mweidohng Irail en Kohwei ni Wen Arail Kak

Weliakapwala kin wiawi wen ansouieu. Kitail koaros “wenlahte ni kanengamah lao [kitail] unsekla“ (Doctrine and Covenants 67:13). Sises kanengamahieng mehteikan oh wenlahte padapadahk mendahte ekei irail sohte men rong Ih, kadkadehde Sapwellime pwukoah me Seme Nanleng ketkiong oh sapsapeng arail peidek kan (tehk Madiu 12:1–13; Sohn 7:28–29). Kitail kak kanengamahieng mehteikan kan oh seweseirail en kak kanengamahieng pein irail.
Dehr Uhdihsang Ma Irail Pwurehng Wia Arail Wiewia en Mahs

Mwurin Krais ah pwoula, Piter oh ekei Wahnpoaronko pwurala oh pwurehng wihwia dahme irail udahn kin (tehk Sohn 21:3). Krais katamaniki Piter me e anahne kamwenge Sapwellime sihpw“(tehk Sohn 21:15–17), eri, Piter pwurala oh wia pwukoahn mwomwohdiso. E mengei en pwurala wia dahme udahn kin wiawi mahs. Kitail kak nantihlahte oh seweseirail ni meleilei oh lukeirail en kak pehm ngehno oh nantihlahte oh idawehn Sounkomouro ni ngidingid pwehn duwehla Ih.

Mweidehng Mehteikan en Keirda

Elder Jeffrey R. Holland Pwihn en Wahnpoaron Ehkriemeno soaikihda soai pwoat me pid mweidehng mehteikan en keirda: “Dene mie pwutak pwulopwul men me sounpar tohto e kin kalapw wia mehn kepit nan ah skuhlo. Mie ah souitar ekei, eri e kin mengei ohng iengeh kan en kin kapailoke. Mwuhr e ahpw kosoula ekis wasa. E ahpw wiahla sounpei men oh pweidahr oh esehlahr soahng kei me karehda e pwurehng skuhl oh mwekid sang ah mour en mahs. Pohnangin soahng koaros, me sounpei tohto kin wia, e diaradahr kaselel oh lingan en mwomwohdiso wet e ahpw wialahr aramas kehlail oh peren men.

“Eri, mwurin sounpar ekei, e ahpw pwurala wasa me e tikida iehu. Ekei iengehko sohla mih mwo ahpw kaidehn irail koaros. E sansal, ansou me e pwurodo e keirda oh pil ipwsapahl, ahpw dahme irail kin ndindahki mahso pil mihmite awiawih ah pahn pwurodo. Ohng tohn wasa e tikida iehu e duduwehte dahme e kin ‘wiewia mahso.’ …

Ekis ekis ni ohl menet ah nantiehng idawehn kaweid en Wahnparon Paul me koasoia, (I kin manokehla dahme mi mwuri oh woanoweite pwe I en kak alehdi kisakis me Koht kaunopehngiehier) lau ih mehla ni ansou me e pwulopwulo. … Nohn suwed, oh nohn kansenwuwed ah pwurehng mihla nan pwungen … irail kan me kin medemedewe me ah wiewiahn mahs kan kaperen sang me e mihmihier loale. Irail song en kihsang dahme Krais ketkihongehr. Oh e mehla nan ah nsensuwed, sang ni pein ah sapwung tikitik. …

“Mweidehng aramas en koluhla. Mweidehng aramas en keirda. Kamehlel me aramas kak weliakapw oh keirda.“²

© 2019 by Intellectual Reserve, Inc. All rights reserved. Ntingda nan USA. Mweimwei ni lokaiahn wai: 6/18. Mweimwei en kawehwehdi: 6/18. Kawehwehpen Ministering Principles, August 2019. Pohnpeian. 15769 885