Nongonongen Iamwir, February 2020

Iamwir me ren Uruon Famini

Sasing seni Joshua Dennis; sasing kewe seni Getty Images

Anisi emon ne fori an uruon famini a eu angangen iamwir mi fokun pochokun. Atun ka achufengeni ekkoch ngeni ar kewe neo ren angangen uruon famini me tichikin, ka anisi ne amosowa ekkewe pwang non netiper meni fan ekkoch rese tepereni pwe mi nom rer (nengeni Malachi 4:5–6).

Ese nefinifin ika a emon chon ewe Mwichefen non unusen manauan are emon ese mwo rongorong ewe kapas allimen Jises Kraist mi niwinsefanito, noun Kot meinisin ra mochen sinei ia ra feitto me ia.

Esap mo pwan tam fansoun om watiw ewe ennetin me anonnon memmef non netiper, me usun chok non ekkei porous epwe tou.

Kuta Famini non 30,000 Feet

Non chok ekkewe ran ai sai won sepenin ngeni imwei, uwa mwowmot unukun emon itan Steve, minne a ereniei ekkoch mettoch seni pwisin manauan. A sochungio seni sukkunen high sukun, a choni ewe U.S. Army ne angang non ewe wis ren pekin emon mi tipwachem ren aweweiochu porous nupwen a 18 ierin, me a poputa ne angang non ewe White House, a wisen awora ew pekin aninis ren aweweiochu fos ngeni ewe Presetenin Merika. Seni 18 ierin ngeni 26 ierin, a angang ngeni ruemon Presetenin Merika. An kewe porous a men amwarar!

“Steve,” uwa apasa, “a men namwot kopwe makkei porousom kei ren noum semirit non ekkan ran! Repwe mochen porausomkei seni pwisin omw mak.” A tipeew ngeni.

Iwe mwirin ewe Ngun a amemmef ngeniei ai upwe eisini i met a sinei usun an kewe neuo. Steve a sinei chommong porausen an inan we famini, kapachenong pwan ew atun porousan an famini ar mwongo fengen ngeni Abraham Lincoln atun an kampein non ekkewe neni fansoun ututun prestenin U.S. non 1860.

Nge, an sinei ren pekin an seman we famini mi chok kukun. A ennetin mochen sinei pwan ekkoch. Uwa wau nei we phone me suki ngeni ewe FamilySearch app. “Steve, sia tongeni kutta omw famini iei!”

Uwa tota won ewe Wi-Fi won ewe sepenin. Uwa watiw neiwe phone won ewe chepen me fan mesei pwe am me ruemon aipwe tongeni kuna. Aiwa kutta won FamilyTree. Non fitu chok minich am me ruemon aua nenengeni ewe taropwen pupunu nefinin semen seman we me inen inan we.

“Ina ir!” a apasa. “Uwa chechemeni itan we iei!”

Ewe memmefin pwapwa a aurano am me ruemon. Aiwa angang fengen non 45 minich ne makkei ekkoch mettoch ren aramasan ese kon fat ngeni. A tingorei ai upwe pwon aupwe sopweno ne kutta an famini fengen non Colorado. Aiwa ekkisiwin noum nampa nupwen ewe sepenin epwe ne sotiw.

Iwe a iei usun, am fiti sepenin non 30,000 feet (9,145 m) non ewe asepwan, fiti fengen me ew pisek mecha kukun ussun kukkunun pei, me aua kutta emon mwan me fefin ra puppunu 100 ier me nom minne ra fen monucheno seni i me an famini. Aise nukunuk! Nge aua kuna ir. Famini ra fofo fengen. Porouser ra chechemeni. Memmefin ewe kinisou a tori kem fan iten ekkewe ewe fon me met aua tongeni fori won. A fokkun ew manamant.

Jonathan Petty, Colorado, USA

A nom ren Famini Minafo

Maria a fen patapateno seni ewe mwichefen nap seni 20 ier. Fitu maram a no, aua kan nom fengen ren ukkukun ruu awa non imwem we, me kutta an famini ren ekkoch rekot me taropwen senses. Non ekis fansoun a poputa ne kechiw me apasa, “A nap ai kaeo mettoch usun ai we famini non ruu awa nap seni met uwa fen sinei non unusen manauei!”

Non nesoponon am fansoun fengen, aua aiti usun ewe Relatives Around Me won ewe FamilyTree app. Aua kaeo pwe ngang me punuwei am me ruemon am tettenin an Maria famini mi ekkis towau. A poputa ne kechiw sefan, me a apasa pwe titipwan nge a akanamon chok. Ese mo nge sinei mi wor an famini non ewe neni. Fitu wiik mwirin Maria a churi noum we pisop. Iei a angang ne ammoneta ngeni ewe tempel, me a churi chommong “minafo” tetenin aramasan non am ewe wart!

Carol Riner Everett, North Carolina, USA

Nofitin Angangen Iamwiri

Ashley, emon fefin uwa iamwiri, me ngang me i mi wor noum puken kuuk seni inen inenapem kewe. Noun ewe a feitto seni inen inan we, me nei we ew puk uwa achufengeni nupwen uwa angei noun Inei we Greenwood pworun nofitin kuuk mwirin a mano.

Ashley me ngang aiwa fini echo taropwen kuuk seni noum puken kuuk, me aiwa chufengen mwirin angang eu pwin ne sotuni ne kukur. A fini eu toropwein nofitin okasi, iwe aua fori ena akkom me wanong non ewe oven. Uwa fini mwongon chip—eu mwongo mi ureno non meinisin an Greenwood parin famini meinisin. Noun Ashley nengin Alice a anisikem ne neni ewe mwongo. Iwe, pokiten Ashley ese mochen noun kewe semerit repwe anano ekkewe okasi, a fangeno ekkoch ngeni ekkewe fefin a iamwir ngeni.

Ewe mettoch uwa men sani non am ewe pwinin kuuk fengen, pwe am mi fosun ekkewe itenapen iamwir—an weires me pwan ai weires. Nge aua pwan fosun inem kewe chinap me inem kewe, minne a fokkun ouchea me netipem.

Jennifer Greenwood, Utah, USA

Fofforun Om Kopwe Aninis

Uruon Famini a tongeni suki asamen tufichin iamwir nupwen a ese wor met mi tufich. Iwe iei ekkoch mettoch meni kepwe sotuni.

Anisir ne rekortini me minata ar fos non nenien rongorong uruon ar neon famini, akkaewin ekkewe poraus mi namot mi tutunapwei ekkena sasing.
Fori eu fan chart ika pwan ekkoch minen print usun uruon famini ka tongeni ani niffang.
Aitir ne fori ar pwisin uruo ren ar makkei usun manauer non eu puk me met ra kon sani fori. Puken fos? Puken sasing? Puken vitio? A wor chommong finata ren met kopwe tongeni fori ngeni ekkewe chon rese sani mak non puuk.
Feinno fengen ngeni ewe tempel me fori angangipin faniten ekkewe neo. Are erenir kopwe anisir ren ar angangepin fan iten ar kewe iit non temple ika a nap seni met ra tongeni fori.
Chufengen ne fos fengen usun erenien famini.
Fiti eu sukkunen uruon famini fengen.