Kev Muab Ixayees Sau Los Ua Ke Los ntawm Kev Txhawb Pab

Kev txhawb pab yog ib lub cib fim coj raws li tus yaj saub tej lus ntuas kom muab Ixayees sau los ua ke.

Thawj Tswj Hwm Russell M. Nelson tau caw peb pab muab Ixayees sau los ua ke—uas yog “qhov tseem ceeb tshaj plaws uas ua hauv lub ntiaj teb no.”¹

Hais txog cov uas xav koom tes ua txoj hauj lwm muab Ixayees sau los ua ke no, kev txhawb pab yeej yog ib lub cib fim zoo kawg kom ua li ntawd. Yog ib txoj kev zoo uas hloov tau tib neeg lub neej. Txawm peb txhawb pab rau cov mej zeej uas tsis tshua muaj siab ntseeg los sis peb caw lawv pab peb thaum peb pab cov uas tsis ntseeg li peb, kev txhawb pab yeej ua rau peb muaj cib fim muab Ixayees sau los ua ke.

Kev Cawm cov Mej Zeej uas Rov Qab Los

“Thaum peb muaj siab hlub lwm tus, yuav muaj tej txuj ci tseem ceeb, thiab peb yuav nrhiav kev coj peb cov viv ncaus thiab cov nus uas ‘poob zoo lawm’ los rau Yexus Khetos txoj moo zoo.” —Jean B. Bingham²

“Kuv twb tsis tshua muaj siab ntseeg tau rau xyoo thaum kuv tus txiv thiab kuv wb tsiv tsev mus rau ib lub zos tshiab. Kuv lub Koom Haum Niam Tsev tus thawj tswj hwm tuaj xyuas kuv, thiab nug kuv seb kuv puas kam ib tug viv ncaus tuaj xyuas kuv. Kuv txhawj me ntsis, tiam sis kuv pom zoo. Tus viv ncaus twb tuaj xyuas kuv txhua lub hlis, txawm yog nws muaj kev fab cov aub—thiab kuv tus aub nyiam neeg heev! Nws tau tuaj txhawb pab kuv tau ob xyoos, thiab nws pab kuv ntau heev.

“Txawm yog feem ntau nws tuaj sib tham xwb, tej lub sij hawm nws nug kuv tej yam uas ua rau wb sib tham txog tej yam ntawm sab ntsuj plig. Kuv tsis tshua txaus siab ua li ntawd, tiam sis tej lus nug ntawd ua rau kuv xav txiav txim siab kuv puas yuav ua raws li txoj moo zoo los sis ua neej li kuv ua tam sim ntawd. Kev txiav txim siab ua li ntawd yeej nyuaj rau kuv, tiam sis kuv twb xaiv sib tham nrog ob tug ntxhais txib.

“Hnub uas kuv twb yuav rov qab koom kev sib ntsib txais lub cim nco txog thawj zaug hauv rau xyoo ntawd, kuv ntshai mus haud. Thaum kuv nkag mus rau hauv lub tsev koom txoos, kuv tus viv ncaus txhawb pab twb tos kuv, thiab nws nrog kuv mus rau hauv chav teev tiam. Tom qab ntawd, nws nrog kuv rov qab mus rau kuv lub tsheb, nug kuv seb nws yuav ua li cas kom pab kuv thaum kuv los ze tus Cawm Seej dua ntxiv.

“Kuv tus viv ncaus uas txhawb pab siv sij hawm thiab hluv kub kom kuv rov qab muaj siab ntseeg, thiab kuv saib nws tej hauj lwm ua li ntawd yog ib lub txiaj ntsim zoo tshaj plaws uas ib tug neeg tau muab rau kuv. Kuv yeej zoo siab kawg uas nws nyob ntawm kuv ib sab thaum kuv rov qab los rau tus Cawm Seej lub Koom Txoos.”

Tsis qhia lub npe, British Columbia, Canada

Tej Ntsiab Cai rau Koj Xav Txog

“Tuaj xyuas kuv txhua lub hlis”

Koj yuav ua li cas kom qhia cov uas koj mus txhawb pab hais tias koj hlub lawv tshaj koj xav ua lwm yam? (saib Lus Qhuab Qhia thiab Kev Khi Lus 121:44).

“Nug”

Kev nug tej lus zoo yuav pab ib tug neeg xav tias lawv ua zoo li cas. Cia li nco ntsoov tias peb txoj kev txhawb pab muaj ib lub hom phiaj uas tsis yog kev sib tham xwb.³

“Tos kuv”

Txhua tus yuav tsum xav tias muaj neeg xav kom lawv rov qab los (saib 3 Nifais 18:32).

“Nyob ntawm kuv ib sab thaum kuv rov qab los”

Peb txoj kev txhawb nqa yuav pab heev thaum nyuaj rau tib neeg rov qab mus cuag tus Cawm Seej thiab txais nws txoj kev kho mob zoo (saib Henplais 12:12–13).

Kev Txhawb Pab thiab Kev Muab Neeg Sau Los

“Siv tej kev uas yooj yim rau nej qhia tib neeg vim li cas Yexus Khetos thiab Nws lub Koom Txoos tseem ceeb rau nej. …

“… Nej lub luag hauj lwm yog qhia tej uas nyob hauv nej lub siab thiab ua neej raws li nej ntseeg.” —Elder Dieter F. Uchtdorf⁴

Kev txhawb pab thiab kev qhia txog txoj moo zoo yeej koom ua ke. Nov yog tej yam uas peb ua tau kom muab peb cov phooj ywg thiab neeg zej zog sau los ua ke thaum peb mus txhawb pab—los sis txhawb pab thaum peb muab peb cov phooj ywg thiab neeg zej zog sau los ua ke:

Pab lwm tus ua ke. Nrhiav cib fim caw cov phooj ywg los sis cov neeg zej zog koom nnrog koj mus txhawb pab lwm tus. Thov kom lawv pab koj npaj ib pluas mov rau ib tug niam tsev tshiab, mus xyuas ib tug neeg zej zog laus, los sis tu ib tug neeg mob lub tsev.
Qhia ua ke. Xav seb koj puas thov ib tug phooj ywg los sis neeg zej zog uas tsis tshua tuaj koom txoos kom lawv cia cov tub txib qhia lwm tus hauv lawv lub tsev. Los sis koj tus phooj ywg pab tau koj thaum koj cia lawv los rau koj lub tsev los sis nrog koj mus rau lwm tus lub tsev thaum lawv kawm txog txoj moo zoo.
Ncav tes pab lwm tus thaum twg koj pom lawv xav tau kev pab. Hais tias koj yuav thauj lawv mus rau lub tsev koom txoos. Caw cov me nyuam rau tej yam ntxim saib ntxim ua hauv lub Koom Haum Me Nyuam Yaus. Muaj lwm txoj kev twg rau koj txhawb pab thiab muab lwm tus sau los ua ke?
Siv tej yam uas lub Koom Txoos tau tsim kom pab koj. Lub Koom Txoos muaj ntau yam kev pab cov mej zeej qhia txog txoj moo zoo. Koj saib tau hauv feem “Tub Txib” nyob hauv qhov app Txoj Moo Zoo cov Ntawv thiab mus saib ComeUntoChrist.org kom kawm tswv yim txog kev muab Ixayees sau los ua ke hauv peb zej zog.

© 2020 by Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, January 2020. Hmong. 16984 295