Reirein te Mwakuri n Ibuobuoki, Tebetembwa 2019

E na kanga te Tamnei ni Kona (ao Ni) Buokiko ni karaoa te Mwakuri n Ibuobuoki

Katabean te nakoanibonga n te mwakuri n ibuobuoki, a kaai n anganaki mwaane ao aine, n reitaki ma riaina ni karekea te kaotioti.

Kamataata n te tamnei iroun Getty Images

Te wewete nakon te mwakuri n ibuobuoki ao te beku ao riki n tatangira n aron te kawai are e karaoia te Tia Kamaiu e kona n tabetai n taraa ni kaangaanga—riki ngkana e irekereke ma te marooro nakoia ake ti bon aki kinaia raoi. Ma miirion mwaitin kawai n ibuobuoki, ti bon miimi bwa ti kanga ni konaa n atai kawai aika tamaroa ni buokiia koraki ake ti katabeaki irouiia.

Ti riai n aki kamaana miimira aio ibukina bwa ara mwakuri korakora ae koaua a kona ni kairaki iroun te Tamnei ae Raoiroi.

“Am mwakuri n ibuobuoki ae tabu e na anganiko te kairi mairoun te Atua,” e taku Titita Bonnie H. Cordon, te Beretitenti n te Bootaki n Ataeinnaine. “Ko kona ni ukora te kairi anne ma te koauaraoi.”¹

Ngkana ti ukoria ni beku n te kawai are e karaoia te Tia Kamaiu, ti kona ni kairaki iroun te Tamnei are e Kairia naba. Aio e bon onoti ni koaua ngkana te beku inanon katabeaki, n aron mwakuri n ibuobuoki, e karaoaki iaan ana kariaia te bitiobi ni kiingin te nakoanibonga. Aikai onoua mwaitin iango ibukin mwakuri n ibuobuoki ma te Tamnei.

N na Kanga ni Karekea te Tamnei Ngkana I karaoa te Mwakuri n Ibuobuoki?

• Bubuti ibukin te Kairi. Tamara are i Karawa e tangirira bwa ti na reitaki ma Ngaia rinanon te tataro. Te Tataro e aki tii kaniira Nakoina, ma e bon karekei naba “kakabwaia are e a kaman tia ni baireia te Atua man anga ngkana ti bubuti ibukiia.”² “Ngkai ti tataro ao ni ukora ataakin nanoia, e taku Titita Cordon, “I kakoaua bwa Tamara are i Karawa e na kairiira ma Tamneina bwa e na raoniira.”³

• Tai Tataninga te Wirikiriki. Mwakuriia n aki tataningai. Bwaina te “ingainga ni kan karaoia” (Reirei ao Berita aika Tabu 58:27), ao ko na kunea bwa am mwakuri korakora e kona ni kairaki ao ni karakaaki. “Waaki rake ma ara mwakuri n ibuobuoki ao te beku bon te kawai ae kakawaki nakon taum ibukin te kaotioti,” e taku Beretitenti Dallin H. Oaks, te Moan Kauntira n te Moan Beretitentii. “Inanon au tai ni kamatebwai iaon koroboki aika tabu I a tia ni karekea bwa angiin kaotioti nakoia natin te Atua e roko ngkana a mwakuriia, tiaki ngkana a karauiia n tekateka n aroaroia n tataninga te Uea n tuangiia te moan mwaneka are a na karaoia.”⁴

N na kanga ni Kinaa te Wirikiriki nakon te mwakuri n Ibuobuoki?

• Anaa ana Kauring Moomon. Ti aki riai n tiku n raraoma n taekana ke te iango anne bon te kairaki ke tiaki. Tiaki ibukina bwa tao iai iroura bebeten ana kiing Moomon are ti ataia: Ma ngkana ko karekea te iango ni kanamakinna bwa ko karaoia ao ni kakoaua ke ni buokiia tabeman ni kakoaua te Kristo, kam na ataia ma te atatai ae kororaoi bwa bon mairoun te Atua (taraa Moronaai 7:16).

• Tai raraomaeakinna. “Tii kibara nanon te ran ao uaua,” e taku Unimwaane Jeffrey R. Holland man te Kooram n Abotoro n te Tengaun ma Uoman. “Kawariia koraki ake a kainnanoira. Tai tannako man te mwakuri ke tao ni iangoia bwa ai tera te anga ae ko na ibuobuoki iai. Ngkana ti iriiri taian reirei ake ti a tia n reiakinaki, tiiku boutokaa kiingin te nakoanibonga, ao ukora te Tamnei ae Raoiroi bwa e na kairiira, ti na bon aki bwaka.”⁵

Tera te Kawai ae Tamaroa n Iriira te Wirikiriki?

• Waekoa. Titita Susan Bednar (kainnaban Unimwane David A. Bednar man te Kooram n Abotoro n te Tengaun ma Uoman) bon te banna ni katooto n iriiran te wirikiriki. Imwiin ana tataro “ibukin te mata n tamnei n nooriia koraki ake iai kainnanoia,” e tarataranako n te bootaki n taromauri ao n taai aika bati e na “namakina ana kairoro te tamnei ni kawariia ke n tarebonia te aomata anne,” e tibwaia Unimwaane Bednar. “Ao ngke e karekea te namakin Titita Bednar, e karaoa raoi nanon te wirikiriki ao e ongotaeka. E bon riiriki n tatainako aei ngkana e taekinaki ‘amen’ inanon te kainiin n tataro, e taetae ma te ataeinaine ae tebwi tabun ana ririki ke e rabwatia ke, n okiran mweengana, e waekoa n anaa te tareboon ao n tareboon.”⁶

• Ninikoriana. Maakakin te totoko ao namakinan te maama, aki konamaki, ke n akean te angaraoi e kona ni kabanikaira man iriiran te kanamakin n ibuobuoki. “Inanon taai ao kawai aika a bati, ti bane n namakina te aki konamaki, nanououa, tao te aki tau,” e taku Unimwaane Gerrit W. Gong man te Kooram n Abotoro n te Tengaun ma Uoman. “Ma inanon ara mwakuri ni kakaonimaki n tangira te Atua ao ni buokiia naake irarikira, ti kona n namakina ana tangira te Atua ao ni kainnanoa te kaunganano ibukin maiura n te kawai ae boou ae mimitong riki.”⁷

  Temanna te tari e tibwaia bwa e kanga n aki tatabwara n anga ana buoka nakon buun te aine are e kataia ni bakabureia. Ma n tokina e tuanga te buu te mwaane aei ae e na katawanou ma ngaia. “Ngke I taku, ‘Kainnabam e kataia ni bakabureia. Anne e na konaa n riki bwa rootakin am iango. Ko tangiria ni marooroakinna?’ e wawanako ranin matana n tang,” e tibwaia. “Ti karekea rootakin ara namakin ni marooro aika raba mairouiia aomata ao ni karikirakea kaaniara ae tamaroa ao te onimaki inanon miniti.”⁸

© 2019 by Intellectual Reserve, Inc. All rights reserved. Boretiaki i USA. Kariaiakaki n te Ingiriti: 6/18. Kariaiakaki rairana: 6/18. Rairan te Ministering Principles, September 2019. Kiribati. 15770 859

Bwaai aika a na taraaki

1. Bonnie H. Cordon, “N Riki bwa te Tia Kawakin Tiibu,” Riaona, Nob. 2018, 76.

2. Rikitinare n te Baibara, “Tataro.”

3. Bonnie H. Cordon, “N Riki bwa te Tia Kawakin Tiibu,” 75.

4. Dallin H. Oaks, “Inanon Oin Ana Tai, inanon Oin Ana Kawai,” Riaona, Aokati. 2013, 24.

5. Jeffrey R. Holland, “Te Mwakuri ni Manga Bitaki,” Riaona, Nob. 2018, 77.

6. David A. Bednar, “Waekoa ni Kinaa,” Riaona, Ritembwa 2006, 17.

7. Gerrit W. Gong, “Ara Kaemba n te Onimaki,” Riaona, Nob. 2018, 42.

8. Taraa Bonnie H. Cordon, “N Riki bwa te Tia Kawakin Tiibu,” 76.

Ana Katooto te Tia Kamaiu

Te Tia Kamaiu e tauraoi ibukin Ana mwakuri. “Te Atua e kabira Iesu te I-Natareta ma te Tamnei ae Raoiroi,” ao ngkanne Kristo “e nakonako ni karaoa ae raoiroi” (Mwakuri 10:38). E bon “on n te Tamnei ae Raoiroi” ao e bon “kairaki iroun te Tamnei” (Ruka 4:1). E mataata raoi bwa Kristo e nakonako ni karaoa ae raoiroi imwain kabirakina ma te Tamnei ae Raoiroi, ma anganakina te Tamnei ae Raoiroi ao karekean te kariaia anne ni kaungaaki e bon kakawaki ni mwakoron Ana mwakuri—n aron mwakorona ae kakaawaki n ara mwakuri.

Te Kakao ni Mwakuri

Ngkana ko nakonako n am mwakuri n ibuobuoki ni katoa bong, tataromwaaka ni ukora ao ni kaeka nakon ana wirikiriki te Tamnei ae Raoiroi. Uringnga bwa Tamam are i Karawa e na kakabwaiako ma koraki ake ko buokiia n aron are ko karaoia!