Tej Ntsiab Cai txog Kev Txhawb Pab, Ob Hlis Ntuj 2020

Kev Txhawb Pab Los ntawm Tsev Neeg zaj Keeb Kwm

Daim Duab

ministering

Tus kos duab yog Joshua Dennis; daim duab sab tom qab thiab daim duab los ntawm Getty Images

Qhov uas yus pab ib tug nrhiav lawv tsev neeg zaj keeb kwm yog ib txoj kev txhawb pab uas muaj zog heev. Thaum koj pab lwm tus sib raug zoo nrog nws cov poj koob yawm txwv los ntawm nws tsev neeg zaj dab neeg thiab xov xwm, koj yuav pab nws lub siab puv npo, tsis hais tus uas tsis paub tias nws tseem muaj chaw uas puv tau (saib Malakis 4:5–6).

Txawm yog koj pab ib tug uas yog mej zeej hauv lub Koom Txoos tas nws lub neej los sis ib tug uas tsis tau hnov txog Yexus Khetos txoj moo zoo, tag nrho Vajtswv cov me nyuam xav paub tias lawv tuaj qhov twg tuaj.

Yeej tsis tas siv sij hawm ntev kom tshoov lawv lub siab heev, raws li qhia nyob hauv tej zaj nram qab no.

Nrhiav Tsev Neeg Nyob Puag Saud 30,000 Fij

Tsis ntev tas los thaum kuv caij nyob hoom rov mus tsev, kuv zaum ntawm Steve ib sab, uas qhia kuv me ntsis txog nws zaj keeb kwm. Nws twb kawm ntawv high school tiav lawm, tau mus ua tub rog txawj sib txuas lus thaum nws muaj 18 xyoo, thiab tom qab ntawd pib ua hauj lwm hauv lub White House (lub Tsev Dawb), pab txhawb nqa tej kev sib txuas lus rau tus Thawj Tswj Hwm ntawm lub Teb Chaws Amelikas. Txij thaum nws muaj 18 xyoo txog 26 xyoo, nws ua hauj lwm rau ob tug Thawj Tswj Hwm ntawm lub Teb Chaws Amelikas. Nws tej zaj yeej ntxim nyiam!

Kuv hais tias, “Steve, koj yeej yuav tsum muab tej dab neeg no sau cia rau koj cov xeeb ntxwv! Lawv yuav tsum paub txog tej zaj no los ntawm koj lub suab hais.” Nws pom zoo.

Ces tus Ntsuj Plig tshoov kuv lub siab nug nws seb nws paub dab tsi txog nws cov poj koob yawm txwv. Steve paub ntau txog nws niam cov poj koob yawm txwv, tsis hais ib zaj txog thaum nws tsev neeg tau noj hmo nrog Abraham Lincoln thaum nws sib tw ua nom thoob plaws lub teb chaws thaum yuav xaiv ib tug thawj tswj hwm rau lub Teb Chaws Amelikas rau xyoo 1860.

Tiam sis nws tsis paub ntau pes tsawg txog nws txiv cov poj koob yawm txwv. Nws xav paub ntxiv. Kuv rho kuv tus xov tooj tawm thiab qhib qhov app FamilySearch. “Steve, wb nrhiav tau koj tsev neeg tam sim no!”

Kuv txuas rau Wi-Fi uas muaj hauv nyob hoom. Kuv tso kuv tus xov tooj rau lub rooj nyob rau ntawm kuv hauv ntej kom wb ob leeg pom tau. Wb nrhiav hauv FamilyTree. Ob peb feeb tom qab ntawd wb pom tau nws yawg koob thiab pog koob daim ntawv ua pov thawj rau kev sib yuav.

“Yog nkawd ntag!” nws hais. “Tam sim no kuv nco qab nws lub xeem!”

Ua rau wb zoo siab kawg nkaus. Wb tau ua hauj lwm tsim kev qhia xov xwm rau nws ib co poj koob yawm txwv uas tsis tshua muaj neeg paub rau 45 feeb. Nws thov kuv cog lus tias wb tseem yuav nrhiav ntxiv ua ke nyob hauv Colorado. Wb ib leeg muab tus naj npawb xov tooj rau ib leeg thaum lub nyob hoom tab tom tsaws.

Wb nyob no 30,000 fij puag saum ntuj (9,145 mev), muaj ib lub tshuab uas me npaum li kuv txhais tes, nrhiav ib tug txiv neej thiab ib tug poj niam uas tau sib yuav 100 xyoo tas los uas nws thiab nws tsev neeg tsis nco qab lawm. Ua rau kuv xav tsis thoob! Tiam sis wb nrhiav tau lawm. Ua rau tej tsev neeg sib txuas. Nws twb nco txog tej zaj dab neeg. Ua rau wb ris Vajtswv txiaj rau qhov muaj tej kev pab li no thiab tej txuj ci technology. Yog ib qho txuj ci tseem ceeb.

Jonathan Petty, Colorado, USA

Tsev Neeg Tshiab Puag Ncig

Maria tsis tshua muaj siab ntseeg tau 20 xyoo tas los. Ob peb hlis dhau los, wb tau siv sij hawm nrog nws hauv kuv lub tsev, nrhiav nws tsev neeg nyob hauv cov ntaub ntawv suav neeg thiab lwm cov ntaub ntawv. Muaj ib lub sij hawm nws cia li los kua muag hlo hais tias, “Hauv ob teev no kuv tau kawm txog kuv tsev neeg ntau tshaj li kuv paub tas kuv lub neej lawm!”

Thaum wb siv sij hawm yuav luag tas lawm, wb tau qhia nws txog Relatives Around Me (Cov Txheeb Ze Nyob Ze) nyob hauv qhov app FamilyTree. Ua ciav kuv thiab kuv tus txiv wb ob leeg yog txheeb ze nrog Maria. Nws rov qab los kua muag, hais tias nws twb xav tias nws nyob nws ib leeg. Nws tsis tau paub tias nws muaj tsev neeg nyob hauv cheeb tsam no. Ob peb lub lim tiam tom qab ntawd Maria ntsib wb tus npisov. Tam sim no nws npaj mus rau lub tuam tsev, thiab nws twb ntsib cov neej tsa “tshiab” hauv peb pawg ntseeg!

Carol Riner Everett, North Carolina, USA

Daim Ntawv Qhia Ua Khoom Noj rau Kev Txhawb Pab

Ashley, ib tug viv ncaus uas kuv txhawb pab, thiab kuv wb nyias muaj nyias ib phau ntawv los ntawm nyias tus pog. Nws phau yog los ntawm nws pog koob, thiab kuv li yog ib phau uas kuv tau tsim tom qab kuv Pog Greenwood tas sim neej no thiab kuv txais nws lub pob ntim tej daim ntawv qhia ua khoom noj.

Ashely thiab kuv wb tau xaiv ib daim ntawv qhia ua khoom noj los ntawm wb ob phau ntawv, thiab muaj ib hmo, wb tau koom ua ke sim ua khoom noj ntawd. Nws tau xaiv ib daim qhia ua khoom qab zib, yog li ntawd wb tau ua qhov ntawd ua ntej thiab tso hauv lub qhov cub. Kuv tau xaiv ib co chip dip—ib yam peb noj thaum tsev neeg Greenwood muaj kev ua si party txhua zaus. Ashley tus ntxhais Alice tau pab wb saj cov khoom noj. Ces, vim Ashley tsis xav cia nws cov me nyuam noj khoom qab zib kom tas, nws nqa ib feem rau cov viv ncaus uas nws txhawb pab.

Qhov uas kuv nyiam tshaj txog hmo ntawd yog qhov uas thaum wb ua khoom noj, wb tau sib tham txog kev txhawb pab—tej yam uas nyuaj rau nws thiab kuv. Tiam sis wb kuj sib tham txog wb ob tug pog thiab ob tug niam tsev, uas ua rau wb muaj lub siab mos muag.

Jenifer Greenwood, Utah, USA

Tej Yam uas Yuav Pab

Kev nrhiav tsev neeg zaj keeb kwm yuav qhib kev rau koj muaj cib fim txhawb pab lwm tus thaum tsis muaj dab tsi ntxiv uas pab tau. Nov yog ob peb lub tswv yim uas koj ua tau.

Pab lawv kaw suab thiab upload tej kev kaw suab txog tsev neeg zaj dab neeg ntawd, qhov tseem ceeb yog tej zaj uas muaj daim duab.
Tsim ib daim qhia tsev neeg caj ceg los sis lwm yam ntaub ntawv txog tsev neeg zaj keeb kwm uas koj muab ua ib khoom plig rau lwm tus.
Qhia tej kev kom ceev lawv tej zaj keeb kwm los ntawm ib txoj kev ceev xwm txheej uas lawv nyiam ua. Kev kaw suab? Kev thaij duab? Kev thaij video? Muaj ntau yam uas cov tsis nyiam sau ntawv ceev xwm txheej ua tau.
Mus rau lub tuam tsev ua ke ua kab ke rau cov poj koob yawm txwv. Los sis qhia tias koj yuav pab ua kab ke rau lawv tsev neeg yog tias lawv muaj ntau dua li lawv ua tau lawv tus kheej.
Koom ua ke cia ib leeg qhia ib leeg txog lawv tsev neeg kab lig kev cai.
Kawm txog txoj kev ua tsev neeg zaj keeb kwm ua ke.

© 2020 Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, February 2020. Hmong. 16995 295