2020
Karihngihn ke Sramsram Mahtuh luhn Sucu
Fepweri 2020

Lutiyacn Ip Yohk ke Karihngihnyuck, Fepweri 2020

Karihngihn ke Sramsram Mahtuh luhn Sucu

ministering

Sroal se sel Joshua Dennis; petsac se tohkoh ac petsac se sahyac sin Getty Images

Kasruh mwet sahyac ke sramsram mahtuh luhn sucu lalos pa sie ohiyac fokoko in karihngihn. Ke kom kapsrweni mwet sahyac nuh ke sucu mahtuh lalos ke sramsram luhn sucu ac mwe etuh kaclos, kom ac ahkfasye insiyaclos ke ma elos tiac etuh ma elos enenuh (liye Malachi 4:5–6).

Finne mwet se suc mempucr ke Alu paht kuh mwet se suc soana lohng ke wosasuc fohlohkihnyuck luhn Jisus Kraist, tuhlihk nuhkwewa nuhtin God kena in etuh acn ma elos tuhkuh kac.

Tiac pacl loesloes met liki elos moklweyuck ke ohiyac loal ac fokoko se, oacna ahkkahlwemyeyuck ke sramsram inge.

Konwacak Sucu se ke Fit 30,000 Lucng

Kihtihn pacl met ah ke nga wi oaksohk, nga konwacwack tuh nga oasr siskacl Steve, suc akacsruhi nuh sihk kuhtuh sramsram ke moul lal ah. El ahksahfyelah high school, na el sroacng nuh ke Solse Macrike ke mwet orek communications ke matwac 18, ac na muhtwacwack in orekma ke White House ah, kahsruh ke communications luhn Prestuhn luhn acn United States. Tukun matwac 18 nuh ke 26, el kuhlwacnsuhpuh Prestuhn luhn U.S. luo. Sramsram lal arlac sun na pwacye!

“Steve,” nga fahk, “kom enenuh in suhmuhslah sramsram inge nuh ke tuhlihk nuhtum! Elos enenuh sramsram inge sum sifacna ke liye lom.” El insese.

Na Nguhn fahk nuh sihk in siyuck sel ma el etuh ke mwet mahtuh lal. Steve el etuh ma puhkantwen ke sucu luhn ninac kiyacl ah, weacng sramsram soko ke sucu lal elos wi Abraham Lincoln mongo ke el som forfor inse ke election in sulaclah prestuhn luhn U.S. ke yac 1860.

Tuh srihk ma el etuh ke sucu luhn pahpah tuhmwacl, tuhsruhktuh. El arlac ke etuh yohk ke sucu lal. Nga sruhkwack phone nuhtihk ah ac ikacslah FamilySearch app. “Steve, kuht kuh in suk sucu lom ingena!”

Nga orekmakihn Wi-Fi ma oasr ke oaksohk ah. Nga fihlihyac phone nuhtihk ah fin ahluh in mongo se meet likiyuc ah kuht in tuhkweni liye. Kuht suk ke FamilyTree. Ke mihniht ekahsr ke kwewana liye pwepuh in macruht luhn pahpah tuhmuhn pahpah mahtuh tuhmwacl nuh sin ninac kiyacn ninac mahtuh kiyacl.

“Pa ingacn sucu luhk!” el fahk. “Nga esamwack inac luhn sucu lalos!”

Rahrah in nguhn se tuhkuh nuh sesr. Kuht tuhkweni orekma in ahksahfye ip ma wacngihn ke sucu lalos tukun minit 45. El siyuck sihk in olwelah nuh sel tuh kuht in kampare ke suk lasr fin acn Colorado. Kuht akacsruhi ke nuhmpuh lasr ke oaksohk ah oai.

Kuht pa inge, sohksohk ke fit 30,000 (9,145 m) yen engyeng uh, ke phone srihsrihk se oacna pouk, suk ke mukul se ac muhtwacn se suc macruht ke yac 100 somlah suc tuhlac nuh sel ac sucu lal. Wolacna! Tuh kuht konwacnuhlos yak. Sucu uh kapsreniyuck. Sramsram mahtuh esamyak. Puhla in kuloh puhlakihnyuck nuh sin technology ac mwe orekma inge. Tiacna srihk liki ma usrnguhk se.

Jonathan Petty, Colorado, USA

Rauniyucklac ke Sucu Sasuc

Maria el tiac wi alu pohs liki yac 20. Mahlwem kuhtuh tari ah, kuht weluhl ke kihtin pacl lohm sel, liye sucu mahtuh lal ke census ac ma sihmlac sahyac. Ke sie pacl el muhtwacwack tuhng ac fahk, “Nga etwaclah yohk ke sucu luhk uh ke ao luo inge yohk liki nga etuh ke moul luhk nohfohn!”

Ke sahflahiyacn pacl lasr tuhkweni, kuht akkahlwemye nuh sel Sucu Suc Fototo nuh Sihk ma oasr ke FamilyTree app. Sikyak tuh oasr sucu luhk ac mukul tuhmuhk ma sucu loes nuh sel Maria. El sifilpac tuhng, ac fahk lah el nuhnkuh muh el sifacna. El tiac etuh muh oasr sucu lal ke acn sesr. Kuhtuh wik luo somlah Maria el ohsun nuh sin bishop lasr. El ingena muhtwacwacack orekma elan ahkolah in som nuh ke tempuhl, ac el ohsun nuh sin mwet puhkantwen “sasuc” cousin lal ke ward lasr!

Carol Riner Everett, North Carolina, USA

Recipe in Karihngihn

Ashley, tahmtahel se nga karihngihn, ac nga kwewa oasr puk in orek mongo luhn ninac mahtuh kiyacsr. Ma lal tuhkuh sin ninac nuhtin ninac mahtuh kiyacl, ac ma luhk pa puk se nga oraclah ma nga eis recipe luhn Ninac mahtuh kiyuck Greenwood tukun el misac.

Ashley ac nga kwewana sulaclah sie recipe ke puk in orek mongo lasr, ac kuht tuhkweni tukun orekma lasr sie fong in oraclah mongo kac. El sulaclah in oraclah mongo emwem, na kuht oraclah met ac sang nuh ke oven. Nga sulaclah mongo acnuht se—ma kuht oraclah ke tuhkweni luhn sucu Greenwood nuhkwewa. Tuhlihk muhtwacn se nahtuhl Ashley pahngpahng Alice el kahsrwe kuht ema mongo uh. Na, ke srihpen Ashley el tiac ke tuhlihk nahtuhl in kanglah nohfohn mongo emwem sac, el sang kuhtuh nuh sin tahmtahel suc el karihngihn.

Ma nga luhngse emet ke recipe lasr ke fong sac pa kuht orek mongo ac bake, kuht sramsram ke ma nuhkwewa ke karihngihn—ma upac lal ac ma upac luhk. Tuh kuht oacyacpac sramsram ke ninac ac ninac mahtuh kiyacsr, ma sacohk nuh sesr kais sie.

Jenifer Greenwood, Utah, USA

Kuhtuh Ohiyac in Kahsruh

Sramsram mahtuh luhn sucu kuh in ikacslah pacl in karihngihn finne luhman wacngihn finsrak. Pa inge kuhtuh mwe kahsruh ma kom kuh in srihke.

  • Kahsrwelos in recordiyac ac sang sramsram recordiyucklac ke sramsram mahtuh in sucu, yohkiac in wi petsac.

  • Oraclah tahklac ke ohiyac ma kuh in printiyucklac sahyac ke sramsram mahtuh luhn sucu lalos ma kom kuh in use mwe sang nuh selos.

  • Luti ohiyac in suhmuhslah sramsram mahtuh lalos sifacna ke journal se ke ohiyac ma wo nuh selos. Journal in kahs uhmuhnyuck? Journal in petsac? Recordiyac petsac mukwiwi? Oasr ma puhkantwen nuh selos suc tiac luhngse suhmuhslah ke journal.

  • Tuhkweni som nuh ke tempuhl in oruh akwuck luhn mwet mahtuh lalos. Kuh siyuck in oruh akwuck ke sucu misac lalos fin oasr yohk liki elos kuh in oruh sifacna.

  • Tuhkweni akacsruhi facsin luhn sucu lowos.

  • Tuhkweni wi kuhlahas ke sramsram mahtuh luhn sucu.

© 2020 Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Ministering Principles, February 2020. Kosraean. 16995 868