Naghunahuna ako usahay nga sayon alang sa mga young adult ang pagtuo nga ang paghinulsol usa ka makakuyaw nga butang. Tinuod nga kini makapakuyaw ang pag-angkon sa unsay atong nabuhat kon mahadlok kita kini nagpasabut sa pagkawala sa gugma gikan sa mga tawo nga atong gimahal o gikan sa atong Langitnong Amahan. Uban niana nga opinyon sa paghinulsol, tingali matintal kita sa pagkompisal og “igo lamang” aron makapasar sama sa usa ka eksamen aron lang makaabut sa sunod nga ang-ang. Hinoon, akong nakat-unan pinaagi sa akong mga kasinatian nga dili kana ang unsay tinuod nga paghinulsol. Ang paghinulsol dili kanunay hayahay, apan kon kita makasabut unsa ka dako ang gugma sa Ginoo kanato ug gusto nga motabang kanato, ang kahadlok mokunhod samtang kita mogamit sa atong hugot nga pagtuo diha sa Iyang gahum sa paghimo kanatong limpyo. Akong nakat-unan nga samtang naggamit ako sa akong hugot nga pagtuo diha ni Kristo pinaagi sa paghinulsol, ang akong nangaging mga sayop dili kinahanglan nga mohulagway sa akong karon o sa akong umaabut (basaha pa ang akong artikulo sa pahina 44).
Sa digital lamang nga mga artikulo, gipasabut ni Evita nga ang tinuod nga paghinulsol magdala kanato og pasalamat alang sa Manluluwas ug sa Iyang Pag-ula ug naghatag kanato og kalig-on sa pagbatok sa umaabut nga tintasyon. Si Leah nagdugang nga dili gani kita kinahanglan nga maghulat alang sa sakramento inig ka Dominggo—ang pagbalik ngadto sa Ginoo pinaagi sa paghinulsol matag adlaw naghatag kanato og gahum ngadto sa pagpalayo bisan sa gagmay nga mga naandang mga buhat nga nagpalayo kanato gikan Kaniya. Ug kon kita maghimo og bug-at nga mga kasaypanan, si Jori mipakigbahin nga ang proseso sa paghinulsol makatudlo kanato mahitungod sa gugma sa Manluluwas alang sa matag usa kanato.
Ang paghinulsol usa ka gasa nga ako mapasalamaton nga aduna niini sa akong kinabuhi. Ang Dios nasayud nga kita tawhanon ug nga kita usahay makahimo og ngil-ad nga mga pagpili. Ingon sa pagkadili nato hingpit, adunay paglaum alang kanato. Kon atong ibutang ang atong pagsalig diha sa Manluluwas, Siya molakaw uban kanato diha sa dalan balik ngadto sa atong Amahan sa Langit—bisan unsa pa kini kadugay nga mahitabo.