Padahk kan en Papah, Senweri 2019
Kapwurepene Israel nan Doadoahk en Papah
Doadoahk en papah kin kihda ansou mwahu en idawehn kaweid en soukohp pwehn kapwurepene Israel.
Presiden Russell M. Nelson lukehier kitail en sewese kapwurepene Israel—“mwekid keieu kesempwal me wiewiawi pohn sampa rahn wet.”1
Irail kan me men iang wia doadoahk en kapwurepene Israel, doadoak en papah kak wia ansou mwahu en sawas. E wia elen kamarain ehu pwehn wekid en aramas mour kan. Tetehn kitail wie papah towehkan me solahr iang sarawi de lukluke irail en sewese kitail ni atail kin papah irail kan me sohte iang atail mwomwohdiso, doadoahk en papah wia ansou mwahu ehu en kapwurepene Israel.
Doarehla Towehkan me Pwupwuredo
“Ma limpoak me pahn kamwakid, soahng kopwuriamwei pahn pweida, oh kitail pahn diar mwomwen atail pahn kapwurehdo riatail lih oh ohl akan nan rongamwahu en Sises Krais wet me soahng koaros me kitail anahne mihmi loale.” —Jean B. Bingham2
“I solahr iang sarawihki sounpar weneu ni ansou me ngehi oh ei pwoudo keseula nan wasa kapw ehu. Presiden en ahi Pwihn en Sawas en Lih kapwo pwarek ie, idek ma e kak kadaredo emen lih en tuhongie. Mwur ekis salo, ahpw I pwungkihla. Liho pwaredo rehi sounpwong koaros tetehn e kin masak kidi—pwe mie nei kidi komwad men! Liho seusewesehkinie erein sounpar riau, oh ah sawas inenen sair ie mehlel.
“Tetehn liho kin mwemweitdohte, ekei ansou en kin wia peidek kei me kahrehiong aht koasoi kin sairada palingehn. Mepwukat kin koasonsuwedi iehda, ahpw re kin kahrehda ahi medemedewe ma I pahn alehda rongamwahuo de mihmihte wasa me I mihmihiero. Madmadau wet kihong ie nan kahpwal, ahpw I pilada I en tuhong mahs lih misineri kei.
“Ni rahn me I tepin iang mihting en kamadipw sarawi mwurin sounpar weneu, I masak pidolongala. Ni ahi pidolongala nahn imwen kaudeko, lih me kin tuhtuongieo awiawihie, oh ih eri iang ie aluhlongala nan imwehn kaudeko. Mwuri, liho iang ie aluhla ni werei sidohsau, peipeidek rehi dahme e kak wia pwehn sewese ie ni ei karkaraniala Sounkomouro.
“En lih en papaho ah ansou oh limpoak sewese kapwureiehla nan mwomwohdiso, oh I kin wiahki ah sawasko iei kisakis me keieu laud me kohiengiehier. I kapingkalahnganki en liho eh ieiangie ni ahi pwuralahng sapwellimen Sounkomouro Mwomwohdiso.”
Ahdo sohte sansal, Brithish Columbia, Canada
Medewe Ire pwukat
“Tuhongie sounpwong koaros”
Ia mwoamwen amwail kak kasalehda me kumwail nsenohki irail kan me kumwail kin papah laudsang mehteikan? (tehkDoctrine and Covenants 121:44).
“Peidek kan”
Idek peidek pwung kan kin sewese elehda en aramas douloal. Tamataman me atail doadoak en papah kin kolokol kahrepe ehu me deisang kapehse. 3
“Awiawihie”
Kosomwpen koaros anahne wiawi (tehk3 Nihpai 18:32).
“Ieiangie ni ahi pwurala”
Atail sawas kin inenen lipwan ong irail kan me dipekelekel ni arail pwuralahng Sounkomouro pwehn kakehlailda (tehk Ipru 12:12-13).
Doadoahk en Papah oh Kopwurpwurpene
“Ni sohte lipilipil songen wiepe dah me pahn mwahu ehng kumwail, ehukiheng aramas akan dahme karehda Sises Krais oh Sapwellime Mwomwohdiso kesemwpwalkiehng kumwail. …
“… Amwail pwukoah iei en ehukiong mehteikan dahme mihmi nan amwail mohngiong oh momourki dahme kumwail kin kamehlele.” —Elder Dieter F. Uchtdorf4
Doadoahk en papah oh kalohki rongamwahuo kin patpene. Iet ekei irehkan me kitail kak kihpene kempoakepatail kan oh mehn mpatail kan ni atail kin wie papah—de wie papah ni atail kihpene kempoakepatail kan oh mehn mpatail kan.
-
Patpene papah. Rapahki ansou mwahu kan en lukepene kempoakepamwail oh mehn mpamwail kan pwehn iang kumwail sewesehda en emen aramas anahn kan. Peki irail en sewesei kumwail wiahda kisin mwenge ong nohno kapw men, pwarek emen mehn mpamwail kapw, de kamwakelehda imwen aramas me soumwahu.
-
Patpene kasukuhl. Medewe luke emen kempoakepamwail de mehn mpamwail me sohte kin kalap iang sarawi en wia ehu kasukuhl ni imweo ong aramas me kin tuhtuhong misineri kan. De kempoakepamwailo kak sewese kumwail ni imwamwail de iang kumwail kohla ni imwen emen tohrohr pwehn wia kasukuhl.
-
Sewese mehteikan ni ansou me mie anahnepe. Wai irail lang ni imwen kaudek. Luke serihkan ong ni mwekid kan en Praimeri. Soangen wiepe da teikan me kumwail kak papah oh kapwurepene?
-
Doadoahngki dipwisou kan me Mwomwohdiso kihdahr. Mwomwohdiso wet kidahr dipwisou tohto ong towehkan pwehn sewesei irail kalohkiseli rongamwahuo. Kumwail kak rapahki nan pali en “Misineri” nan Gospel Library app oh kohla nan ComeUntoChrist.org pwehn diar mwoamwen kapwurepene Israel nan atail wasahn kouson akan.
© 2020 by Intellectual Reserve, Inc. All rights reserved. Ntingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwe en Ministering Principles, January 2020. Pohnpeian. 16984 885