Nshindamenu ya Buambi, Ngondo wa Dikumi ne Ibidi 2019

Ntshinyi Tshidi Muyuki wa Tshikondo tshia Diledibua dia Kilisto Utulongesha pa Buambi

“Etshi tshidi tshikondo tshinangibua tshia tshidimu. Imbayi musambu; Tshikondo tshia Diledibua dia Kilisto tshikadi pa kulua. Londa muyuki mulelela wa diledibua dia Yesu pakaluaye pa buloba mu buana buende” (“The Nativity Song,” Children’s Songbook, 52).

Diumvuija ku Monayi Muana wa mukoko wa Nzambi, kudi Walter Rane

Tshikondo tshia diledibua dia Kilisto tshidi tshikondo tshimpa tshidi mikoko, balami, balombodi ne mitoto bionso biangata diumvuija dikuabu musangu umua. Bidi bikala biambilu bia mushinga mu kuamba kua bualu bua mushinga mu muyuki wa panu: diledibua dia Yesu Kilisto. Mêku abungi adi enza tshidilu tshia nyama mu nzubu yabu. Bakuabu badi bafila mushinga ku dibala muyuki wa diledibua dienda anyi benza dinaya. Bumudi miyuki yonso ya Kilisto, muyuki wa diledibua Dienda udi muujibua ne malongesha atudi mua kulonga pa buambi, mu kufila bukenka bua kukenkesha buloba. Muimanyinyi Henry B. Eyring, Mubedi Muibidi mu Buimanyinyi bua Kumpala wakamba ne: “Muyuki wa Diledibua dia Kilisto udi muyuki wa dinanga,”

“… Mu miyuki ya diledibua dia Kilisto, tudi mua kumona ne kumvua tshivuaye ne Mudiye muikala. Atshi tshidi tshipepeja bujitu buetu munkatshi mua njila. Ne netshitulombola bua tudipua muoyo ne tupepeja bujitu bua bakuabu.”¹

“Kabavua ne muaba mu nzubu wa tshilala benyi to” (Luka 2:7)

Mulami wa ku nzubu wa tshilala benyi kavua mupesha Musungidi muaba to, kadi tuetu katuena ne bua kuenza tshilema etshi to! Tudi mua kuenzela Musungidi muaba mu mioyo yetu mu kupesha bana betu baluma ne bakaji muaba ku mesa etu, mu nzubu yetu, ne mu ngikadilu ya nsombelu yetu. Ngikadilu ya nsombelu ya mêku abungi idi mua kuikala mishema ne ya mvulukilu patudi tubueja bamua bantu momu. Daiana ne dîku dienda badi ne ngikadilu wa nsombelu wa kubikila muntu bua kusomba nabu mu tshikondo tshia Diledibua dia Kilisto. Mu Ngondo wa Dikumi ne Ibidi yonso, badi bayukila ne bapangadika udibu basua kubikila.² Pamuapa dîku dieba didi mua kutuadija ngikadilu wa nsombelu ewu. Imua misangu muntu uudi ukumbula udi mua kusua kudisangisha ne dîku dieba pamua bua kuimba misambu minangibua ya Diledibua dia Kilisto. Udi kabidi mua kulongolola muaba ku mesa a tshia didia tshia dilolu tshia Diledibua dia Kilisto bua muntu udi kayi ne dîku pabuipi.

Etshi mmushindu muimpa kayi wa kusankidila Musungidi mu kulonda tshilejilu Tshienda tshia dibikila? Uvuluka se mmubikila “bonso bua balua kudiye ne babanyangana buimpa; ne kena ubengela nansha umua udi ulua kudiye to, mufika ne mutoka, musuikibua ne mudishikaminyi, muluma ne mukaji; ne udi uvuluka bantu babi: ne bonso badi bafuana Nzambi, bena Yuda ne Bantu ba Bisamba Biabenda” (2 Nefi 26:33). Fila muaba ne enza mabikila.

“Ne kuvua kabidi balami ba mikoko mu tshitupa atshi bavua basomba pambelu, balama mikoko yabu butuku” (Luka 2:8)

Mbimueka bikumbana se balami ba mikoko badi ne bua kuikala bakumpala bua kusawila Musungidi muana. Baprofeta ba kala bakafuanyikija Yesu Kilisto bu “Mulami wa Mikoku wa Isalela” (Misambu 80:1) ne “Mulami wa buloba bujima” (1 Nefi 13:41). Ne Kilisto nkayenda wakamba ne, “Mema ndi mulami muimpe wa mikoko, ndi mumanye mikoko yanyi” (Yona 10:14). Kumanya kua mikoko yetu ne kuyitangila tshidi tshitupa tshia mushinga tshia bulami ne buambi bu muvua ngikadilu wa Musungidi.

Ne butoka bukenka ne bilengejelu, kudi biabungi bia kutangila mu tshikondo tshia Diledibua dia Kilisto. Pamuapa buimpa bunena bua tshikondo budi mua kupetshibua patudi tuvuluka bua kukunguija meji etu pa batudi tukumbula ne patudi tubeja mikoko yetu. Kuikala ne bukubi kudi mua kujandula malu masuibua a muntu anyi kukonka muntu pa matuku enda a dikisha. Tudi tukuba diba ditudi tumona ne tufila diambuluisha ku majinga a bantu—onsu, manena ne makesa.

Pakajimija Cheryl muluma wenda, Mick, uvua ne kanyinganyinga. Bumuvua tshikondo tshia Diledibua dia Kilisto tshisemena kayi nenda pabuipi to, buikadianganyi bua nkaya buakamupita. Biakadi bimpa, pavua mamu Shauna muambi wenda muikalaku. Shauna ne muena kuenda, Jim, bakabikila Cheryl bua kukendakana mu dikisha. Bakamona tshizaku tshia Cheryl tshivua tshikala tshisunsuka ne bakamuambuluisha. Mu matuku makesa kumpala kua tshikondo tshia Diledibua dia Kilisto, Shauna ne Jim bakatuadila Cheryl tshia lubandi tshia Diledibua dia Kilisto: tshizaku tshimpa. Bavua bamanya majinga a mubidi a Cheryl bua tshizaku tshia luya kadi kabidi bua majinga enda a tshintekanteka bua kumusamba ne kuenda nenda. Bobu bakenza muabu monsu bua kuandamuna ku majinga aa ne bakafila tshilejilu tshimpa tshia mushindu utudi mua kukuba mikoko yetu.³

“balami ba mikoko bakatuadija kuambilangana ne: “Tuyayi anu mpindieu ku Beteleheme” (Luka 2:15)

“Tuyayi anu mpindieu” tshidi dibikila dia bujitu! Balami kabavua bela meji se balunda babu bavua bua kuikala batshioka bua kuenza luendu elu to. Kabavua baya badilekelela mu bobu nkayabu ku Beteleheme to. Bakatangilangana ne disanka ne kuamba ne, “Tuyayi anu mpindieu!”

Nansha mutudi katuyi mua kubikila bakuabu bua kumona muana Musungidi, tudi mua kubabikila bua bumvua disanka dia Diledibua dia Kilisto ( anyi nyuma wa Kilisto) mu kusadila netu. “Mushindu wa kudiundisha nyuma wa Diledibua dia Kilisto udi anu wa kutantshila ne muoyo yonsu aba badi batunyunguluka ne kufila bitudi nabi,” muakamba Bonnie L. Oscarson, Muimanyinyi wa kala wa Bansonga Bakaji.⁴ Difuanyikija bu udi muambula muinda. Bakuabu badi mua kumona ne kupeta butoka bua muinda weba, kadi ela meji buimpa budibu mua kumvua pa udi utemesha muinda weba bua kutemesha wabu muinda ne ubambuluisha bua badikuatshila butoka.

Kilisto nkayenda wakalongesha se aba badi bamulonda nebapeta butoka (tangila Yona 8:12). Kusadila bu muakenzaye tshidi mushindu umua utudi mua kumulonda ne kupeta butoka bulaya ebu. Nunku fila butoka mu kubikila bakuabu bua kusadila neba! Mushindu kayi uudi wewa ne baudi uyila mu buambi mua kusadila pamua? Pamua nudi mua kulamba tshiadidia tshimpa anyi kupapuisha muntu ne dipa dikesa anyi mufundu. Pamua nudi mua kumona butoka budi bufuma ku dilonda dia tshilejilu tshia Kilisto tshia kusadila.

“Bakalonda bualu buvuabu babambila bua bualu bua muana mutekete eu” (Luka 2:17)

Bidi bipepela bua kumvua bunena bua disanka divua nadi balami ba mikoko pavuabu balonda lumu elu lua diledibua dia Kilisto ne bantu babungi. Mua kamanyisha banjelu, Masiya musokolola wakalua! Uvua panu! Mu nanku, kulonda ngumu mipa ya Musungidi tshidi tshiena-bualu tshia mushinga tshia muyuki wa Diledibua. Banjelu bakimba. Mutoto wakaleja njila. Ne balami ba mikoko bakamanyisha kudi bonso.

Tudi mua kukumbaja mêyi etu ku muyuki wa Diledibua dia Kilisto mu kulonda ngumu mimpa ne kufila bujadiki bua Musungidi. “Paudi ne dianyisha dia kuimanyina Musungidi mu kudienzeja kueba mu buambi, udikonka se, ‘Mushindu kayi undi mua kufila butoka bua lumu luimpa ne muntu ewu anyi dîku edi’” mua kalongesha Mamu Jean B. Bingham, Muimanyinyi Munena wa Kasumbu Kambuluishi. “Ntshinyi tshidi Nyuma ungambila bua kuenza?”⁵

Eyi idi ngenyi mikesa iwudi mua kuangata paudi ukeba bua kumanya mushindu uudi mua kulonda bujadiki bueba pa Musungidi ne lumu luimpa Luenda:

Peta mufundu udi ubuela mu meji eba pa Musungidi anyi uleja buatshinyi udi ne dianyisha kudi Ye. Uwambila aba baudi usadila.
Funda mu kamua anyi tuma mifundu mu bisanji bia buntatanda ne videyo wa Diledibua dia Kilisto. Kudi imua mimpa ku ChurchofJesusChrist.org!
Ambila mulunda bua tshivulukilu tshia pa buatshi anyi ngikadilu bidi bikuvuluija Kilisto.

Ikala ne ditabuja bua se Nyuma Muimpa neajadika bulelela bua bujadiki bueba, muvuaye mutuala bujadiki kudi Simeona ne Ana bua se muana mukesa Yesu uvua Musungidi (tangila Luka 2:26, 38).

Bua kunemeka dilua dia [Yesu Kilisto] pa buloba, tudi ne bua kuenza bivuaye muenza ne kufila luse ne dinanga kudi bana betu,” mua kamba Mukulu Dieter F. Uchtdorf wa mu Tshisumbu tshia Bapostolu Dikumi ne Ibidi. “Tudi mua kuenza nunku matuku onsu, mu kuakula ne mu bienzedi. Etshi tshilua ngikadilu wetu wa nsombelu mu tshikondo tshia Diledibua dia kilisto, muaba yonsu utudi—tuikala bantu bimpa, badi bafuilangana lusa, katuyi tulumbuluishangana, bikala ne dianyisha, ne bikala ne muoyo wa difila bubanji buetu kudi badi mu majinga.”⁶

© 2019 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/18. Dianyisha dia dikudimuna: 6/18. Dikudimuna dia Ministering Principles, December 2019. Tshiluba. 15773 760