Osisechakl er a Odingel, Ongetiu el Buil 2019

Ng mekera Chedaol Reng e Sebechel (e Mo) Ngosukau sel Moldingel

A ngerachel er a priesthood el kirel odingel, el mo er a rsechal me a redil, a uldimukl er ngii a llemalt er a ngeiul chedaol ocholt.

Sunga el mlengai er a Getty Images

A okedong el mo oldingel e mesiou e oubeltikereng el uaia Osobel a sebechel uaia lemeringel —oumesingd tirkel tir a diak desal ungil medengelterir. Me a ikal betok el teletael er a odingel, e kede melbedebek el kmo kede mekerang e mo medengelii sel kot lungil teletael er a odingel el bodobang.

Ng diak el kirel rrau a rengud el meketeket le sel blakereng er kid a sebechel mukrael lokiu Chedaol Reng.

“A chedaol ngercheliu loldingel a meskemiu a lemeltiu el kirel a ulekrael,” ng millekoi a Bonnie-H. Cordon, el Merredel er a Cherrengelel a Young Women. “Ng sebechiu el ansing losiik er tiaikid el chedaol ulekrael.”¹

Sel dosiik el mo mesiou el uaia Osobel, eng sebeched el mo mukrael lokiu osisiu el Reng lulmekrael er Ngii. Tia kmal klemerang sel sekum e a ngercheled a mesiou, loldingel, el mlekedmokl lokiu a ngerachel me a kiis er a priesthood lolab a bisop. Aikakid a kllolem el tekoi el kirel odingel loltirakl er a Chedaol Reng.

Ak Mekera Mo Oba Chedaol Reng Sel Kuldingel?

• Molengit a Ulekrael. A Chedam er a Babeluades a soal a dongedecheduch lobengkel lokiu a nglunguuch. A nglunguuch a diak di lokedid er Ngii, ng dirrek el meskid a “klengeltengat el Dios a mla kudmokl lomeskid eng di mo ultuil er a ongtid el kirel.”² “Sel dengara nglunguuch losiik el mo medengei a ngara rengrir,” ng millekoi a Sister Cordon, “Ea kuchais el kmo a Chedam er a Babeluades a mo omekrael er kid e a Chedaol Reng er Ngii a mo obengked.”³

• Lak Mongiil er a Odubech. Di Moruul. “Bo “blak a rengum el meruul” (Doctrine and Covenants 58:27), e kau a mo metik el kmo a blakereng er kau a mo mukrael e mo chachisois. “A dolemolem el mesiou e doureor a klou a belkul teletael el uchul e kede ngmai chedaol ocholt, “ng millekoi a President Dallin-H. Oaks, el Kot el Counselor er a First Presidency. “Chelsel omesubek er a chedaol llechukl e ak mla mtebengar el kmo oumesingd er a chedaol ocholt el mo er a rengelekel a Dios a mei sel louedikel loureor, ng diak di el dengchokl er a rekeblirir e longiil er a Rubak louchais er tir sel kot el kirir el meruul er ngii.”⁴

Ak mekerang e Mtebengar Odubech el mo Oldingel?

• Moltirakl a Tekingel a Mormon. Ng diak a belkul dedengchokl el melchedech el kmo a uldasou el mlei ngodubech er a reng a lechub eng diak. Ng diak el uaisei er chelechal bla bo dodengei a tekingel a Mormon: A lengarngii a uldasou el soiseb er a uldesuem el mo meruul a ungil e mo oumerang malechub e ke mo olngeseu er a rebebil el mo oumera er a Kristo, e kemedengei el kmo ngara Dios (mesa Moroni 7:16).

• Lak ko bekikl el kirel. “Di bekiis e bo moureor,” ng millekoi a Elder Jeffrey-R. Holland er a Chelechad er a Teruich me a terung el Apostol. “Morael mo mesterir a rousbech a ngesou. Lak di mdengchokl e molchedech el kmo ke mong malechub eng diak. Omko kede oltirakl a beot el suobel el mla mosisechakl, loltirakl a kiis er a priesthood, e dosiik a ulekrael er a Chedaol Reng, eng diak el sebeched el mo mechitechut.”⁵

Ngera Sel Kmal Bedochel Rael Bo Doltirakl er a Odubech?

• Di mereched. A Sister Susan Bednar (el bechil a Elder David-A. Bednar er a Chelechad er a Teruich me a terung el Apostol) a kmal ungil okesiu er a otireklel odubech. Uriul er a loluluuch “losiik chedaol ngesou el mo er tirkel ngesool,” eng merekii osengel lomes er tial seked e blechoel “mo omelchesiu er a odubech el mo odngelii malechub eng omekedong er a kmo ng techa el chad,” nguluchais a Elder Bednar. “E a Sister Bednar sel bo lolchesuar odubech, eng blechoel mereched lotireklii. Ng blechoel ikel taem el sel bol merek a ongdibel me ldu el kmo ‘amen’ ruriul er a nglunguuch, e ngii a mengedecheduch er a ngeasek el chad malechub eng mechulii a tara odos, e sel bel rei, eng di mei el medir a dengua e omekedong.”⁶

• Lak ko medakt. A dekted me a omelchesiu el merur, metitur, malechub eng metacherbesul a sebechel torbengid meng diak dotireklii odubech el mo oldingel. “Chelsel a betok el taem me a teletael, e kede omelchesiu el metitur, diak dodengei, a lechub eng diak deklikiid,” ng millekoi a Elder Gerrit-W. Gong er a Chelechad er a Teruich me a terung el Apostol. “Eng di sel blakereng er kid loubeltikereng el mo er a Dios e mo oldingel er a tonari er kid, e kede mo melchesuar a beltikereng er a Dios me a ulekrael el kirir me a kid el dirrek er a chelsel a beches e lmuut el chedaol teletael.”⁷

  A tal odam a uluchais el kmo ng mle kmes el mo oldingel er a tal sechal el bechil a mle soal di ngii el melai er a kelngar ngii. Ngullengit er ngika el chad me bo lousueleb el terung. “Sera kuchais er ngii el kmo, ‘A bechim a soal melai er a klengar ngii. Tia locha kmal oberaod er kau el tekoi. Ng soam el mengedecheduch el kirel?’ eng longelang,” e ouchisang. “Ng kmal mle ungil a cheldechedemam e kmal mlo ta rengmam e dilubech a klaumera er a delongelam er a chelsel a kedeb el taem.”⁸

© 2019 lokiu a Intellectual Reserve, Inc. All rights reserved. Milluches er a USA. Kengei er a English: 6/18. Kengei ra Oidel: 6/18. Oidel a Ministering Principles, September 2019. Palauan. 15770 881

Uleklatk

1. Bonnie H. Cordon, “Becoming a Shepherd,” Liahona, Nov. 2018, 76.

2. Bible Dictionary, “Nglunguuch.”

3. Bonnie H. Cordon, “Becoming a Shepherd,” 76.

4. Dallin H. Oaks, “In His Own Time, in His Own Way,” Liahona, Aug. 2013, 24.

5. Jeffrey R. Holland, “The Ministry of Reconciliation,” Liahona, Nov. 2018, 77.

6. David A. Bednar, “Quick to Observe,” Liahona, Dec. 2006, 17.

7. Gerrit W. Gong, “Our Campfire of Faith,” Liahona, Nov. 2018, 42.

8. Mesa Bonnie H. Cordon, “Becoming a Shepherd,” 76.

Okesiul Osobel

A Osobel a mle kldmokl el kirel a Urerel. “A Dios a chiledolii a Jesus er a Nazareth loba Chedaol Reng,” me seikid e a Kristo “a mlo merael meruul a ungil” (Rrellir 10:38). Ngii a mle “mui er a Chedaol Reng” e mle blechoel “mukrael er a Reng” (Lukas 4:1). A Kristo a meral mirael meruul a ungil ruchei er a lenguu Chedaol Reng, eng di a ngeiul Chedaol Reng me a lemalt er a odubech a mle klou a ultutelel telengtengil a Urerel— el diosisiu el klou a belkul telengtengil a urered.

Ongit el mo Meruul

Sel bo moldingel er a bek el sils, e bom ngara nglunguuch losiik e motireklii odbechel Chedaol Reng. Molatk el kmo a Chedam er a Babeluades a mo omekngeltengat er kemiu me tirkel kemiu oldingel er tir sel bo moruul el uaisei!