Ngaahi Peesi Fakalotofonuá
Hoko ʻa Pilinisi Ata ko e Fakaafe Makehe ʻi he Ngaahi Polokalama Kolisi Tutuku ʻa e Kau Tongá ʻi ʻIutaá
Ne meʻa atu ʻa ʻEiki Nōpele Pilinisi Ata ʻo Tongá ki ʻIutā ʻi he uike kuo ʻosí.
Naʻá ne hoko ko e fakaafe fakalāngilangi ʻi he fakataha ʻa e Kautaha Kolisi Tutuku ʻa Liahoná ʻa ia ne fakaʻosi ʻaki ha fakataha lotu ʻi he Tāpanikalé ʻo e Temipale Sikueá ʻi he Sāpate 28 Siulaí.
Lolotonga ‘ene ʻi ʻIutaá naʻá ne meʻa atu ki he pule kolo ʻo Polovó, Mīseli Kaufusi, mo ʻĒliki mo Kalolaine Samuei, ʻa ia naʻá na ngāue ʻi ha ngaahi taʻu lahi ʻi hono fakahoko ha ngaahi fatongia kehekehe ʻi he Siasí ʻi he Puleʻanga Tongá.
Naʻá ne hoko foki ko e fakaafe makehe ʻi ha polokalama ʻa e Kautaha Kolisi Tutuku ʻa Liahona ʻi he Vahe ʻIutaá ne fai ʻi he Ako Māʻolunga Polovó ne ‘i ai ha kakai ‘e toko 1,000 nai.
ʻI he taimi naʻe meʻa atu ai ʻa e Pilinisí ki ʻIutā ʻi he 2016 naʻá ne feʻiloaki ai mo e kau taki ʻo e Siasí pea ʻaʻahi ki ha ngaahi fale lahi ʻa e Siasí hangē ko e feituʻu ʻiloa fakamāmanilahi ko e Laipeli ʻo e Hisitōlia Fakafāmilí.
Naʻe papitaiso ʻa Pilinisi Ata ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he 2015.