Mga Young Adult
Ang Asa Ako Padulong, Dili Diin Ako Gikan
Ang tagsulat nagpuyo sa Utah, USA.
Ako mihimo og pagpili nga supak sa mga sugo sa makadaghang higayon, apan ngadto niining tanan, nakakat-on ako nga ang gahum sa Manluluwas ug sa Iyang Pag-ula tinuod.
Ang akong kinabuhi wala mahitabo sa paagi nga akong gihunahuna.
Sa pagka-18, nagdahum ako nga moserbisyo og full-time nga misyon, magminyo tingali human niana, ug magsugod og pamilya sa pagka-25. Karon, ako 32 anyos na. Wala ako makaserbisyo og misyon, ug ako dili aktibo sa Simbahan kadaghanan sa akong hamtong nga kinabuhi. Ako nagminyo—nagdiborsyo—ug nagminyo pag-usab.
Tungod kay ako mihimo og pagpili nga supak sa mga sugo sa makadaghan nga higayon, wala ako kanunay mobati nga angay diha sa simbahan. Hinoon, miabut ako sa pagkaamgo nga adunay dapit alang kanako. Ang akong kasinatian mitudlo kanako nga ang gahum sa Manluluwas ug sa Iyang Pag-ula tinuod ug nga unsa ang labing importante dili ang diin ako gikan, apan asa ako padulong karon.
Ako naghunahuna nga sa sinugdanan ako nagduhaduha sa unsay akong gituohan tungod kay dili ako sigurado nga ang akong pagpamatuod igo sa ka lig-on aron makaadto og misyon. Nakahinumdom ako sa higayon nga ako migradwar sa high school naghunahuna og usa ka butang sama sa, Unsa kaha kon ang akong pagpamatuod dili sa hingpit ako? Unsa kaha kon ako na nagsalig pag-ayo sa mga pagpamatuod sa ubang mga tawo?
Kana misamok kanako. Gusto ako nga magmisyon, apan naghunahuna ako kon ang espiritwal nga mga kasinatian nga ako aduna kutob nianang panahona igo ba sa paghimo kanako sa unsay akong gihunahuna nga usa ka malampusong misyonaryo nga umaabut—usa ka tawo kinsa adunay igong espiritwal nga kalig-on ug nakahibalo og igo mahitungod sa ebanghelyo aron sa pagtudlo sa ubang mga tawo.
Sa paghunahuna niini karon, ako unta naghangyo sa Dios nga tabangan ako sa pagsabut sa tambag nga gihatag diha sa Doktrina ug mga Pakigsaad 124:97: “Himoa nga siya magpaubos diha sa akong atubangan, … ug siya makadawat sa akong Espiritu, gani ang Maghuhupay, nga mopadayag ngadto kaniya sa kamatuoran sa tanan nga mga butang, ug mohatag kaniya, sa takna gayud, unsay iyang isulti.”
Apan imbis nga mangutana sa Dios, ako nasaag sa pagtandi sa akong espirituhanon nga kahibalo ngadto sa uban, ug nahadlok ako nga ang akong mga kakulangan mopugong sa mga tawo sa pagdawat sa ebanghelyo.
Nagkinaugalingon isip usa ka young adult, mipadayon ako sa paghunahuna kon unsay akong gituohan. Wala ako makasabut sa ngil-ad nga sangputanan sa unsay akong nakita sa tinagsa-tagsa nga mga desisyon nga wala mousab sa paghulagway kinsa ako isip usa ka tawo. Misugod ako sa dili na kaayo pagpakigsulti niadtong akong gihigugma tungod kay nahibalo ako nga sila masagmuyo sa mga pagpili nga akong gihimo. Hinoon, gipalibutan ko ang akong kaugalingon og mga tawo kinsa wala gyud magpakabana kon unsay akong gibuhat. Usa ka adlaw misulay ako og ilimnong makahubog gumikan sa pagkakuryoso. Ang pag-inom nahimong kabahin sa akong kinabuhi ug sa katapusan gikan sa lingaw-lingaw lamang ngadto sa usa ka butang nga akong gigamit isip suporta aron sa pagsugakod sa malisud nga mga kasinatian. Ang negatibo nga mga kausaban sa akong kinabuhi nianang panahona dili tungod sa bisan hain nga pagpili; kini inanay. Mikabat og duha ka tuig nga ako nakaamgo nga ang ginagmay nga mga pagpili nga akong gihimo sa hinay-hinay migiya kanako ngadto sa sitwasyon nga ako dili buot nga maanaa.
Karon, wala ako mag-ingon nga aron makakat-on sa kamatuoran sa ebanghelyo, kamo kinahanglang makasinati sa katugbang. Ang akong mga lihok nakahimo og kasakit dili lamang alang kanako apan usab alang sa mga tawo nga akong gihigugma—kadaghanan niini wala kinahanglana. Mapasalamaton ako nga nakahimo ako sa pagpaubos sa akong kaugalingon igo nga makaamgo nga (1) ako makalolooy, ug (2) ako labing malipayon unta kon ako nagsunod pa sa mga sugo sa Dios. Kadto usa ka butang nga ako nasayud sa akong kaugalingon, usa ka butang nga sa walay pagduhaduha akong nahibaloan ug ipakigbahin sa uban.
Miadto ako sa akong bishop aron sa paghimo sa mga butang nga matarung, ug kanunay kami nga nagkita aron sa pag-andam kanako sa pagserbisyo og misyon. Ang akong mga papeles hapit na mahuman sa dihang giaghat ako sa pagsiguro nga siya nakasabut sa pipila ka mga pagpili nga akong gihimo. Kana nga pakig-istorya dili sayon, apan labaw pa gani kay sa akong gusto nga moadto sa misyon, gusto ko nga mahimong matarung sa atubangan sa Dios. Andam ako nga moangkon sa unsay akong gibuhat nga sayop ug isulti kining tanan sa Iyang atubangan aron malimpyo ako.
Wala madugay, miabut ako atubangan sa konseho sa pagdisiplina. Kini makalisang sa pipila ka mga paagi sa pag-angkon sa unsay akong nahimo diha sa atubangan sa mga tawo kinsa akong mga lider ug mga magtutudlo sulod sa katuigan, apan samtang akong gitan-aw ang palibut sa kwarto, gibati ko ang kalinaw. Akong nakita nga sila anaa aron sa pagsabut ug pagtabang kanako. Sa akong pagbiya, akong gibati ang Espiritu nga nanghimatuod ngari kanako nga bisan unsa nga desisyon ang himoon, akong gibuhat ang akong bahin ug ako ma-OK ra. Ang Dios ug ang mga lider kinsa nahigugma kanako makigtrabaho uban kanako aron ako mabutang diin ako kinahanglan nga maanaa. Milakaw ako nga gibati ang gugma sa Manluluwas ug nasayud nga ako anaa pa sa Iyang pagtubos.
Usa Ka Dapit alang sa Dili Hingpit
Bisan pa sa kalinaw nga akong gibati, lisud kaayo nga moatubang sa mga pangutana gikan sa mga tawo mahitungod kon nganong wala ako magmisyon. Samtang nagpadayon ako sa paghimo sa proseso sa paghinulsol uban sa tabang sa akong bishop, nahimong nagkagamay kaayo ang kalagmitan nga ang pagmisyon anaa sa akong kaugmaon. Kinahanglan nakong mahibaloan kon unsaon pagpadayon sa akong kinabuhi. Sa 21, tungod kay ako wala masakop diha sa dili pa magmisyon, nahuman na nga misyonaryo, o minyo nga mga grupo sa mga young adult, lisud kaayong bation nga ako wala masakop bisan asa.
Ang pakig-date lisud. Usahay ang mga babaye lahi ang pagtagad kanako human ako mosulti kanila nga wala ako makaserbisyo og misyon ug nga ako dili aktibo sulod sa usa ka panahon. Sa usa ka rason o sa lain, ang kasagarang pakig-istoryahanay wala gayud mausbi human sa unang date.
Nalipay ako nga sa katapusan naminyo ako sa templo, apan usahay gibati gihapon nako ingon og wala ako mohaum. Ako adunay pagpamatuod, apan dili ako makahunahuna kon unsaon sa pagpakigbahin niini, ug ang mga klasehanan sa simbahan mura og mga eksamen diin ang akong mga kauban nagtan-aw kanako nga nahagbong. Naghunahuna ako niana tungod kay kadaghanan kanila anaa sa kinabuhi nga akong gusto, wala sila napandol sama kanako.
Usa ka adlaw ang bishop mitawag kanako ug mihatag sa call sa pagtudlo sa elders korum. Natingala ako, tungod kay ako kaduha ra makatambong og elders korum sa miaging tuig. Bisan og mibati og hilabihan nga kakulba, akong gidawat ang calling. Sa akong unang Dominggo nga pagtudlo, akong nabantayan ang akong kaugalingon nga nagsugod tingali sa labing katingalahang pasiuna nga nadungog nila sukad:
“Hi, mga brother, ako si Richard Monson. Wala gyud ako makaserbisyo og misyon ug ako nahimong dili aktibo kadaghanan sa akong hamtong nga kinabuhi. Wala gyud kaayo ako makatambong og elders quorum sukad tungod kay ako wala mobati nga ako nahisakop o mihaum. Ako dili makatubag sa inyong tanan nga mga pangutana, apan nanghinaut ako nga moapil kamo aron kita makakat-on og dungan. Kon kamo OK sa akong sitwasyon, nan magsugod na ta.”
Nakaamgo ako nianang adlawa nga makahimo ako sa pag-angkon ngadto sa uban—ug ngari sa akong kaugalingon—nga bisan og wala nako hunahunaa ang akong kaugalingon nga usa ka “tul-id nga pana” (usa ka tawo kinsa nakaserbisyo og misyon, aktibo sa tibuok nilang mga kinabuhi, ug wala makahimo og seryosong mga sayop), ako gipunting sa sama nga direksyon sama kanila, ug kana mao ang importante. Sa akong katingala, akong nakita nga sobra sa usa niini nga mga lalaki kinsa akong gihunahuna nga nagpuyo og hingpit nga kinabuhi nakahimo usab og mga sayop. Naghunahuna ako nga kini milig-on sa ideya ngari kanamong tanan nga ang pagkahingpit dili panginahanglan aron sa paghatag og bili sa klase o sa Simbahan isip kinatibuk-an.
Panahon sa Kalisud ug usa ka Desisyon
Sa kasubo, ang akong pagkaaktibo sa Simbahan wala magdugay. Ang akong kaminyoon malisud, ug mibalik ako ngadto sa karaang mga bisyo aron sa paglingkawas sa akong kasakit. Ang paglingaw-lingaw misugod pagpuli sa pagtambong sa simbahan.
Tulo ka tuig ang milabay, ug gibati nako ang labing kangil-ad sukad masukad. Kinahanglan nga mohimo ako og pagpili. Makapuyo ba ako sa ebanghelyo alang sa akong kaugalingon bisan unsa pa ang mahitabo sa akong kinabuhi? O motugyan ba lamang ako ngadto sa tintasyon? Nasayud ako nga ang pagpasalig ngadto sa higpit ug pig-ot nga dalan nagpasabut og pagsalikway sa negatibo nga mga impluwensya sa akong kinabuhi. Usab, ang akong tinguha nga mobalik sa simbahan nagklaro nga ang akong asawa ug ako nagkalahi og dalan. Sa kahimtang sa among kaminyoon nianang higayona, kami nagpadulong na ngadto sa diborsyo.
Nahadlok ako. Walay garantiya nga ang akong mga paningkamot mohatag kanako sa maayong mga butang nga akong gusto niini nga kinabuhi. Apan mibalik ang akong desisyon ngadto sa unsay akong nakat-unan sa mga tuig nga milabay—nga ako labing malipayon nga nagpuyo sa ebanghelyo. Midesisyon ako nga mopasalig sa hingpit ug mobutang sa akong kaugalingon diha sa mga kamot sa Dios, bisan unsa pay mahitabo. Alang sa tibuok nakong kinabuhi, mosalig ako Kaniya.
Sa makausa pa, nagsugod ako sa pagbalik ngadto sa simbahan ug sa paghimo og hustong mga pagpili sa akong kinabuhi. Usa sa labing malipayong adlaw sa akong kinabuhi mao ang akong pagkadawat og rekomend sa templo pag-usab. Nakakaplag ako og kalipay diha sa templo samtang ang akong kaminyoon mipadayon sa pagkaproblema ug sa kaulahian natapos.
Pagpangita sa Akong Tinubdan sa Kaugalingong Bili
Ingon ka makalisang nga gibati kana nga desisyon, pinaagi niana nga kasinatian akong nakat-unan ang pagpasalamat sa impluwensya sa Dios diha sa akong kinabuhi. Bisan tuod ako nakabuhat og kasaypanan, makahimo pa ako og matarung. Wala ako makig sangka ni bisan kinsa. Kon ako mosalig sa Manluluwas alang sa akong kaugalingong bili, makahunong ako sa paghatag sa akong tanan nga mga paningkamot sa pagsulay sa pag-usab sa pagtan-aw sa uban kanako.
Nakita ko ang akong kaugalingon sa simbahan nga OK nga nag-inusarang naglingkod o taliwala sa mga miyembro kinsa anaa sa nagkalain-laing ang-ang sa kinabuhi. Ako naningkamot sa dili pagtago ug maanaa aron makig-istorya sa mga tawo sa akong ward. Nalingaw ako og tambong sa akong mga miting alang sa gitinguha nga katuyoan.
Ang pagbaton niana nga kalinaw mitabang usab samtang ako mibalik sa pakigdate. Wala gihapon ako makakuha og daghang ikaduha nga mga date, apan karon ako nang nahibaloan nga dili kinahanglan nga i-angin ko ang akong mga sumbanan tungod lamang nasayop ako kaniadto. Gipuy-an ko ang ebanghelyo sa labing maayo nga akong mahimo, ug igo ako kamaayo aron makigdate niadtong kinsa nagpuyo sa ebanghelyo sa labing maayo nga ilang mahimo usab.
Sa katapusan nakakaplag ako og usa ka takus nga anak nga babaye sa Dios kinsa akong giminyoan sa templo. Ang iyang kinabuhi lahi kaayo kay sa ako, apan kon moabut sa gugma sa Manluluwas ug sa pagsabut sa Iyang Pag-ula, kami sama og pagbati.
Sulod sa katuigan, akong nakat-unan sa dili pagtugot sa akong nangagi o ang pagtamud sa ubang mga tawo nga maoy mohulagway sa ako karong kaugalingong bili. Giwagtang ko ang ideya nga ang kinabuhi malampuson lamang kon kini perpekto. Dili tanan nakadayeg kon hain ako karon tungod sa giunsa ko pag-abut dinhi, ug kana OK ra. Dili kini ang akong tumong sa pagkumbinser kanila. Kini ang akong tumong nga magpadayon sa paghinulsol ug sa pagpaduol nga mas suod ngadto sa Manluluwas. Kini tungod Kaniya nga, sama ni Alma nga Batan-on human sa iyang paghinulsol, ako mahimong wala na “samoka sa panumduman sa akong mga sala” (Alma 36:19). Mahimo nga magmalinawon ako nasayud nga kini mao ang akong padulongan—ngadto sa Manluluwas—kana ang importante.