Ip Yohk ke Karihngihn, Septempuh 2019

Nguhn uh Kuh (ac Fah) Kahsre Kom Fuhkah in Karihngihn

Kunohkohn ke pristut in karihngihn, ituckyang nuh sin kewana mukul ac muhtwacn, weacng sie kuh in eis fwackyuck.

ministering

Petsac an sin Getty Images

Pahng in karihngihn ac kuhlwacnsap ac finne in luhngse oacna ke Mwet Lahngo El tuh oruh ah kuh in upac kuhtuh pacl uh—yohkna ke pacl ma kom saplakyang nuh selos suc kuht tiacna arulacna etuh. Ke ohiyac miliacn in karihngihn, kuht motko lah kuht ac etuh fuhkah ohiyac ma wo emet in saplakyang nuh selos ma kuneyucki nuh sesr.

Kuht tiac enenuh in motko paht ke srihpen insacnweacng yohk lasr kuh in kolyuck sin Nguhn Muhtahl.

“Kunohkohn in karihngihn muhtahl lom an ac usot nuh sum sie kuh muhtahl in mokleyuck,” Tahmtahel Bonnie H. Cordon, Prestuhn Fuhlwact luhn Muhtwacn Fuhsr, el fahk. “Kom kuh in ekahk in suk mokleyuck se ingacn.”¹

Ke kuht suk in kuhlwacnsap oacna ke Mwet Lahngo El tuh oruh ah, kuht kuh in kolyuck ke Nguhn sepacna ma tuh kohlohl ah. Ma se inge yohkna pwacye ke kuhlwacnsap ke kunohkohn, ma oacna karihngihn, oreklac ye kuh luhn ki ke pristut luhn pisap. Pa inge mwe kahsruh ohnkohsr in karihngihn ke Nguhn.

Nga ac Eis Fuhkah Nguhn Ke Nga Karihngihn uh?

• Siyuck ke Kolyuck. Pahpah Lucng El kena tuh kuht in sramsram nuh Sel ke pruhe. Pruhe uh tiac lwelah muhkwena kuht in fototoyang nuh Sel, tuhsruhk ac oyacpac ahkkweye “mwe insewowo ma God El insese tari in use tuhsruhk ma ingacn wiwi na siyuck lasr nuh ke ma ingacn.”² “Ke kuht pruhe ac suk in kahlwem ke insiaclos,” Tahmtahel Cordon el fahk, “nga fahkwack lah Pahpah Lucng El ac fah kol kuht ac Nguhn Lal ac fah wi kuht som.”³

• Nimet Sano na in Mokleyuck. Mukwikwi Kac. “Rahrah in mukwikwi kac” (Doctrine and Covenants 58:27), ac kom ac fah sokwack lah insacnweacng lom an kuh kolyuck ac ahkkweyeyuck. Prestuhn Dallin H. Oaks, Mwet Kahsruh se Met ke Prestuhnsi se Met el fahk lah “ahkwot nuh met ke kuhlwacnsap ac orekma lasr uh pa sie inkacnek na yohk srihpac in fal in eis fwackyuck.” “Ke lutlut luhk ke ma suhmuhslah, nga liye lah inkaiyen fwackyuck nuh sin tuhlihk nuhtin God uh tuhkuh ke elos mukwilac, tiac ke elos muhta na in lohm selos sano Leum Elan fahk nuh selos ma se emet elos in oruh.”⁴

Nga ac Akihlen Fuhkah Mokleyuck in Karihngihn?

• Eis Kahs in Kahsruh lal Mormon. Kuht tiac enenuh muhta motko pahtlac lah yac nuhnak sac ma mokleyuck se kuh tiac. Tiac ke oasr yohrohsr ki fihsrwacsr se lal Mormon in etuh: Fin oasr nuhnak se sum ma mokle kom in oruh ma wo ac in luhlahlfongi kuh in kahsruh mwet sahyac in luhlahlfongi ke Kraist, kom kuh in etuh lah ma se inge ma sin God (liye Moroni 7:16.

• Nimet Fosrngah kac. Elder Jeffrey R. Holland ke U luhn Mwet Sap Singucul Luo el fahk muh “ahtuyang na nuh ke pool an ac kofkof.” “Som nuh yohrohlos suc enenuh. Nimet muhta na tiac mukwikwi nuhnkuh lah yac kom enenuh in kofkof muhtuhn rea kuh kofkof in fohrohk. Kuht fin ukwe ip yohk ma lutiyuck inge, muhta na suwohs nuh ke ki luhn pristut, ac suk Nguhn Muhtahl in kol kuht, kuht tiac kuh in kuf.”⁵

Meac Ohiyac Wo Se Emet in Ukwe ma Mokleyuck uh?

• Ahksaye. Tahmtahel Susan Bednar (muhtwacn kiyacl Elder David A. Bednar ke U luhn Mwet Sp Singucul Luo) el sie mwe srihkasrak na wo ke ukwe mokleyuck uh. Tukun el pruhe “in eis muhta nguhnnguhn in kuh in liyaclos suc oasr enenuh la,” el ngetnget rauni mwet toeni ke alu ah ac inaiyacn pacl uh elac “puhlakihn mokleyuck elan muhtwacya yurun kuh pahngon sie mwet,” Elder Bednar el akacsruhi ke ma inge. “Ac ke Tahmtahel Bednar el eis kain in mokleyuck se inge, elac silahklahk na topuk ac ahkos. Inkaiyacn pacl uh ke tuhfahna in fwacklac tari ‘amen’ ke pruhe in kaliyac, na elac sramsram nuh sin sie tuhlihk fuhsr kuh apihsyac sie tahmtahel kuh, ke elac fohlohk nuh lohm ah, elac silahklahk sruhkwack telefon ah ac pahng.”⁶

• Puhlaik. Sahngweng in sruhngwacyuck ac puhlakihn mwekihn, suhfal, kuh puhlakihn muh kom lusrongtwen kuh in tulokihn kuht in tiac ukwe mokleyuck in karihngihn. Elder Gerrit W. Gong ke U luhn Mwet Sap Singucul Luo el fahk lah ke “kain in pacl ac ohiyac, kuht nuhkwewa puhlakihn muh kuht suhfal, ahlohloh, kuh sahp tiac wo fal.” “Tuhsruhk ke insacnweacng oaru in luhngse God ac in karihngihn mwet tuhlan lasr, kuht kuh in puhla luhngse luhn God ac mokleyuck ma enenweyuck nuh moul lalos ac nuh ke moul lasr ke inkacnek sasuc ac muhtahl.”⁷

  Sie tamuhlwel el akacsruhi lah el ahlohloh in saplakyang nuh sin mukul tuhmwacn sie muhtwacn suc tuh srihke in sifacna unilyac. Tuhsruhk el siyuck sin mukul tuhmuhn muhtwacn sac in som mongo infulwen lwen. “Ke nga fahk muh ‘muhtwacn se kiom ah srihke in sifacna unilyac. Ma se ingacn sahp arulacna upac nuh sum. Kom ke sramsram kac?’ el tiac wukun in tuhng,” el akacsruhi kac. “Kuht sramsram arulacna fihsrwacsr ac wo ac fototoi inmahsrlosr ac aluhlahlfongi ke minit na ekahsr.”⁸

© 2019 ke Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/18. Ahkkweyeyucklac ke lweng: 6/18. Lweng ke Ministering Principles, September 2019. Kosraean. 15770 868

Mwe Kahsruh

1. Bonnie H. Cordon, “Becoming a Shepherd,” Liahona, Nohfuhmpuh 2018, 76.

2. Bible Dictionary ke LDS English version luhn Bible, “Prayer.”

3. Bonnie H. Cordon, “Becoming a Shepherd,” 76.

4. Dallin H. Oaks, “In His Own Time, in His Own Way,” Liahona, Ohkuhs 2013, 24.

5. Jeffrey R. Holland, “The Ministry of Reconciliation,” Liahona, Nohfuhmpuh 2018, 77.

6. David A. Bednar, “Quick to Observe,” Liahona, Tisacmpuh 2006, 17.

7. Gerrit W. Gong, “Our Campfire of Faith,” Liahona, Nohfuhmpuh 2018, 42.

8. Liye Bonnie H. Cordon, “Becoming a Shepherd,” 76.

Srihkasrak luhn Mwet Lahngo

Mwet Lahngo El ahkolah nuh ke orekma in karihgnihn Lal. “God El [akmusrail] Jisus luhn Nazareth ke Nguhn Muhtahl,” ac na Kraist El “forfor in acn nuhkwewa ac oruh ma wo” (Orekma 10:38). El “sesseslahna ke Nguhn Muhtahl” ac El kwacna “[kolyuck sin] Nguhn” (Luke 4:1). Pwacyena lah Kraist El forfor in acn nuhkwewa ac oruh ma wo met liki akmusraiyucklac El ke Nguhn Muhtahl, tuhsruhk eis Nguhn Muhtahl ac oasr kuh suwohs Lal in mokleyuck pa sie ip na yohk srihpac ke orekma in karihngihn Lal—oacna ke ma inge pa sie ip na yohk srihpac lasr.

Suli in Oruh

Ke kom som oruh karihngihnyuck ke kais sie lwen, pruhe suk ac topuk mokleyuck luhn Nguhn Muhtahl. Esam lah Pahpah Lucng El ac fah ahkinsewowoye kom ac elos suc kom karihngihn an ke kom oruh uh!