Padahk kan en Papah, Tihsempe 2019

DahmeSoai en wKrismasoPadahkihong Kitail duwenDoadoahk en Papah

“Met wia ansou kaperen en nan pahro. Koulki oapwoat koul; ansoun Krismas pahn leledohr. Kosoia duwen ipwidi en Sises, ni eh wia kisin seri, ketdo sampa” (Koul en Ipwidi” Children’s Songbook52).

Krismas wia ansou mwahu ehu me sihpw, silepen sihpw, dewen kamwenge mahn oh usuh kan wia mehkoat kesempwal kei. Re wia mehkoat kesempwal kei nan soai pwoat me soia mwekid me keieu kesempwal nan poadopod en sampa: iei ipwidi en Sises Krais Peneinei tohto kin kihda kapwat en ipwidio nan imwarail kan. Mehteikan kin kosonehdi irail en wadek soai en Sapwellime ipwidio de iang ehu sipai en ipwidio, Duwehte soai en Krais kan koaros, soai en Sapwellime ipwidio kin audaudki padahk tohto me kitail kak esehla duwen papah, duwen ehukihda Sapwelllime marain pwehn kamarainda sampa. Presiden Henry-B, Eyring, Sounsawas Keriau nan Presidensi Keieu, kosoia, ”Soai en Krismaso wia soai en limpoak pwoat.”

“… Nan soai kan en ipwidi en Krais, kitail kak kilang oh kehn ihs Ih ansouo oh pil met. E kin kamarahda atail wisik kan. Oh e pil pahn kahrehda atail sohla katapankinkitail oh iang wahda en mehteikan arail wisik.” ¹

”Sohte ara pere nan imwen keiru o”Luhk 2:7

Tohn doadoahk nan imwen keiruo sohte kaunopada sapwellimen Sounkomouro pere, ahpw kitail sohte konehng wiahda sapwungo. Kitail kak kapidelong Sounkomouro nan atail mohngiong kan ni atail kin kapidolong riatail ohl oh lih akan nan imwatail kan, ni atail tehpel kan oh nan atail tiahk kan, Tohto kapokon en peneinei kan kak wia mehkot kaperen de pil kaselel ma aramas teikan kin iang. Daiana oh eh peneinei kosonehdi irail en kin lukehdo ekei aramas en iang arail kapokon en Krismas. Tihsempe koaros, irail kin soaia oh kosonehdi ihs me irail pahn lukehdo.² Ele amwail peneinei kan pil kak tepda wia soangen kosondi wet. Mwein mie me kumwail kin papah pahn men iang amwail peneinei koulki koul en Krismas kaselel kan. Kumwail pil kak lukehdo emen me sohte ah peneinei nan amwail wasa en iang kumwail mwenge ni pwong en Krismas.

Mie wiepe me mwahusang atail pahn kin idawehn Sapwellime karasaras en kapatapat ni atail kin kauwawih ipwidi en Sounkomouro? Tamataman me E ketin luke ”koaros en kohdo reh oh alehda sapwellime kupwur mwahu; oh e sohte kin ketin soikala mehmen me kohdo reh, me toantoal oh pwetepwet, me sensel oh saledek, ohl oh lih; oh e kin ketin tamataman aramas rotorot akan; oh koaros duwepene rehn Koht, mehn Suhs oh Mehn Liki kan koaros” (2-Nihpai 26:33) Kaunopada wasa oh uhki kapatapat.

”Silepen sihpw kei wie sinsile nair pelin sihpw kan nipwongo nan sahpwo.” (Luhk 2:8)

E mwoamwen pwung pwe silepen sihpw kan en iang tepin kasamwo Sounkomour pwelelo. Soukohp en kawahko kin ekerki Sises Krais ”Silepen Israel” (Melkahka Kan 80:1) oh ”Silepen sampah unsek” (1-Nihpai 13:41). Oh pein Krais mahsani, ”Ngehi me silepen sihpw mwahu oh I ese nei sihpw kan.” (Sohn 10:14) Ese oh sinsile neitail sihpw kan wia pwukoa kesempwal nan doadoahk en silepen sihpw oh papah me Sounkomouro kin wia.

Kitail kin kilang soahng tohto ni ansoun Krismas iangahki dengki piripir kan oh kapwat lingan kan. Ahpw ele me keieu lingan nan ansouo kak dierek ni atail kin tamanda irail kan me kitail kin papah oh kin sinsile pein neitail aramas kan. Sinsile iei en kin pohnese dahme mehteiko kin pwungki de kin men ese en mehteikan arail kosondi ong ansou kapereno, Kitail kin sinsile ni atail kin pohnese oh apwali en mehteikan arail anahn--koaros me sansal oh sohte sansal.

Ni ansou me en Cheryl pwoudo, Mick, mehla liho inenen weikekla. Ni tepin Krismas me ohlo sohte pahn mi reh kerendo, en liho laloid wie lalaudla. Paiamwahu pwe Shauna, me kin papah liho kin mihmi mwo. Shauna oh eh pwoudo, Jim, kin luke Cheryl en iang ira mwemweit pak tohto. Ira tehkada en Cheryl ah sekid meringo oh medewehda ira en wia mehkoat. Rahn kei mwohn Krismas, Shauna oh Jim alehda en Cheryl kisakis en Krismas: sekid kaselel kapw ehu. Ira wehwehki en Cheryl ah anahn ong ehu sekid oh pil en liho anahn en nsenamwahu oh mie ienge. Ira koadoahki pwehn apwaliala anahn pwuko ni uwen ara kak oh kihda mehn kahlmengi ehu me kitail pil kak alasang pwehn sinsile atail tungoal kan. ³

”Silepe ko ndapene nanpwungarail, Na kitail kohla mahs Pedleem” (Luhk 2:15)

”Kitail kohla’ wia luhk en ngoang ehu! Silepe ko sohte medemedewe me kempoakparail kan pahn pwang en iang seiloak wet. Iraill sohte wie wawai kohla Pedleem. Irail peren oh sohpaipene nan pwungarail oh nda, ”Nna kitail kohla!”

Ni atail sohte pahn kak luke kempoakpatail kan en kohdo kilang Sounkomour pwelelo, kitail kak luke irail en kehn peren en Krismas (de ngen en Krais) ni arail pahn iang kitail papah. Bonnie-L. Oscarson, Presiden Lap en Peinakapw akan en mahs kosoia, ”Kitail kak kalaudehla peren en Krismas ni atail kin pohnese oh kadek lamalam ong mehn mpatail kan.”⁴ Medewe me komw kolokol ehu kandel. Mehteikan kak mehlel kilang oh paieki marain sang noumw kandelo, ahpw medewe uwen kansenamwahu ma komw doadoahngki noumw kandelo oh isikada neirail kandel oh mweidehng irail en pein kamarainih irail.

Pein Krais padahngki me mehmen me pahn idawehniehdo pahn ahneki marain en mour. (Sohn 8:12). Papah nin duwen Eh wiahier wia ehu elen atail kak idawehn Ih oh paieki marain me inoupe wiawihero. Eri ehukihda maraino ni amwail kin luke mehteikan en iang kumwail papah! Ia mwoamwen kumwail oh irail me kumwail kin papah kan eh kak doadoahk pene? Kumwail kak patpene kukiada kisin mwenge me kumwail kin pwungki de kapwuriamwei ihki emen tohrohr ehu kisin kisakis en. Kumwail koaros kak pehm kamarain me kin miehda sang ni ideidawehn papah me Krais ketin wiahier.

”Re ahpw padahkihong Sosep oh Mery dahme tohnlengo mahsanihong irail duwen serio” (Luk 2:17)

Me mengei en medewe uwen popohl me silepe ko ahneki ni arail kalkalohkiseli rohng kapwuriamwei me pid ipwidi en Krais ong aramas koaros ni uwen arail kak. Tohnlengko iang kalohki me Mesaia me kokohpdahro ketdohr! E ketier sampa! Ni mehlel, kalohki rongamwahu en Sounkomouro wia ire kesempwal ehu nan soai en Ipwidio. Tohnleng ko kokoul. Usuo kahluwahlang wasao. Oh silepe ko lohkiseli wasa koaros.

Kitail kak kapatahiong ngilatail kan ong ni soai en Krismaso ni atail kin ehukihda rongamwahuo oh kadehde Sounkomouro. Sister Jean-B. Bingham, Presiden Lap en Pwihn en Sawas en Lih padahngki me ”Ni atail ahneki ansou mwahu en welwelian Sounkomuro nan atail doadoahk en papah, kitail anahne idek, ’Ia mwoamwen atail kak ehukihda marain en rongamwahuo ong aramas menet de peneinei wet?” ”Dahme Ngehno poahngoakihiong ie ien wia?”⁵

Iet irehkan me kumwail kak doadoahngki ni amwail kin kadempak mwoamwen amwail pahn kadehde Sounkomoro oh Sapwellime rongamwahuo.

Rapahkihda irehn pwuhk sarawi ehu me kin sair amwail mohngiong kan duwen Sounkomouro de kasalehda kahrepen amwail kaping kalahngan ong Ih. Ehukihong irail me kumwail kin papah.
Kihda pohn mehn kapehsehn nan wehwe kan ehu kilel oh ire me pid Krismas. Mie ire kaselel kei pohn ChurchofJesesKrais.org!
Ndahiong emen kempoakepamwail ire kesempwal kan me kin katamanehng kumwail duwen Krais.

Pwoson me Ngehn Sarawi pahn kadehde duwen mehlel en amwail kadehde, duwehte Ah ketin kadehde ong Simeon oh Anna me seri Sises iei Sounkomouro (tehkLuk 2:26, 38).

Elder Dieter-F. Uchtdorf en Pwihn en Wahnparon Ehkriemeno koasoia, ”Pwehn wauneki ni mehlel ketdohn [Sises Krais] pohn sampa, kitail anahne wia dahme E ketin wiahier oh pohnese ni limpoak oh kalahngan riatail aramas akan.” ”Met kitail kak wia rahn koaros, ni lokaia oh wiewia. Met anahne wiahla ahnapatail ni ansoun Krismas, sohte lipilipil wasa kitail mihie--en kadek sang mahs, kin mahkohng, sohte kin kadeik, kin ahneki kalahngan, oh sapanki atail dipwisou kan ong me anahne kan.⁶

© 2019 by Intellectual Reserve, Inc. All rights reserved. Ntingda nan USA. Kamanaman ong ni lokaiahn wai: 6/18. Mweimwei en kawehwehdi: 6/18. Kawehwehpen Ministering Principles, December 2019. Pohnpeian. 15773 885