Mukenji wa kudi Buimanyinyi bua kumpala, Ngondo wa Dikumi ne Umua 2019

Didikumbaja bua Kubuela mu Ntempelo Munsantu

Kudi Muimanyinyi Russell M. Nelson

Bukezuka bua muntu budi bulomba dikudimuka dinena dia meji ne muoyo bua kufuanangana bikole ne Mukalenga.

Bana betu baluma ne bakaji, bu mutudi bafika kundekelu kua mpungilu ewu wa mvulukidi, tudi tusakidila Mukalenga bua mikenji idi ye mufila mu ngenyi yetu ne bua misambu idi mitukankamika. Tudi basanka bikola ne difesto edi dia nyuma.

Tudi bamanya se lumu luimpe luibakulula lua Yesu Kilisto nelutuale ditekemena ne disanka kudi bantu bateleja ne bateka mu tshienzedi malongeshi Alu. Tudi bamanya kabidi se nzubu yonso udi mua kushala muaba wa tshitendelelu wa ditabuja, udi ditalala, dinanga, ne Nyuma wa Mukalenga ne bua kusomba.

Mbia bushuwa, tshintu tshia mushinga mu Dibakulula tshidi tshikala ntempelo munsantu. Mishinga ya tshijila idimu ne bipungidi bidi bikala ne mushinga bua kulongolola bantu badi pabuipi bua kuakidila Musungidi bua Dilua Dîbidi Dienda. Bua mpindiewu tudi ne ntempelo 166 idi mijidila, ne mikuabu yabungi idi yenda ilua.

Dituku dia bîbi biunzulula nedikalaku kumpala kua kujidila kua ntempelo mupiamupia ne muenzulula yonso. Balunda babungi badi kabayi ba ntedelelu wetu nebabuela ku makumbula a ntempelo ne nebalonga tshintu pa mabenesha a ntempelo. Ne bamua ba ku bakumbudi aba nebikala ne disua dia kumanya biabungi. Bamua nebakonka ne muoyo mujima bua kumanya mushindu udibu bua kudikumbaja bua kupeta mabenesha a ntempelo.

Tuetu bu bidimba bia Ekelezia, tudi ne bua kuikala badilongolola bua kuandamuna ku makonka abu. Tudi mua kumvuija se mabenesha a ntempelo adiku bua muntu yonsu ne bantu bonsu badilongolola nkayabu. Kadi kumpala kua bobu kubuela mu ntempelo udi mujidila, badi ne bua kudikumbaja. Mukalenga mmusue bua bana Bende bonso babanyangana mabenesha a tshiendelela adi mikala mu ntempelo Wenda. Yeya uvua muleja tshidi muntu yonsu ne bua kuenza bua kudikumbaja bua kubuela mu nzubu Wenda munsantu.

Muaba muimpa utudi mua kutuadija kulonga tshiotshi etshi udi ngua kutuma ntema ku miaku mikudika pambelu pa ntempelo yamba: “Bunsantu kudi Mukalenga: Nzubu wa Mukalenga.” Mukenji wa muimanyinyi Henry B. Eyring ne bakuabu babungi lelu mmutupesha lungeyi mu nyuma wetu bua tushale bansantu mene mene. Ntempelo yonsu mmuaba wa tshijila; mubuedi wa mu ntempelo yonsu udi udienzeja bua kuikala munsantu mene mene.

Bionsu bidi bilombibua bua kubuela mu ntempelo bidi bisuikibua ku bunsantu bua muntu. Bua kupima bujitu bua didilongolola edi, muntu yonsu udi musue kusankishibua ne mabensha a ku ntempelo udi ne bua kuenza miyuki ya nkaya ibidi: wa kumpala ne muepiskopo, mubedi wa mu buepiskopo, anyi muimanyinyi wa ditamba; muibidi ne muimanyinyi wa dikunji anyi mission anyi umua wa ku babedi benda. Mu miyuki eyi, nkonku yabungi neyedibua.

Imua ya ku nkonku eyi ivua mikala mifundulula mu matuku apitshi aa bua ngumvuilu mutoka. Ndi musue kunubaluluila nayi mpindiewu:

Udi ne ditabuja ne bujadiki bua Nzambi, Tatu wa Tshiendelela; Muanenda, Yesu Kilisto; ne Nyuma Munsantu anyi?
Udi ne bujadiki bua bupikudi bua Yesu Kilisto ne bua Buikadianganyi Buenda bu Musungidi ne Mupandishi weba anyi?
Udi ne bujadiki bua Dibakulula dia lumu luimpe lua Yesu Kilisto anyi?
Udi utua mpanda kudi Muimanyinyi wa Ekelezia wa Yesu Kilisto wa Bansantu ba Matuku a Ndekelu bu muprofeta, mumonyi, ne musokolodi ne muntu umuepela udi muanyishibua pa buloba bua kuikala ne nsapi yonsu ya buakuidi anyi?

Udi utua mpanda kudi bidimba bia mu Buimanyinyi bua Kumpala ne Tshisumbu tshia Bapostolu Dikumi ne Ibidi bu baprofeta, bamonyi, ne basokolodi anyi?

Udi utua mpanda kudi bakuabu Balombodi Bakulu ne balombodi ba pabuipi ba Ekelezia anyi?
Mukalenga wa kamba se malu onsu “enzeka mu bukezuka” kumpala kuenda (Malongeshi ne Bipungidi 42:41).

Udiku ulama bukezuka mu meji ne mu nsombelu weba anyi?

Udi unemeka dîyi dia didilama anyi?
Udi uteka mu tshienzedi malongeshi a Ekelezia wa Yesu Kilisto mu ngikadilu weba nkayeba ne bantu ba mu dîku dieba ne bakuabu anyi?
Udiku utua mpanda anyi ukankamika malongeshi, ngenzelu, anyi ntendelelu mushilangana ne wa Ekelezia wa Yesu Kilisto wa Bansantu ba Matuku a Ndekelu anyi?
Udi udienzejaku bua kunemeka Dituku dia Nsabatu, ku nzubu ne mu ekelezia; kubuela mu bisangilu bieba; kulongolola ne kudikezula bua kudia biadidia bia tshijila; ne kuikala ne nsombelu upetangana ne mêyi ne mikenji ya lumu luimpe anyi?
Udi udienzeja bua kuikala mululama mu malu onsu adi wenza anyi?
Utu ufuta tshia-dikumi tshijalama anyi?
Udi umvua ne unemeka Dîyi dia Meji anyi?
Udi ne dibanza dia makuta anyi bua kuenza bukuabu kudi mubaki weba wa kala eshi muana anyi?

Biobi bikala eyowa, udi munkatshi mua kujikijangana ne mabanza aa anyi?
Udi ulamaku bipungidi biuvua muenza mu ntempelo, kukumbaja ne diluata dia garma ka mu ntempelo bumuvuabu baleja mu dotation anyi?
Kudiku mibi minena mu nsombelu weba yudi musua bua bayilongolola bu tshitupa tshia kukudimuna kueba kua mutshima kudi balombodi ba buakuidi anyi?
Udi ujadika nkayeba se udi mukezuka bua kubuela mu nzubu wa Mukalenga ne kuenza mishinga ya mu ntempelo anyi?

Malaba, nkonku ya dianyishi dia kubuela ku ntempelo mifundulula eyi neyikala miabanya kudi balombodi ba Ekelezia mu buloba bujima.

Mu dikumbaja ku mandamuna majalama ku nkonku eyi, bidi bindila kudi mubuedi wa ku ntempelo mukulumpa yonso bua aluata garma ya buakuidi ya tshijila muinshi mua bilamba bienda bia tshibidilu. Etshi tshidi tshikala tshifuanyikijilu tshia dipangadika dia munda bua kudienzeja dituku dionsu bua kufuanangana bikola ne Mukalenga. Tshidi kabidi tshituvuluija bua tushale balamata dituku dionsu ku bipungidi bienza ne bua kuendela mu njila wa tshipungidi dituku dionsu mu ngikadilu munsantu mule.

Mpidiewu, bua tshitupa tshipi, Ndi musue kuakula kudi bansonga betu. Tudi tunukankamika bua nudikumbaja bua kupeta mânyishi a mutantshi mutshintshika. Nebanuebeja nkonku anu idi minutangila mu didilongolola dienu bua mishinga ya dibatiza ne dijadika bienza pa mutu pa mukuabu. Tudi ne disanka diabungi bua bukezuka ne disue dienu bua kudibuinka mu mudimu awu wa tshijila. Tudi tunusakidila!

Bukezuka bua muntu bua kubuela mu nzubu wa Mukalenga budi bulomba kudilongolola kuabungi kua muntu mu nyuma. Kadi ne diambuluisha dia Mukalenga, kakuena tshidi katshiyi mua kukumbana to. Mu mishindu mikuabu, bidi biteketa bua kuibaka ntempelo pamutu pa kuibaka bantu balongolola bua ntempelo. Bukezuka bua muntu budi bulomba dikudimuka dijima dia meji ne muoyo bua kuikala bu Mukalenga, kuikala muena ditunga mujalame, kuikala tshilejelu tshimpa, ne kuikala muntu munsantu.

Ndi njadika se mudimu wa kudilongolola wa nanku udi utuala mabenesha mapita mu muoyo ewu ne makuabu akena kulamibua mu muoyo utshilualua, mu kukumbaja ne ditungunuka dia kuikala pamua ne dîku dieba bua tshiendelela “mu tshitupa tshia disanka didi kadiyi dijika.”¹

Mpidiewu Ndi musue kuakula bua tshiena-bualu tshikuabu: malu a kuenza mu tshidimu tshialua. Mu tshikondo tshia printemps wa tshidimu tshia 2020, nebikala bidimu 200 katshia Joseph Smith wapeta dimanya pa dimueneka dia Nzambi ditudi tubikila ne Tshikena-Kumona tshia Kumpala. Nzambi Tatu ne Muanende Munanga, Yesu Kilisto, bakamuenekela Joseph, nsongalume wa bidimu 14. Muanda ewu kiwakaleja ntuadijilu wa Dibakulula dia lumu luimpe lua Yesu Kilisto mu tshuwidi tshialu, bikala anu muvuabi biambibua mu Bible Munsantu.²

Pashisha kuakalua dilondangana dia makumbula a batumibue ba ku dîulu, bumudi Moloni, Yona Mubatiji, ne Bapostolu ba pabuipi bumudi Petelo, Yakobo, ne Yona. Bakuabu bakalonda, bumudi Mosa, Eli, ne Eliya. Bonsu buabu bakatuala bukokeshi bua Nzambi bua kubenesha bana ba Nzambi pa buloba tshia kabidi.

Mu tshishima, tuakapeta kabidi Mukanda wa Molomo: Bujadiki Bukuabu bua Yesu Kilisto, Mifundu idi yenda pamua ne Bible. Mabuluibua adi mapatula mu Malongeshi ne Bipungidi ne Dibue dia Mushinga Mukole bidi bibobesha kabidi lumvu luetu lua Mikenji ya Nzambi ne bulelela bua tshiendelela.

Nsapi ne midimu ya buakuidi yakadi mibakulula, bumudi midimu ya Bapostolu, Bakulu Makumi Muanda-Muteketa, Patriache, muakuidi munena, mukulu, muakuidi, mulongeshi, ne diakre. Ne ba Mamu badi bananga Mukalenga badi basadila ne tshisumi mu Kasumbu Kambuluishi, Kalasa ka Bana, Nsonga Mikaji, Kalasa ka Dialumingu, ne mu mabikila makuabu a Ekelezia—bitupa bionsu binena bia Kuibakulula kua lumu luimpe lua Yesu Kilisto mu tshuwidi tshialu.

Nunku, tshidimu tshia 2020 netshisungudibua bu difesto dia bidimu nkama ibidi. Mpungilu Munena wa Ngondo Muinayi ulualua neikala mushilangana ne mpungilu yonsu yakale. Mu Ngondo isambombo ilualua, ndi ntekemena se tshidimba tshionsu ne dîku dionsu ne badilongolola bua mpungilu wa pabuenda wasekelela nshindamenu ya lumu luimpe luibakulula.

Nudi mua kubangisha kudilongolola kuenu mu kubalulula kabidi muyuki wa Tshikena-Kumona tshia Kumpala tshia Joseph Smith bumuditshi tshifunda mu Dibue dia Mushinga Mukola. Ndongamu wa kulonga kuetu mu Luaku, Undonde neikala Mukanda wa Molomo. Nudi bua kupeta disue bua kuela meji ku makonka bumudi, “Mushindu kayi udi muoyo wanyi mua kushintuluka pikala dimanya dianyi dia mu Mukanda wa Molomo diumbusha musangu umue?” anyi “Mushindu kayi udi malu adi mapitakana panyima pa Tshikena-Kumona tshia Kumpala mafila dishintuluka kundi ne kudi bana betu?” Kabidi, ne video ya Mukanda wa Molomo idikoku, nudi bua kuyibueja mu kulonga kuenu kua nkaya ne kua dîku.

Sungulayi nkonku yenu nkayenu. Enzayi wenu ndongamu. Dibuinkayi mu bukenka bua butumbi bua Dibakulula. Panudi nuenza nanku, mpungilu munena wa Ngondo Muinayi ulualua kakuikala anu wa kusekelela to; neikala kayi wa kupua muoyo.

Bua kujikija, ndi nushila dinanga dianyi ne dibenesha dianyi bua umua yonso wa kunudi ikala wa disanka ne munsantu mu dituku dionsu didi dipita. Mu kuindila, suayi nuikala batuishibue bua se dibuluibua ditshidi ditungunuka mu Ekelezia ne neditungunuka mu buludiki bua Mukalenga too “nepakumbana tuipatshila tua Nzambi, ne pamba Yehowa Munena se mudimu wakumbanyi.”³

Ndi nubenesha bikola, njadika kabidi dinanga dianyi buenu, ne njadika se Nzambi udi ne muoyo! Yesu udi Kilisto! Etshi tshidi Ekelezia Wende ne tudi bantu Bende. Mu dina dia tshijila dia Yesu Kilisto, amen.

© 2019 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia First Presidency Message, November 2019. Tshiluba97932 760