Ukpebnkpo Unwam, Ofiong ke isua 2019

Se Mbuk Ukabade-isua Ekpeb Nnyin abanga Unwam

“Ini emi edi ini eke emade ekan ke isua. Ekwo inem ikwo kiet; Ini ukabade-isua eyesop edisim mi. Eting mbuk ebanga emana Christ, ke ini, nte ekedide nsekeyen, nte Enye ekedide ererimbot” (“Ikwo Mbuk emana-Christ,” Children’s Songbook, 52).

Ini ukabade-isua edi eti ini emi erong, mme ekpeme-erong, usin-udia-ufene, ye mme ntanta-ofiong esopde-idem ebo mbufa iboro. Mmo ekabare akpan mbon-mbre ke ndifiak nting mbanga kiet kotu akpan nkpo-ntibe ke mbuk-uwem owo: emana Jesus Christ. Ediwak ufokemana ewut ndise ido-obio ke ufok mmo. Mbon efen ewut ke ndikot mbuk emana Esie mme ndibuana ke ido-mbre kiet. Ukem nte ofuri mbuk eke Christ, mbuk emana Esie oyoho ye ukpeb emi nnyin ikemede ndikpeb mbanga unwam, kabanga ndibuana unwana Esie man iyama ererimbot. President Henry B. Eyring, Udiana Onoitem ke First Presidency odoho ete ke “Mbuk Ukabade-isua edi mbuk ima.”

“… Ke mme mbuk emana Christ, nnyin imekeme ndikut inyung ikop oruk owo emi Enye ekedide ye owo emi Enye edide. Oro eyenam mbiomo nnyin efere ke usung isang. Ndien oro eyenam nnyin ifre-ibanga idem nnyin onyung anam mbiomo mbon efen efere.”¹

“Koro itie miduhe ino mmo ke ufok-isen owo” (Luke 2:7)

Enyene ufok-isen ikenimke ubet-ufok ino Andinyanga, edi inaha nte nnyin inam oruk ndudue oro! Nnyin imekeme ndinim ubet-ufok ino Andinyanga ke esit nnyin ke ndinam ubet-ufok nno ndito-eka iren ye iban nnyin ke okpokoro-udia, ke ufok ye ke mme ido nnyin. Ekeme ndinam ediwak ido ufok enem onyung enehede eti ke ndibuana ye mbon efen. Daiana ye ufokemana esie enyene ido eke ndikot owo kiet ete edibuana Ukabade-isua ye mmimo. Ofuri December, mmo eneme enyung ebiere owo emi mmo ekpemade ndikot.² Ufokemana mbufo ekeme nditongo ukem ido oro. Ndusuk owo kiet emi mbufo enwamde akpama ndibuana ye ufokemana mbufo ke ndikwo mme inem ikwo Ukabade-isua otokiet. Mbufo nko emekeme ndinam ubet-ufok ke udia-mbubreyo Ukabade-isua nno owo kiet emi minyeneke ufokemana ke mkpere mbufo.

Ewe oruk usung ke ndidara Andinyanga akan ke nditiene uwutnkpo nda-nsin Esie? Eti ete ke Enye okoot “kpukpru owo ete etiene Enye enyung ebuana ke mfon Esie; inyung isinke owo ndomokiet nditiene Enye, afia ye obubit, owo-ubiong ye oworo-ufun, eren ye nnwan; ndien Enye eti mme okpono-ndem; kpukpru owo edi ukem eno Abasi, Jew ye Gentile” (2 Nephi 26:33). Enim ubet-ufok enyung enam nda-nsin.

“Ndien mme ekpemerong edu ke edem oro, emi etiede ke inwang ekpeme erong mmo ke okoneyo” (Luke 2:8)

Oro odot ete ke mme ekpemerong eyedu kotu mme akpa owo eke edikomde nsek Andinyanga. Mme prophet eset ekekot Jesus Christ nte “Andibok Israel” (Psalm 80:1) ye “Andibok ke ofuri isong” (1 Nephi 13:41). Ndien Christ ke Idemesie ete, “Ami ndi eti ekpeme-erong; mmofiok se inyenede Mi” (John 10:14). Ndifiok erong nnyin nyung nse enyin edi akpan nkpo ke ndikpeme nyung nnwam ke nte Andinyanga esinamde.

Ye uyama unwana ye ndiye mbana-idem, odu ediwak nkpo ndi-se kini Ukabade-isua. Edi ndusuk imekeme ndikut ata akwa uyai ke ini emi kini nnyin itide ndiwongore nse mbon emi nnyin inwamde nyung nse otu-erong nnyin enyin. Nditim nse ekeme ndidi ndikut se owo kiet enehede ama mme ndibup mbanga se owo kiet aduakde abanga ini nduok-odudu Nnyin ise enyin kini nnyin isede inyung iyode unana mbon efen—enye emi ekutde ye eke owo mikutkke.

Ini emi ebe Cheryl, Mick, akakpade iwiwa, enye ama etek. Nte ini akpa Ukabade-isua ke enye miduhe ekperede, ekikere-ikpong oro ama okpon. Ke mfoniso, eyeneka unwam esie Shauna ama odu ye enye. Shauna ye ebe esie, Jim, ema eda Cheryl eka ediwak ebiet kini nduok-odudu. Mmo ekut nwaha mforoidem eke Cheryl enyung ebiere ndinam nkpo mbanga oro. Esisit usen mbemiso Ukabade-isua edisim, Shauna ye Jim eda eno Ukabade-isua esok Cheryl: obufa ediye mforoidem kiet. Mmo ema efiok unana ikpokidem Cheryl eke mfofiob mforoidem ye unana eke ekikere emi oyomde ndongesit ye nsanga. Mmo edu do man eyo mme unana oro ke nte mmo ekemede enyung eno eti uwutnkpo kabanga nte nnyin nko ikpekemede ndise otu-erong nnyin enyin.³

“Mme ekpemerong edoho kiet eken ete, Eyak nnyin ika ke Bethlehem” (Luke 2:15)

“Eyak nnyin ika idahaemi” edi ikoot emi asanagde ye odudu! Mme ekpemerong ikekereke ite ke mme ufan mmo eyenehede ekop mmemidem ke ndika isang oro. Mmo ikedahake ini kiet ika Bethlehem ke idem mmo. Ye idara mmo ewongore ese kiet eken enyung edoho ete, “Eyak nnyin ika idahaemi!”

Ke nte nnyin mikemeke ndikot mme ufan nnyin ete edi edikut nsek Andinyanga, nnyin imekeme ndikot mmo ete edikop inem spirit Ukabade-isua (mme spirit Christ) ke ndinwam ye nnyin. Bonnie L. Oscarson, akani Adaibuot Nkaiferi Iban ete ke “Usung ndinam spirit Ukabade-isua awak edi nditat-ubok nno mbon emi ekperede nnyin nkpo nyung nno eno eke idem nnyin.⁴ Ekere nte mbufo ekpekamade candle kiet. Mbon efen ekeme nditim nkut nyung mbo ufon otode unwana candle mbufo, edi ekere ebanga mfofiop emi mmo edikopde edieke mbufo ekpedade candle mbufo eyit ke candle mmo enyung eyak mmo ekama unwana oro eno idem mmo.

Christ ke Idemesie ekpeb ete ke mbon emi eke etienede Mi eyenyene unwana uwem (se John 8:12). Ndinwam nte Enye akanamde edi usung kiet emi nnyin ikemeke nditiene Enye nyung ndara unwana oro ekenwongoke ndino. Ntre ebuana unwana ke ndikot mbon efen man ediana ye mbufo eno unwam! Didie ke mbufo ye mbon emi mbufo enwamde ekeme ndinwam otokiet? Otokiet mbufo emekeme ndibenge inem udia mbufo nim mme ndidighe owo kiet ye ekpri eno mme ekpri-nwed. Otokiet mbufo mbiba emekeme ndikop unwana emi otode ke nditiene uwutnkpo utom-unwam Christ.

“Mmo ebuk se eketingde eno mmo ebanga eyen emi” (Luke 2:17)

Emem ndikere-mbanga inem idaresit eke mme ekpemerong ke nte mmo ekebuanade utibe mbuk emana Christ ye ediwak owo nte mmo ekekemede. Nte mme angel ekefioride, Messiah emi eketingde prophecy ebanga ama edi! Enye okodu mi! Ke akpaniko, ndibuana eti mbuk eke Andinyanga edi akamba ibuot-iko eke mbuk emana-Christ. Mme angel ema ekwo-ikwo. Ntanta-ofiong okowut usung. Ndien mme ekpemerong ebuk se eketingde eno mmo ebanga.

Nnyin imekeme ndidian uyo nnyin nno mbuk Ukabade-isua ke ndibuana eti mbuk ye nditing iko-ntiense mbanga Andinyanga. Sister Jean B. Bingham, Relief Society General President ekekpeb ete, “Nte mbufo enyenede ufang ndida-nno Andinyanga ke utom unwam mbufo, ebup idem mbufo ete, ‘Didie ke ami nkeme ndibuana unwana gospel ye owo mme ufokemana emi?’” “Nso ke Spirit oyom ete ami nam?”⁵

Se esisit ekikere ifang mi anade ono mbufo ndikere-mbanga ke nte eyomde ndifiok danga mbufo ekpebuanade iko-ntiense eke Andinyanga ye gospel Esie.

Eyom itie nwed Abasi kiet emi otukde ekikere mbufo kabanga Andiyanga mme owutde ntak emi enyenede esit-ekom eno Enye. Ebuana oro ye mbon emi mbufo enode unwam.
Eno etop text mme eke social media ye ndise-video Ukabade-isua kiet esok owo. Odu ediwak inem nkpo oro ke ChurchofJesusChrist.org!
Eting eno ufan kabanga inem editi nkpo mme ido emi anamde mbufo eti ebanga Christ.

Enyene mbuotidem ke Edisana Spirit eyedi ntiense abanga akpaniko eke iko ntiense mbufo, ukem nte Enye ekedide ntiense ono Simeon ye Anna ke nsek Jesus ekedi Andinyanga (se Luke 2:26, 38).

Elder Dieter F. Uchtdorf eke Eboho mme Apostle Duopeba odoho ete, “Man inehede ikpono edi-di [Jesus Christ] ke ererimbot, ana nnyin inam nkpo nte Enye akanamde inyung inwam mbon efen ye esit-mbom ye mbom.” “Nnyin imekeme ndinam emi ofuri usen, ke iko ye edinam. Eyak emi edi ido Ukabade-isua nnyin, ke suto ebiet emi nnyin ikpedude—ifon ido esisit, iwak ndifen-nno, isuhore ndibiom owo ikpe, iwak ndinyene esit-ekom, inyung itat-ubok ke ndibuana se inyenede-awak ye mbon unana.”⁶

© 2019 by Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/18. Enyime ndikabare: 6/18. Edikabare eke Ministering Principles, December 2019. Efik. 15773 553