Mga Prinsipyo sa Ministering, Septyembre 2019

Paano ang Espiritu Sarang (kag Pat-od) nga Magbulig sa Inyo sa Pag-minister

Ang buluhaton sang priesthood sa pag-minister, nga ginhatag alangay sa lalaki kag babayi, nagalakip sang kinamatarong nga magbaton sang rebelasyon.

Ang tawag sa pag-minister kag pagserbisyo kag bisan sa pagpalangga pareho sang pagpalangga sang Manluluwas kon kaisa daw makahalangkat—labi na gid kon nagapangayo ini nga lab-uton naton ang mga tawo nga indi naton kilala katama. Sa isa ka milyon nga paagi sa pag-minister, nagapanumdom kita kon paano naton mahibaluan ang pinakamaayo nga paagi agud lab-uton yadtong mga gintoka sa aton.

Indi naton kinahanglan magpalibog sing malawig tungod ang aton sinsero nga mga pagpaninguha sarang magiyahan sang Balaan nga Espiritu.

“Ang inyo sagrado nga buluhaton sa ministering nagahatag sa inyo sang diosnon nga kinamatarong sa pagbaton sang inspirasyon,” hambal ni Sister Bonnie H. Cordon, Pangkabilugan nga Pangulo sang Young Women. “Mahimo ninyo pangayuon inang inspirasyon nga may kompiyansa.”¹

Kon handumon naton nga magserbisyo pareho sang ginhimo sang Manluluwas, sarang kita magiyahan sang pareho nga Espiritu nga naggiya sa Iya. Labing matuod ini kon nagaserbisyo kita sa mga buluhaton, pareho sang ministering, nga ginhimo sa idalom sang awtoridad sang mga yabi sang priesthood sang bishop. Yari ang anum ka mga panugyan para mag-minister upod ang Espiritu.

Paano Ko Bala Makaupod ang Espiritu Samtang Naga-minister?

Magpangayo sang Giya. Luyag sang Amay nga Langitnon nga magpakig-angot kita sa Iya paagi sa pangamuyo. Ang pangamuyo wala lang nagadala sa aton palapit pa gid sa Iya, kundi ginasiguro man sini “ang mga bugay nga inughatag na sa aton sang Dios sa kondisyon nga pangayuon naton ang mga ini.”² “Kon ipangamuyo kag handumon naton nga mahangpan ang ila mga tagipusuon,” siling ni Sister Cordon, “nagapamatuod ako nga ang Amay nga Langitnon magatuytoy sa aton kag ang Iya Espiritu magaupod sa aton.”³
Indi Maghulat sang Pagpabatyag. Indi na maghulat pa antes maggiho. “Mangin mapisan” (Doctrine and Covenants 58:27), kag makita ninyo nga ang inyo mga pagpaninguha sarang magiyahan kag mapadako. “Ang magpadayon sa aton pagserbisyo kag trabaho isa ka importante nga paagi agud magbaton sang rebelasyon,” siling ni Pangulong Dallin H. Oaks, Unang Manuglaygay sa Unang Panguluhan. “Sa akon pagtuon sang balaan nga mga kasulatan natalupangdan ko nga kalabanan sa mga rebelasyon sa mga anak sang Dios nagaabot kon sila nagagiho, indi sa tion nga nagapungko lang sila sa ila mga ilistaran nga nagahulat sa Ginuo nga hambalon sila sang una nga tikang nga himuon”⁴

Paano Ko Bala Makilala ang mga Pagpabatyag sa Pag-minister?

Sunda ang Laygay ni Mormon. Indi kita maghulat nga nagapalibog kon bala ang isa ka ideya isa ka pagpabatyag ukon indi. Indi kon yara sa aton ang mahapos nga tanda ni Mormon sa paghibalo: Kon may ginapamensar kamo nga nagapabatyag sa inyo nga maghimo sang maayo kag magtuo ukon magbulig sa iban nga magtuo kay Cristo, mahibaluan ninyo nga iya ini sang Dios (tan-awa sa Moroni 7:16).
Indi Magkabalaka. “Basta lumpat lang sa linaw kag maglangoy,” hambal ni Elder Jeffrey R. Holland sang Korum sang Dose ka mga Apostoles. “Magpadulong sa ila nga nagakinahanglan. Indi magpaarumatay nga nagapanumdom pa kon bala mag-backstroke ka ukon maglangoy nga inido. Kon sundon naton ang tig-una nga mga prinsipyo nga gintudlo, magpadayon sa latid sang mga yabi sang priesthood, kag pangitaon ang Balaan nga Espiritu sa paggiya sa aton, indi kita mapaslawan.”⁵

Ano ang Pinakamaayo nga Paagi sa Pagsunod sang isa ka Pagpabatyag?

Sa gilayon. Si Sister Susan Bednar (asawa ni Elder David A. Bednar sang Korum sang Dose ka mga Apostoles) isa ka dako nga halimbawa sang pagsunod sang mga pagpabatyag. Pagkatapos nga magpangamuyo “sang espirituhanon nga mga mata agud makita ang mga may kinahanglan,” nagatulok sia sa kongregasyon kag sa masami “makabatyag sang espirituhanon nga pagpanguhit nga estoryahon ukon tawgan ang isa ka partikular nga tawo,” paambit ni Elder Bednar. “Kag sa tion nga mabaton ni Sister Bednar ang amo nga pagpabatyag, gilayon sia nga nagagiho kag nagasunod. Masami nagakatabo nga pagkasiling pa lang sang ‘amen’ sa panghingapos nga pangamuyo, may estoryahon na ina sia nga tin-edyer ukon hakson nga sister ukon, pag-abot sa balay, kuhaon ang telepono kag magpanawag.”⁶
Sing May Kaisog. Ang kahadlok nga balibaran kag pamatyagan sang kahuya, kakulangan, ukon pagka-sabad mahimo nga magpugong sa aton nga sundon ang isa ka pagpabatyag nga mag-minister. “Sa nagkalain-lain nga tinion kag paagi, kita tanan nagabatyag sang kakulangan, pagpangduha-duha, ayhan indi-katakos,” siling ni Elder Gerrit W. Gong sang Korum sang Dose ka mga Apostoles. “Apang sa aton matutom nga pagpanginguha nga palanggaon ang Dios kag mag-minister sa aton kasilingan, mahimo naton mabatyagan ang pagpalangga sang Dios kag ang ginakinahanglan nga inspirasyon para sa ila kag sa aton mga kabuhi sa bag-o kag mas balaan nga mga paagi.”⁷

Isa ka brother ang nagpaambit kon paano sia sadto nagpangalag-ag sa pagpalab-ot sa bana parte sa isa ka babayi nga nagtilaw magpanginmatay. Pero sang ulihi nahagad niya ang bana nga magpanyaga sa gwa. “Sang ginhambal ko nga, ‘Nagtilaw magpanginmatay ang imo asawa. Daw mabudlay ini siguro para sa imo. Gusto mo ini hambalan?’ naghibi sia nga wala pugong-pugong,” paambit niya. “Madalom kag mapinalanggaon ang amon pag-istoryahanay kag nakaangkon sang dako nga kasuod kag pagsalig sa sulod sang pila lang ka minuto.”⁸

© 2019 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, September 2019. Hiligaynon. 15770 861