Mga Prinsipyo sang Ministering, Oktobre 2019

Nagakalipatan Mo Bala Ining IMPORTANTE nga Bahin sang Ministering?

Ang ministering amo ang “magkalipay kaupod sa mga nagakalipay” kasubong man ang “maghibi kaupod sang mga nagahibi” (Mga Taga-Roma 12:15).

Kon magpamensar kita sang ministering, mahapos lang ang magpamensar parte sa pagbulig sa ila nga mga nagakinahanglan. Nagahambal kita parte sa pagpanghardin para sa mga balo, pagdala sang kalan-on sa mga nagamasakit, ukon paghatag sa ila nga ginabudlayan. Aton madumduman ang laygay ni Paul nga “maghibi kaupod sa nagahibi,” apang ginatutokan ta bala sing maayo ang nahauna nga bahin sang sina nga bersikulo—ang “magkalipay kaupod sa mga nagakalipay”? (Mga Taga-Roma 12:15). Ang magkalipay kaupod sa ila nga aton gina-ministeran—bisan pa nga ina nagakahulugan nga magsaulog sang ila kadalag-an ukon buligan sila nga makabatyag sang kalipay sa mga mabudlay nga mga tinion—isa ka importante nga bahin sang ministering pareho sang himuon sang Manluluwas.

Yari ang tatlo ka mga ideya nga sarang makabulig (kag nga dapat likawan) samtang nagatulok kita sa pagtutok sa kaayuhan nga ginhatag sang Dios sa aton mga kabuhi.

1. Maghibalo

Si Bonnie H. Cordon, Pangkabilugan nga Pangulo sang Young Women , nagabulig sa aton nga maintiendihan nga kinahanglan naton nga tan-awon sila nga aton gina-ministeran— indi lamang ang ila mga palas-anon kag mga kabudlayan apang subong man ang ila mga kusog, mga talento, kag mga kadalag-an. Nagsiling sia nga kinahanglan naton nga mangin “isa ka kampeon kag isa nga masaligan—isa nga nakahibalo sa ila mga sirkumstansya kag nagasuporta sa ila sa ila mga ginalauman kag mga handum.”¹

Sa paanggid sang mga karnero kag mga kanding, ang Manluluwas nagsiling nga sila nga makita sa nawala niya nga kamot magapamangkot: “Ginuo, san-o ka bala namon makita nga gutom kag ginpakaon ka namon, ukon nauhaw kag ginpainum ka namon?

“San-o ka bala namon makita nga dumoluong kag ginsagop ka namon?” (Mateo 25:37–38).

“Mga kauturan, ang yabi nga tinaga amo ang makita” siling ni Sister Cordon. “Ang mga matarong nakita nila ang mga nagakinahanglan tungod nagabantay kag nagapanilag sila. Kita man sarang mangin mabantayon nga mata sa pagbulig kag pagpaumpaw, sa pagsaulog kag bisan pa gani sa paghandum.”²

2. Magpangita sang mga Rason nga Magsaulog

Sauluga ang mga kadalag-an dako man ukon gamay. Ayhan ini mahimo nga paglampuwas sang balatian nga kanser ukon paglampuwas sa isa ka pagbulagay, pagkabaton sa bag-o nga trabaho ukon pagkakita sang pares sang sapatos, paglampuwas sang isa ka bulan pagkatapos sang kamatayon sang isa ka pinalangga ukon pagtibawas sang isa ka semana nga wala sing kalamay.

Magtawag sa pagpanginbulahan, magpadala sang kard, ukon maggwa para manyaga. Sa pagpaambit sang aton mga bugay sa isa kag isa, pagkabuhi nga may pagpasalamat, kag pagsaulog sa mga bugay kag mga kadalag-an sang iban, kita “magakasadya sa kalipay sang aton mga kauturan” (Alma 30:34).

3. Kilalaha ang Kamot sang Ginuo

Kon kaisa ang magkalipay upod sa iban nagakahulugan sang pagbulig sa ila nga makita ang mga rason sa pagkalipay—wala’y sapayan sang mga kabudlayan ukon kasadyahan nga nagaabot sa aton mga kabuhi. Ang simple nga kamatuoran nga ang Amay nga Langitnon nakakilala sa aton kag handa mag-alsa sa aton mangin isa ka dako kaayo nga ginatunaan sang kalipay.

Sarang kamo makabulig sa iban nga marealisar ang kamot sang Ginuo sa ila mga kabuhi paagi sa pagpaambit kon paano ninyo ini nakita sa inyo kaugalingon nga mga kabuhi. Magmangin sensitibo sa pagpaambit kon paano ka nabuligan sang Amay nga Langitnon sa imo mga hangkat. Ini nga panaksihon makabulig sa iban nga matalupangdan kag marealisar kon paano Sia nagbulig sa ila (tan-awa sa Mosias 24:14).

4. Indi Paglimitahi ang Imo Ikasarang sa Pagkalipay

Sa masubo nga palad, kita sa panalagsa nagalimita sang aton kaugalingon nga ikasarang sa pagkalipay upod sa iban, labi na gid kon nagabatyag kita nga wala kompiyansa sa kon ano ang aton mahatag ukon ano na ang aton nalab-utan. Imbis nga magpangita sang kalipay sa kalipayan sang iban, nagakahulog kita sa tugalbong sang sang pagkumparar. Kag suno sa gintudlo ni Elder Quentin L. Cook sang Korum sang Dose ka mga Apostoles: “Ang pagkumparar sang mga bugay daw halos sigurado gid nga nagatabog sang kalipay. Indi kita pwede mangin mapinasalamaton kag mahisaon sa amo man nga tion.”³

“Paano naton madaog inang huyog nga tama ka-komon sa halos tanan sa aton?” pamangkot ni Elder Jeffrey R. Holland sang Korum sang Dose ka mga Apostoles. “… Mahimo kita nga mag-isip sang aton madamo nga mga bugay kag magpanginbulahan sang mga hinimuan sang iban. Pinakamaayo sa tanan, mahimo kita mag-alagad sa iban, ang pinakamanami nga ehersisyo para sa tagipusuon nga sadto pa ginpanugyan.”⁴ Imbis nga magkumparar, mahimo naton nga dayawon sila nga aton ginaministeran. Maalwan nga ipaambit kon ano ang inyo nanamian sa ila ukon sa mga miyembro sang ila pamilya.

Sa ginapahanundom sa aton ni Paul, kita tanan mga miyembro sang lawas ni Cristo, kag kon “ang isa ka bahin ginapadunggan, ang tanan nga bahin nagakalipay upod sa iya” (1 Mga Taga-Corinto 12:26). Sa bulig sang Amay nga Langitnon, mahimo naton mahibaloan ang mga inagihan sang iban, magsaulog sang dalagko kag ginagmay nga mga kadalag-an, kag buligan sila nga makita ang kamot sang Ginuo, kag madaog ang kahisa agud matuotuod kita nga magkalipay sing ululupod sa mga bugay, mga talento, kag mga kalipayan sang iban.

© 2019 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, October 2019. Hiligaynon. 15771 861