Dagiti Pagbatayan iti Ministering, Disiembre 2019
Ania ti Estoria A MANGISURO Kadatayo maipapan iti Ministering
“Daytoy ti panawen a patpatgen ti tawen. Kantaen ti rhyme; Asidegen a dumteng ditoy ti panawen ti Paskua. Isaritam ti pudno nga estoria ti pannakayanak tni Jesus, idi, kas maysa a maladaga, immay ditoy daga” (“The Nativity Song,” Children’s Songbook, 52).
Detalye manipud iti Adtoy ti Kordero ti Dios, ni Walter Rane
Ti panawen ti Paskua ti napintas a panawen nga adda kellaat a baro a kaipapanan dagiti karnero, pastor, kulluong, ken dagiti bituen. Agbalinda a napapateg nga agak-akem iti panangisarita iti maysa kadagiti kapatgan a pasamak iti pakasaritaan ti sangkataw-an: ti Panagungar ni Jesucristo. Adu a pamilia ti mangipakita iti buya ti pannakaipasngay kadagiti pagtaengannda. Agbasa met dagiti dadduma iti estoria maipapan iti pannakayanakna wenno makiramanda iti pageant. Kas iti amin nga estoria ni Cristo, napno ti estoria ti pannakayanakna kadagiti leksion a masursurotayo maipapan iti ministering, maipapan iti panangibinglay iti lawag iti silaw ti lubong. “Ti estoria ti Paskua ket estoria ti ayat,” kinuna ni Presidente Henry B. Eyring, Maikadua a Mammagbaga iti Umuna a Panguluen.
“… Kadagiti estoria ti pannakayanak ni Cristo, makita ken mariknatayo no asino Isuna idi ken no asino Isuna ita. Dayta ti mangpalag-an iti awittayo iti dalan. Ket daytoyto ti mangiturong kadatayo a manglipat iti bagitayo ken mangpalag-an iti awit dagiti dadduma.”1
“Awan ti siledda iti pagdagusan” (Lucas 2:7)
Awan ti siled nga inted ti akinkukua iti pagdagusan para iti Mangisalakan, ngem saantayo koma nga aramiden dayta a biddut. Mabalintayo ti maaddaan iti siled para iti Mangisalakan iti puspusotayo babaen ti kaadda iti siled para kadagiti kakabsattayo kadagiti lamisaantayo, kadagiti pagtaengantayo, kadagiti kannawidantayo. Maaramid nga ad-adda pay a makaay-ayo dagiti adu a kannawidantayo iti pamilia ken ad-adda pay a nakallalagip babaen ti panangiramantayo iti dadduma a tao. Addaan ni Daiana ken ti pamiliana iti maysa a kannawidan ti panangawis iti maysa a tao a mangbubos iti Paskua kadakuada. Tunggal Disiembre, pagsasaritaan ken ikeddengda no asino ti kayatda nga awisen.2 Mabalin a makairugi ti pamiliam iti maipada a kannawidan. Nalabit a ti maysa a tao a pagserbiam ket naayat a kumadua iti pamiliam iti panagkanta kadagiti paggugusto a kanta iti Paskua. Mabalinmo pay nga awisen iti pangrabii ti Paskua ti maysa a tao a mabalin nga awanan iti pamilia iti lugar.
Ania ti nasaysayaat a wagas a pangrambak iti Mangisalakan ngem iti mangsurot iti pagwadanna iti panangibilang? Laglagipem nga awisenna ti “amin nga umasideg kenkuana ket makiranudda iti kinasayaatna; ket awan ti idaddadumana nga umasideg kenkuana, nangisit ken puraw, adipen ken nawaya, lalaki ken babai; ken malagipna dagiti pagano; ket agpapada ti amin iti Dios, Hudio man ken Gentil“ (2 Nephi 26:33). Ikkan iti lugar ket mangibilang.
“Ditayo unay ammo ti maipanggep kadagiti agpaspastor, ammotayo laeng nga isuda dagiti “agyan iti away nga agay-aywan nga agpuyat iti rabii kadagiti animalda” (Lucas 2:8)
Kasla mayannatup a maibilang dagiti agpaspastor kadagiti immuna a kimmmablaaw iti maladaga a Mangisalakan. Intudo dagiti propeta idi un-unana ni Jesucristo a kas ti “Pastor ti Israel” (Salmo 80:1) ken ti “Pastor iti amin a daga” (1 Nephi 13:41). Ket kinuna ni Cristo Mismo, “Siak ti naimbag a pastor, ket ammok dagiti karnerok” (Juan 10:14). Iti panangam-ammo iti karnerotayo ken panagbantay ket napateg a paset ti panagaywan ken ministering kas iti aramid ti Mangisalakan.
Addaan kadagiti narayray a lawag ken napipintas nga arkos, adu pay dagiti makitkita iti panawen ti Paskua. Ngem nalabit a ti kangrunaan a kinapintas ti panawen ket masarakan no laglagipentayo nga ipamaysa ti pokustayo kadagiti pagserbiantayo ken bantayantayo dagiti bukodtayo ng arban. Ti panagbantay mabalin a panangilista iti paborito a makan wenno panagdamag maipapan kadagiti plano ti maysa a tao iti holiday. Agbantaytayo no makita ken maitedtayo ti kasapulan dagiti dadduma—agpada a madlaw ken saan unay a madlaw.
Idi kellaat a natay ti asawa ni Cheryl, ni Mick, nagladingit unay isuna. Idi umas-asideg ti umuna a Paskua nga awan ti asawana, nalaus ti lidayna. Siyayaman, ta adda idiay ti kabsatna iti ministering a ni Shauna. Inawis ni Shauna ken ti asawana, ni Jim, ni Cheryl iti adu a panagpasiar iti ruar kabayatan dagiti holiday. Nadlawda ti daanen a kagay ni Cheryl ket inkeddengda nga adda aramidenda maipapan iti daytoy. Iti sumagmamano nga aldaw sakbay ti Paskua, inyegan da Shauna ken Jim ni Cheryl iti maysa a sagut iti Paskua: maysa a baro a napintas a kagayna. Ammoda dagiti pisikal a kasapulan ni Cheryl para iti pagimeng a kagay ngem ammoda pay dagiti emosional a kasapulanna para iti pannakaliwliwa ken panangkadkadua. Naggunayda tapno ipatungpal dagita a kasapulan iti kasayaatan a kabaelanda ken nangipakitada iti napintas a pagwadan ti no kasano a mabantayantayo met dagiti arbantayo.3
“Kinuna dagiti pastor iti tunggal maysa, Intayo ngarud idiay Betlehem” (Lucas 2:15)
Ti “intayo ngarud” ket maysa a naregta nga awis! Saan nga impapan dagiti agpaspastor a mabannogto unayen dagiti gagayyemda tapno agdaliasatda. Saanda a napan a siuulimek iti Betlehem iti bukodda. Siraragsak a nagkikinnitada ket kinunada, “Intayo ngarud!”
Idinto a mabalin a ditayo kabaelan nga awisen dagiti gagayyemtayo nga umay mangkita iti maladaga a Mangisalakan, mabalintayo nga awisen ida a mangrikna iti espiritu ti Paskua (wenno ti espiritu ni Cristo) babaen ti panagserbi kadakuada. “Ti wagas a panangpatanor iti espiritu ti Paskua ket mangtulong iti nawadwad kadagiti adda iti aglawllawtayo ken itedtayo dagiti bagitayo,” kinuna ni Bonnie L. Oscarson, sigud a Young Women General President.4 Ipapanyo nga agig-iggemkayo iti maysa a kandela. Awan duadua a makita ken mairanud dagiti dadduma iti silaw ti kandelayo, ngem panunotenyo ti bara a mariknada no usarenyo ti kandelayo a mangsilaw iti kandelada ken palugodan ida a mangiggem iti silaw para iti bagbagida.
Insuro ni Cristo Mismo a dagiti sumurot Kenkuana maaddaandanto iti silaw ti biag (kitaen iti Juan 8:12). Ti panagserbi kas iti inaramidna ket maysa a wagas a pakasurotantayo Kenkuana ken mairanudtayo iti dayta naikari a lawag. Ngarud ibinglayyo ti lawag babaen ti panangawisyo iti dadduma a makipagserbi kadakayo! Kasano nga agkakaduakayo a makapagserbi kadagiti pagserbianyo? Agkakadua a maisaganayo ti paggugustoyo a taraon wenno mangsorpresa iti maysa a tao iti bassit a sagut wenno surat. Agkakadua a mariknayo ti lawag a dumteng manipud iti panangsurot iti pagwadan ni Cristo iti panagserbi.
“Impakaammoda iti ganggannaet ti pagsasao a naibaga kadakuada maipanggep iti daytoy nga ubing” (Lucas 2:17)
Nalaka a panunoten ti naragsak a panaggagar dagiti agpaspastor bayat ti panagibinglayda iti nakaskasdaaw a damag maipapan iti pannakayanak ni Cristo iti adu a tao agingga a kabaelanda. Kinantaan dagiti anghel, dimtengen ti naipadto a Mesias! Adtoyen Isuna! Kinapudnona, ti panangibinglay iti naimbag a damag maipapan iti Mangisalakan ken dakkel a tema ti estoria iti Pannakayanak. Nagkanta dagiti anghel. Intudo ti bituen ti dalan. Ken impakaammo dagiti agpaspastor iti ganggannaet.
Mabalintayo nga inayon dagiti timektayo ti estoria ti Paskua babaen ti panangibinglay iti naimbag a damag ken panangipaneknek maipapan iti Mangisalakan. “No addaankayo iti pribilehio a mangibagi ti Mangisalakan kadagiti panagkagumaanyo iti ministering, saludsodem iti bagim, ‘Kasano a maibinglayko ti silaw ti ebanghelio iti daytoy nga indibidual wenno pamilia?’” insuro ni Sister Jean B. Bingham, Relief Society General President. “Ania ti Espiritu a mangparegta kaniak nga agaramid?”5
Dagitoy ti sumagmamano a singasing nga ibilangyo bayat ti panagkalikagumyo a mangammo no kasano a maibinglayyo ti pammaneknekyo maipapan iti Mangisalakan ken ti ebangheliona:
-
Mangsarakkayo iti maysa a nasantuan a kasuratan a mangparegta iti riknayo maipapan iti Mangisalakan wenno ipeksayo no apay nga agyamankayo Kenkuana. Ibinglayyo daytoy kadagiti tao a pagserbianyo.
-
Mangipatulod iti maysa a teks wenno mensahe iti social media a karagpin ti maysa a video iti Paskua. Adda sumagmamano a napipintas iti ChurchofJesusChrist.org!
-
Ibagayo iti maysa a gayyem maipapan iti naisangsangayan a lagip wenno tradision a mangipalagip kadakayo maipapan ken ni Cristo.
Maaddaan iti pammati a ti Espiritu Santo ti mangpaneknek iti kinapudno ti pammaneknekyo, a kas iti impaneknekna kada Simeon ken Ana a ti maladaga a ni Jesus ti Mangisalakan (kitaen iti Lucas 2:26, 38).
“Tapno sipupudno a madayaw ti yaay ni [ni Jesucristo] iti lubong, nasken nga aramidentayo ti kas iti inaramidna ken tumulong iti pannakipagrikna ken panangngaasi kadagiti padatayo a tao,” kinuna ni Elder Dieter F. Uchtdorf ti Korum dagiti Sangapulo-ket-dua nga Apostol. “Daytoy ti maaramidtayo iti inaldaw, babaen ti balikas ken aramid. Pagbalinentayo koma daytoy a kannawidantayo iti Paskua, sadino man ti yantayo—nga agbalin a nasaysayaat bassit, ad-adda pay a managpakawan, saan a mangkedngan, ad-adda a managyaman, ken ad-adda a managparabur iti panangibinglay iti kinawadwadtayo kadagiti tao nga agkasapulan.”6
© 2019 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, December 2019. Ilokano. 15773 864