Ip Yohk ke Karihngihn, Ohktopa 2019

Kuh Kom Muhlkuhnlah Ip Yohk Srihpac se ke Karihngihn inge?

In karihngihn pa in “engan yorolos su engan” yohk liki na in “tung yorolos su tung” (Rome 12:15).

ministering

Sruhlweyucklac sel Augusto Zambonato

Ke kuht nuhnkuh ke karihngihn uh, fihsrwacsr in nuhnkweack in kahsruh elos suc enenuh. Kuht sramsramkihn oraclah imac luhn katinmas, uslah mongo in ekuh nwacn mwet mas, kuh sang nuh selos suc upac nuh se. Kuht esamwack luti lal Paul in “tung yorolos su tung,” tuhsruhk kuh kuht lohacng nuh ke ip se emet ke fuhs sacn—in “engan yorolos su engan”? (Rome 12:15). Engan yohrohlos suc kuht karihngihn—lah kalmeyac an pa in ahkfuhlwactye pihsrlac lalos kuh kahsrwelos konwacack engan ke pacl upac—pa ip yohk srihpac ke karihngihn oacna ke Mwet Lahngo El oruh.

Pa inge nuhnak tolu ma kuh in kahsruh (ac sie ma in lusrong) oacna ke kuht ngwetwacng lohacng nuh ke ma wowo God El oakiyac nuh ke moul lasr.

1. In Etuh

Bonnie H. Cordon, General Prestuhn luhn Muhtwacn Fuhsr, kahsrwe kuht in kahlwem kac lah kuht enenuh in liye elos suc kuht karihngihn—tiac liye ma toasr ac tihkuclkucl lalos muhkwena tuhsruhk tuh oacyacpac kuhiyaclos, talan lalos, ac ma elos pihsrlac kac. El fahk lah kuht enenuh in pa “sie champion ac sie mwet puhlaik—sie mwet suc etuh ke ma ac sikyak tok ac tahpuhkkuhlos ke finsrak ac kena lalos.”¹

Ke puhpuhlyuck soko ke sip ac nacni ah, Mwet Lahngo El fahk lah elos suc konweyuckyak ke lacpo lacyot Lal fah siyuck: “Leum, ku ngac kut liye kom masrinsral, ac sot ma nom? ku malu, ac sot ma nimom?

“Ngac kut liye kom sie mwet sac, ac sulikomyak?” (Matthew 25:37–38).

“Tamuhlwel ac tahmtahel, kahs sac pa liye,” Sister Cordon el fahk. “Mwet suwohswohs liye elos suc enenuh ke srihpen elos liye ac akihlen. Kuht oacyacpac kuh in sie mwet liyactwen se in kahsruh ac ahkwoye, in ahkfuhlwact ac finne mwemwe.”²

2. Konwacack Srihpac in Ahkfuhlwact

Ahkfuhlwactye kuhtanglah luhn ma yohk kuh srihk. E kuh in som pacna nuh ke mas cancer kuh sahflahiyacn fahsrwelihk inmahsrlo, sokwack orekma sasuc se kuh konwacack fahluhk se ma tuhlac, pain moullac sun mahlwem se tukun wacngihnlac luhn mwet sacohk kuh pain moullac sun wik se tiac eis suka.

Pahng in ahkfuhlwactye, suhpwaclah sie card, kuh som muhtwacta eis mongo in infulwacnlwen. Ke kuht tuhkweni akacsruhi mwe insewowo inge, moulkihn kaksak, ac ahkfuhlwactye mwe insewowo ac kuhtanglah luhn mwet sahyac, kuht in “kaksak ke engan wi mwet wiyacsr” (Alma 30:34).

3. Liye Poun Leum

Kuhtuh pacl uh kalmacn engan wi mwet sahyac uh kahsrwe kuht liyaclah srihpac luhn engan—macnsis kuhnlah ma upac kuh mwe ahkengan ilyak nuh ke moul lasr. Ma pwacye fihsrwacsr se ma Pahpah Tuhmasr Inkuhsrao El etuh kacsr ac ahkolah in sruhkkuhtyak kuht in muh sie mwe ahkengan.

Kom kuh in kahsruh mwet sahyac in liye poun Leum ke moul lalos pa in akacsruhi lah kom liye fuhkah ke liye lom sifacna. Fihsrwacsr in akacsruhi lah Pahpah Tuhmasr Inkuhsrao El kahsrwe kom fuhkah ke ma upac sikyak nuh sum. Testimoni kuh in kahsruh mwet sahyac in akihlwen ac ahkkahlwemye lah El kahsrwelos fuhkah (liye Mosiah 24:14).

4. Nimet Ahksrihkye Etuh Lom in Engan

Tuhsruhktuh, kuhtuh pacl uh kuht ahkfalye etuh lasr in engan wi mwet sahyac, yohkiyacna ke kuht puhla tahfuh luo ke ma kuht enenuh in sang kuh kuht oasr oyac ke moul uh. Likina in konwacack engan ke sie mwet sahyac, kuht puhtatyang nuh ke mwe sruhf kuhpahsr nuh kac uh. Ac oacna ke Elder Quentin L. Cook ke U luhn Mwet Sap Singucul Luo el luti: “Kapsrweni mwe insewowo uh apkuhran in sie ma som eslah engan. Kuht tiac kuh in srui kaksak ac nuhnak koluk ke pacl se fanna.”³

“Kuht ac kuhtanglah fuhkah sie ma kwacna falisyac apkuhran in mwet nuhkwewa?” siyuck sel Elder Jeffrey R. Holland ke U luhn Mwet Sap Singucul Luo. “… Kuht kuh in oek mwe insewowo pucspucs lasr ac kuht kuh in pahspahs ke oraclah wowo luhn mwet sahyac. Wo emet pa, kuht kuh in kuhlwacnsapuh mwet sahyac, ahsrosr na wo se nuh ke insiyac ma sihmihsyucklac.”⁴ Likina in kapsruh, kuht kuh in ahkkweye elos suc kuht oruh karihngihnyuck nuh se. Mwesahs in akacsruhi ma kom sruikihn kaclos kuh mempucr ke sucu lalos.

Oacna ke Paul el ahkacsmakihnye kuht, kuht nuhkwewa mempucr ke mahno luhn Kraist, ac ke “sie mempucr el akfulatyeyuk, mempucr nukewa wi engankihn” (1 Met Korint 12:26). Ke kahsruh Lal Pahpah Lucng, kuht kuh in etuh ke ma sikyak nuh sin mwet sahyac, ahkfuhlwactye kuhtanglah yohk ac srihsrihk, kahsrwelos in akihlwen poun Leum, ac kuhtanglah srahngwesra tuh kuht in muh pwacyena tuhkweni engan ke mwe ahkinsewowo, talan, ac engan luhn mwet sahyac.

© 2019 ke Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/18. Ahkkweyeyucklac ke lweng: 6/18. Lweng ke Ministering Principles, October 2019. Kosraean. 15771 868

Mwe Kahsruh

1. Bonnie H. Cordon, “Becoming a Shepherd,” Liahona, Nohfuhmpuh 2018, 75.

2. Bonnie H. Cordon, “Becoming a Shepherd,” 75.

3. Quentin L. Cook, “Rejoice!” Ensign, Nov. 1996, 30.

4. Jeffrey R. Holland, “The Other Prodigal,” Liahona, May 2002, 64

Srihkasrak luhn Mwet Lahngo

Jisus Kraist El kwacna engan ke mwet sahyac engan uh. El wi macruht se fin acn Cana, yac El tiac ahkfuhlwact muhkwena ke toeni engan sac tuhsruhk ekuhllah kof uh nuh ke wine (liye John 2:1-11). Kuht oayacpac kuh in sang kuhiyacsr in wi tuhkweni sacohk ke moul luhn mwet suc kuht oruh karihngihnyuck nuh se.

Kuht oacyacpac liye lah Leum El engan ke suwohswohs luhn mwet sahyac. Ke El muhtwacta nuh yurin mwet Nephi, El fahk nuh selos, “Kowos insewowo ke srihpen luhlahlfongi lowos. Ac inge liye, engan Luhk fohnlah” (3 Nephi 17:20).

Suli in Oruh

Nuhnkuh elos suc kom oruh kahsruh lom nuh se. Talan ac kuhiyac fuhkah oasr selos? Meac ohiyac wowo kuh kuhtanglah wowo oasr tari selos? Kom ac oruh fuhkah kom in engan weluhlos, sang kahs in ahkkuh nuh selos, kuh ahkkweyelos?