Ip Yohk ke Karihngihn, Tisacmpuh 2019

Mac Sramsram ke Krismas uh Luti Kuht ke Karingihn

“Pa inge sie pacl sacohk ke lusen yac se. Onkihn sie sohkahs; Krismas ac tuhkuh ke pacl na sa. Sruhmuhn mwe sramsram pwacye se ke isuslac lal Jisus, ke, el ahwowo, el tuhkuh nuh facluh” (liye “The Nativity Song,” Children’s Songbook, 52).

Pacl in Krismas pa sie pacl wolacna ke sip, mwet karihngihn sip, acn in mongo luhn kosro, ac itu uh sa na eis kalmac sasuc. Ma inge eklac mwe orekmakihnyuck yohk srihpac in sifilpac sruhmuhn sie ma sikyak na yohk srihpac emet ke sramsram mahtuh luhn mwet uh: isuslac luhn Jisus Kraist. Sucu pucspucs likiyac in liyeyuck mwe nahweyuck ke isuslac luhn Jisus in lohm selos. Kuhtuh sahyac sulaclah in riti mwe sramsram ke isuslac Lal kuh wi oruh mukwikwi in etahi. Oacna mwe sramsram nuhkwewa ke Kraist, mwe sramsram se ke isuslac Lal ah sesseslah ke mwe luti ma kuht kuh in etwaclah ke karihngihn, ke akacsruhi ke kahlwem Lal in tohlwack facluh. Prestuhn Henry B. Eyring, Mwet in Kahsruh Ahkluo ke Prestuhnsi Se Met, el fahk lah, “sramsram se ke Krismas uh pa sie sramsram ke luhngse.”

“… Ke sramsram ke isuslac luhn Kraist, kuht kuh in liye ac puhlakihn lah suc El uh ke pacl sac ac suc El uh inge. Ma se ingacn ahkmuhlahlahyelah ma toasr lasr ke fuhfahsryucsr uh. Ac fah kol kuht in muhlkihnkuhtlac sifacna ac in ahkmuhlahlahye ma toasr luhn mwet sahyac.”¹

“Wangin acn elos in muta we ke lohm in mongla lun mwet fahsr” (Luke 2:7)

Mwet in liyacacng acn in monglac luhn mwet fahsr el tiac sackuhnlac sie rum ah luhn Mwet Lahngo, tuhsruhk kuht tiac enenuh in oraclah tahfonglac se ingacn! Kuht kuh in sackuhnlah rum nuh sin mwet Lahngo ke insiyacsr ke kuht sackuhnlah run nuh sin tamuhlwel ac tahmtahel wiyacsr ke tepuh lasr uh, in lohm sesr, ac ke facsin lasr uh. Facsin pucspucs luhn sucu uh kuh in oreklac in wolac ac in mwe acsmakihnyuck yohk ke suli mwet sahyac in wi. Daiana ac sucu lal ah oruh sie facsin in suli sie mwet ah in weluhlos Krismas. Tisacmpuh nuhkwewa, elos sramsramlah ac sulaclah lah suc elos ke suli uh.² Sahp sucu lom an kuh in muhtwacwacack oruh kain in facsin sepacna inge. Sahp sie mwet ma kom karihngihn luti an ac luhngse wi sucu lom an in tuhkweni onkihn on in Krismas wolacna. Sahp kom ac kena in sackuhnlah ke mongo in ekuh ke lwen Krismas nuh sin sie mwet suc wacngihn sucu la ke acn kom oasr we an.

Yac oasr ohiyac wo in ahkfuhlwactye Mwet Lahngo liki na in fahsr tukun mwe srihkasrak Lal in suli mwet uh in wi? Esam lah El suli “elos nuhkwewa in tuhkuh nuh Yohrohl ac ipeis ke wolacna Lal; ac wacngihn kuhtwena mwet El sruhnga suc tuhkuh nuh Yohrohl, sralsral ac fasrfasr, srohoh ac sukohsohk, mukul ac muhtwacn; ac El esam mwet Pegan; ac mwet nuhkwewa in oacna sie nuh sin God, kwewana mwet Jew ac mwet Gentile” (2 Nephi 26:33). Sackuhnlah ac suli mwet uh in wi.

“Oasr kutu mwet shepherd in acn sac, suc muta inima uh ke fong sac in karingin un sheep natulos” (Luke 2:8)

Fal tuh mwet shepherd uh pa wi inmahsrlolos emet in paing ahwowo Mwet Lahngo. Mwet pahluh in pacl omet ah fahk kacl Jisus Kraist lah El “Shepherd lun Israel” (Psalm 80:1) ac “Mwet Liyacacng Sip … fin facluh nohfohn” (1 Nephi 13:41). Ac Kraist Sifacna El fahk, “Nga mwet shepherd wo. Nga etu ma nutik” (John 10:14). Etuh sip nahtuhsr ac liyacacng pa sie ip yohk ke liyacacng sip ac karihngihn oacna ke Mwet Lahngo El oruh.

Ke kahlwem sahromrom ac mwe yucn kahto, arulacna puhslac mwe inteyuck ke pacl Krismas. Tuhsruhk sahp ma se ma kahto emet ke pacl in Krismas uh kuh in sukokyak ke kuht esam in furohklah ma kuht lohacng nuh kac uh nuh selos suc kuht karihngihn luti ac liyacacng na un sip nahtuhsr. Liyacacng na kuh pac in akihlen mongo ma mwet se luhngse emet kuh siyuck sin sie mwet ah lah mewac plwacn lal ke pacl in ahkfuhlwact an. Kuht liyacacng na ke kuht liye ac oraclah enenuh luhn mwet sahyac—kwewana ke ma kahlwem ac ma tiac arulacna kahlwem.

Cheryl el kuf na pwacye ke mukul tuhmwacl ah, Mick, el misac ah. Ke Krismas se emet ma el tiac weluhl ah apkuhran me, yohkwaclihk suhpwacr ke muhkuhlacna lal. Kuloh lah mwet karihgnihn se lal, tahmtahel Shauna, el oasr. Shauna ac mukul kiyacl ah, Jim, elos solwacl Cheryl ke pacl elos som wi pacl in ahkfuhlwact puhs. Elos liye lah coat se lal Cheryl ah mahi ac elos sulaclah in oruh sie ma ah kac. Lwen kuhtuh mwet liki Krismas, Shauna ac Jim elos sang nuh sel Cheryl mwe sang ke Krismas: coat na kahto se. Elos akihlen lah Cheryl el enenuh sie coat fucsrfucsr ah tuhsruhk ac el enenuh pac in ahkkweyeyuck in wo. Elos tuyak in oraclah enenuh ingacn ke kuhiyaclos ac akiyac sie mwe srihkasrak wolacna lah kuht ac kuh pac in liyacacng fuhkah un sip nahtuhsr uh.³

“Mwet Shepherd elos fahk nu sin sie sin sie, Kut som nu Bethlehem” (Luke 2:15)

“Kut som ingena” pa sie solsol na wowo! Mwet shepherd ah tiacna motko lah sahp kawuck lalos an ac ullaclac in wi fuhfahsryucsr sacn. Elos tiacna mihslac na muhkwena som nuh Bethlehem. Elos engan aforacni nuh sin sie sin sie ac fahk, “Kuht som ingena!”

Sahp kuht tiac kuh in suli kawuck lasr in tuhkuh liye Mwet Lahngo ahwowo, kuht kuh in solwaclos in puhlakihn nguhnnguhn in Krismas (kuh nguhn luhn Kraist) ke elos wi kuht kuhlwacnsap. Bonnie L. Oscarson, Prestuhn Luhlahp se luhn Muhtwacn Fuhsr el tuh fahk lah, “inkacnek in ahkyohkye nguhnnguhn in Krismas an pa in saplakyang yohk nuh selos suc raunikuhtlac ac sang kuhiyacsr.⁴ Luhmluhma lah kom sruok kacntuhl soko. Mwet sahyac kuh in liye ac eis ma wo ke kahlwem ma tuhkuh ke kacntuhl se lom an, tuhsruhk luhmluhma fucsrfucsr se ma elos kuh in puhlakihn kom fin orekmakihn kacntuhl se lom an in sang ahkoswack kacntuhl lalos an ac lwelah elos in sruok ahk kahlwem an nuh selos sifacna.

Kraist Sifacna El luti lah elos suc fahsr Tohkohl ac fah eis kahlwem luhn moul (liye John 8:12). Kuhlwacnsap oacna ke El tuh oruh ah pa sie inkacnek ma kuht kuh in fahsr Tohkohl ac engankihn kahlwem uliyuck sac. Ohinge akacsruhi ke kahlwem an ke kowos suli mwet sahyac in wi kom kuhlwacnsap! Kom ac elos suc kom karihngihn luti an ac tuhkweni kuhlwacnsap fuhkah? Kowos kuh in tuhkweni ahkolah mongo kowos luhngse emet kuh ahklutye sie mwet ah ke mwe sang srihsrihk kuh sie sihm an. Kowos kuh in tuhkweni puhlakihn kahlwem se ma tuhkuh ke ukweyacn mwe srikasrak luhn Kraist ke kuhlwacnsap.

“Elos srumun kas ma [lipufan sac] fahk nu selos ke tulik sac” (Luke 2:17)

Fihsrwacsr in luhmluhma engan yohk luhn mwet liyacacng sip ke elos akacsruhi ke pweng wowo ke isuslac luhn Kraist nuh sin mwet nuhkwewa ma elos kuh in fahk nuh se. Ahkkahlwemyeyuck sin lipufacn, Messiah suc tuh palyeiyuck ah El tuhkuh! El tuh oasr inge! Pwacye na, akacsruhi ke pweng wowo kacn Mwet Lahngo pa sie sifac na yohk ke mwe nahweyuck ke isuslac luhn Kraist ke Krismas. Lipufacn ah on. Itu sac srihsrngiyac inkacnek uh. Ac mwet liyacacng sip elos sulkackuhnelihk.

Kuht kuh in sang puhsrwacsr in weacng sramsram ke Krismas ke kuht akacsruhi ke pweng wowo ac fahkwack ke Mwet Lahngo. “Ke kom eis pacl wo in ahol Mwet Lahngo ke karihngihnyuck wo lom an, siyuck sum sifacna, ‘Nga kuh in akacsruhi kac fuhkah ke kahlwem luhn wosasuc nuh sin mwet se inge kuh sucu se inge?’” tahmtahel Jean B. Bingham, Prestuhn Luhlahp luhn Rilif Sosaiti el luti. “Meac Nguhn uh moklweyuc in oruh?”⁵

Pa inge kuhtuh mwe kahsruh nuh sum kom in nuhnkuh ke kom suk in etuh lah kom ac akacsruhi fuhkah in fahkwack luhlahlfongi kuh lom ke Mwet Lahngo ac ke wosasuc Lal:

Sokwack sie ma sihmlac ma sruokyac ma kom puhlakihn ke Mwet Lahngo kuh ahkkahlwemye lah efuh kom tarilacna Sel. Akacsruhi kac nuh selos suc kom karihngihn nuh se.
Suhpwaclah sie text an kuh sihmlac ke mwe aetuhi ke internet ke video ke Krismas. Oasr ma na wo ke ChurchofJesusChrist.org!
Sruhmuhn nuh sin sie kawuck an ke sie mwe acsmakihn sacohk kuh facsin ma ahkacsmakihnye kom ke Kraist.

Luhlahlfongi na lah Nguhn Muhtahl ac fah ahkpwacyeye ma pwacye ke luhlahlfongi yohk lom an, oacna ke El tuh ahkpwacyeye nuh sel Simeon ac Anna lah ahwowo Jisus pa Mwet Lahngo (liye Luke 2:26, 38).

Elder Dieter F. Uchtdorf ke U luhn Mwet Sap Singucul Luo el fahk lah, “in ahkfuhlwactye na pwacye tuhkuh [luhn Jisus Kraist] nuh facluh, kuht enenuh in oruh oacna ke El tuh oruh ac ahsroelah pahosr ke kuhlwacng ac pahkotwen nuh sin mwet tuhlan lasr.” “Kuht kuh in oruh ma se inge ke lwen nuhkwewa, ke kahs ac ohiyac. Lwelah tuh ma se inge in eklac facsin in Krismas se lasr, ke oacna sie acn kuht oasr we—in kuhlwacng liki met ah, in sang yohk liki met ah, in ahksrihkyelah nuhnuhnkuh, in sang kuloh yohk liki met ah, ac in akacsruhi yohk liki met ah ke ma kahsruhp lasr nuh selos suc enenuh.”⁶

© 2019 by Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/18. Ahkkweyeyucklac ke lweng: 6/18. Lweng ke Ministering Principles, December 2019. Kosraean. 15773 868